Dyabulu me meka Yesu

Na manima ya mbotokolo ya Yesu, mpeve ya santu nataka yandi na ntoto ya kuyuma. Yandi kudyaka ata kima mosi ve na kati ya bilumbu 40, mpe yandi kumaka na nsatu mingi. Na manima, Dyabulu kwizaka meka Yesu mpe zonzaka na yandi: ‘Kana ya tsyeleka nge ke Mwana ya Nzambi, zonza na matadi yayi na kukuma mampa.’ Kasi samu na kupesa yandi mvutu Yesu sadilaka Masonoko yina ke zonzaka: ‘Ya ke ya kusonama ti muntu ke zingaka ve kaka na madya. Muntu ke na nsatu ya kuwa mambu nyonso yina ke basika na yinwa ya Yehova.’

Dyabulu mekaka dyaka Yesu. Yandi zonzaka: ‘Kana nge ke ya tsyeleka Mwana ya Nzambi, katuka na kisika ya kulutila zulu ya tempelo mpe losa nzutu na ntoto. Samu ya ke ya kusonama ti Nzambi ke filisa bambazi ya yandi samu ba yamba nge.’ Kasi Yesu sadilaka dyaka Masonoko. Yandi zonzaka: ‘Ya ke mpe ya kusonama ti nge me fwana kumeka ve Yehova Nzambi ya nge.’

Na manima, Satana lakisaka Yesu bimfumu nyonso ya yinza na bimvwama mpe nkembo ya yawu, mpe yandi zonzaka: ‘Mu ke pesa nge bimfumu nyonso yayi na nkembo ya yawu kana nge sambila munu mbala mosi kaka.’ Kasi Yesu vutulaka yandi: ‘Katuka awa, Satana! Samu ya ke ya kusonama, nge me fwana kusambila kaka Yehova.’

Na manima Dyabulu kwendaka, mpe bambazi kwizaka mpe ba natinaka Yesu madya. Banda ntangu yina, Yesu bandaka kusamuna nsangu ya mbote ya Kimfumu. Ni na kusala kisalu yayi Nzambi filisaka yandi na ntoto. Bantu vanda sepela na malongi ya Yesu. Mpe ba vanda landa yandi bisika nyonso yina yandi vanda kwenda.