ZINGA MUTINDU BAKRISTO ME FWANA KUZINGA

Kana mbongo kuma mpasi, nge ke kwandi ya kubongama?

Ya ke na ningisá ve beto na ntangu bamambu yina ke na salamá na yinza ke salá ti mbongo kuma mpasi. Samu na yinki? Samu ti beto ke na nsuka ya bilumbu ya nsuka mpe Biblia ke kebisá beto na kutula ve kivuvu ya beto na “bimvwama, samu ti ya ke zinga ntangu mingi ve.” (1Ti 6:17; 2Ti 3:1) Wa’ faso kifwani ya Yehoshafati lenda sadisa beto na kuvanda ya kubongama kana mbongo kuma mpasi?

Ntangu makanda ya nkaka kwizá nwanisa yandi na dikanda ya Yehova, Yehoshafati tulá kivuvu na Yehova. (2Ns 20:9-12) Mpe samu dikanda ya Yehova vandá ya kubongama, yandi tungá bisika ya ngolo mpe tulá bimvuka ya basoda na bwala. (2Ns 17:1, 2, 12, 13) Mutindu Yehoshafati, beto me bonga kutula kivuvu ya beto na Yehova mpe kusala bamambu samu na kuvanda ya kubongama samu na bantangu ya mpasi.

YINKI BETO LENDA SALA SAMU NA KUBONGAMA KANA MBONGO KUMA MPASI?

Kumisa ngolo kidinku ya nge na Yehova: Sepela na yina nge ke na yawu, mpe kulisa kiminu ya nge ti Yehova ke na makoki ya kupesa nge bima yina nge ke na yawu nsatu samu na kilumbu. (Mt 6:26; 1Ti 6:8) Baka mukanu ya kusala ve ata fioti kima ya yimbi na mantwala ya Nzambi samu na kuzwa bima yina nge ke na yawu nsatu. (Ro 2:21) Kanisa na yinki nge ke sala samu na kubika ve kutanga Biblia mpe mikanda ya beto kana ba me zenga courant to internet. Soola mwa mikanda yina lenda vanda kaka na nge mpe kana nge lenda, télécharger bima ya nkaka.

Bongama: Tekila mbongo kuma mpasi, bika kudefa mpe kubebisa ve mbongo. (Bin 22:7) Kana nge lenda, bumba mwa madya mpe bima ya nkaka ya mfunu. Bantu ya nkaka lenda sosa kusala bilanga samu na kubumba mbongo.

TALA VIDEO NGE ME YIDAMA KWANDI SAMU NA BAMAMBU YA MPASI YINA LENDA SALAMA KISIKA NGE KELE? MPE NA MANIMA PESA MVUTU NA BYUVU YAYI:

Mwa bamambu yina ke na video “Nge me yidama kwandi samu na bamambu ya mpasi yina lenda salama kisika nge kele?” Bizizi ya fioti ke na lakisá Biblia, téléphone na saki yina ke na bima yina ba lenda kima na yawu, mpe bampangi yina ke na kisalu ya kutunga bayinzo ya beto.

Yinki mosi na mosi ya beto lenda sala samu na kubongama na bamambu ya mpasi yina lenda salama kisika beto kele?

Your answer

Mwa bamambu yina ke na video “Nge me yidama kwandi samu na bamambu ya mpasi yina lenda salama kisika nge kele?” Bampangi ke na tulá diboko na kisalu ya kutunga, na kusadisa ba yina me kutana na mambu ya mpasi. Ba ke na basisá bima ya kusadila na camion ya nene.

Wa’ faso beto lenda bongama samu na kusadisa bampangi?

Your answer