Yinki Biblia ke zonzá samu na bimbevo yina ke mwanganá na yinza nyonso?

Mvutu ya Biblia

Biblia zonzá ti na bilumbu ya mansukina, ya ke vanda na bimbevo ya nene mpe bimbevo yina ke mwangana na yinza nyonso. (Luke 21:11) Nzambi ke filisá ve bimbevo yina samu na kusemba bantu. Mpe na mwa ntangu fioti yandi ke sadila Kimfumu ya yandi samu na kumanisa bimbevo nyonso, mpe bimbevo yina ke mwanganá na yinza.

Biblia zonzá kwandi ti bimbevo yina ke mwanganá na yinza zolá vanda?

Biblia zonzá ve bankumbu ya bimbevo yina ke vanda, mutindu SIDA, grippe espagnole, to COVID-19. Kasi ya zonzá ti ya ke vanda na “bimbevo ya nene” mpe ‘maladi yina ke fwaka.’ (Luke 21:11; Luzabusu 6:8) Bimbevo nyonso yayi ke na kati ya kidimbu ya “bilumbu ya nsuka,’’ to “nsuka ya yinza.”—2 Timote 3:1; Matayi 24:3.

Na ntama, Nzambi sembá kwandi bantu na kupesá bawu bimbevo?

Biblia ke zonzilá mwa bambala yina Nzambi sembá bantu na kusadilá bimbevo. Na kifwani, yandi salá ti ba ya nkaka kuzwa kimbevo ya lepre. (Kutanga 12:1-16; 2 Bamfumu 5:20-27; 2 Bansangu 26:16-21) Kasi ya vandá na bantu nyonso ve. Ya vandá ve mutindu bimbevo ya bubu yayi yina ke na mwanganá na bantu ya mbote mpe ya yimbi. Bimbevo yina bantu yina kuzwá lakisá pwelele ti ba vandá manga kutumama na Nzambi.

Bimbevo yina ke mwanganá na yinza bubu yayi ke kwandi masembo ya Nzambi?

Ve. Bantu mingi ke zonzá ti Nzambi ke filisá bimbevo yina ke mwanganá na yinza mpe bimbevo ya nene samu na kusemba bantu. Kasi ni yina ve Biblia ke zonzaka.

Bisadi ya Nzambi mpe ke kuzwá bimbevo ya nene. Mpe na ntama, ya vandá na bisadi ya Nzambi yina kuzwak’ yawu. Na kifwani Timote, yina vandá ya kukangama na Nzambi, vandá “belaka mbala na mbala.” (1 Timote 5:23) Kasi Biblia zonzá ve ti ya vandá kidimbu yina vandá lakisa ti Nzambi vandá sepela ve na yandi. Bubu yayi mpe bisadi ya kukangama na Nzambi ke kuzwá bimbevo. Bambala ya nkaka ba ke zwá yawu samu ba ke na kisika ya yimbi na ntangu ya yimbi.—Longi 9:11.

Dyaka, Biblia ke longá ti kilumbu yina Nzambi soolá samu na kusemba bantu nabunu ya kuma. Bubu yayi, beto ke na zingá na “kilumbu ya mpulusu”. Ya ke ntangu yina Nzambi ke na bokilá bantu na kukwiza pene-pene na yandi samu ba vuuka. (2 Bakorinto 6:2) Mosi ya bafaso yina yandi ke salak’ yawu ni na nzila ya kisalu ya kusamuna yina bisadi ya yandi ke salá na yinza nyonso, samu na kuzonzila “Nsangu ya mbote [. . .] ya Kimfumu.”—Matayi 24:14.

Ya ke kwandi na kilumbu yina bimbevo yina ke mwanganá na yinza ke manisa?

Ee. Biblia ke zonzá ti na mwa ntangu fioti ata muntu ke bela dyaka ve. Na nzila ya Kimfumu ya yandi, Nzambi ke belusa bantu nyonso yina ke na bimbevo. (Izaya 33:24; 35:5, 6) Yandi ke katula bampasi mpe lufwa. (Luzabusu 21:4) Mpe yandi ke vumbula bantu yina kufwá samu ba zinga na mavimpi ya mbote awa na ntoto yina ke kuma paradiso.—Nkunga 37:29; Bisalu 24:15.

Baverse ya Biblia yina ke zonzilá bimbevo

Matayi 4:23 “Yesu [vandaka] tambula na kinzunga nyonso ya Ngalili, mpe vandaka longisa na bayinzo ya lusambulu ya ba-Zwife. Yandi [vandaka] longisa Nsangu ya Mbote ya Kimfumu, mpe [vandaka] belusa bantu na bimbevo nyonso mpe bifuuma nyonso ya bawu.”

Yinki ya zola zonza: Bimangu yina Yesu salá vandá kaka bifwani ya bamambu yina Kimfumu ya Nzambi ke sala samu na bantu na mwa ntangu fioti.

Luke 21:11: “Bimbevo ya nene ke [vanda] mingi.”

Yinki ya zola zonza: Bimbevo yina ke mwanganá na yinza nyonso ke na kati ya kidimbu ya bilumbu ya nsuka.

Luzabusu 6:8: ‘Munu talaka mpe munu monaka mpunda mosi ya kunzuluka; muntu yina vandaka na zulu ya yawu, nkumbu ya yandi Lufwa. Ndyamu vandaka kulanda yandi pene-pene na manima. Ba pesaka bawu lutumu samu na kufwa bantu na maladi yina ke fwaka.’

Yinki ya zola zonza: Mbikudulu ya binati-mpunda 4 ya buku ya Luzabusu ke lakisá ti bimbevo yina ke mwanganá na yinza zolá vanda na ntangu ya beto.