Lubakusu samu na kulongoka

Simba na ntima “banzimbu ya kimpeve”

Lorraine, mpangi mosi yina ke vandaka na États-Unis me zonza: “Ntangu mu ke vandá na kyadi bilumbu ya nkaka, mu ke talá faso Yehova ke kindisá munu na nzila ya banzimbu yina ke na Tele JW.”

Banda ntama, Bakristo ke sadilá banzimbu samu na kusambila Nzambi. (Kol. 3:16) Kana nge simba banzimbu ya beto na ntima, ya ke sadisa nge ata ntangu nge lenda tanga ve yawu na mukanda to na appareil. Samu na kulenda kusimba banzimbu ya beto na ntima, nge lenda sadila bamambu yayi ke landa.

• Baka ntangu ya kutanga bisoni ya banzimbu samu nge bakula yinki ya zola zonza. Kana nge bakula mbote-mbote yinki nzimbu zola zonza, ya ke vanda ve mpasi na nge na kubambuka na yawu. Nge lenda kuzwa bisoni ya banzimbu ya beto nyonso na jw.org, ya vanda banzimbu ya balukutakanu, banzimbu ya malu-malu mpe banzimbu ya bana. Na kuzwa yawu, kota na Biblioteke, mpe kwenda na kitini Miziki.

• Sonika bisoni ya nzimbu na mukanda. Kusonika bisoni na mukanda ke sala ti nge simba yawu na yintu mpe na ntima ya nge.​—Kul. 17:18.

• Yimba na ndinga ya ngolo. Tanga to yimba nzimbu na ndinga ya ngolo bambala mingi.

• Tala kana nge ke na bambuká na yawu. Meka kuyimba kasi kutala ve bisoni ntangu nge ke yimba, mpe tala kana nge me yimba yawu mbote.