Beto me kuma kwandi na nsuka ya yinza? Yinki zola zonza Apocalypse?
Ntangu nge ke wá “apocalypse,” yinki ke kwizilá nge na yintu? Ntangu ya nkaka, nge ke kanisá na mambu ya nene mpe ya ngolo mingi yina ke salama na yinza mpe ke kufwa bantu mpe bima nyonso. Bantu ya nkaka ke kanisá ti mambu ya mutindu yayi ke dyaka ve ntama, mingi-mingi ntangu ba ke tangá bansangu mutindu:
“Makanda lenda banda mvita ya minduki ya ngolo ya kulutila (armes nucléaires). Ba lenda sala yawu na nko to ve, to samu ntangu ba ke sololá na bampangi, ba ke zonzá ve bamambu pwelele.”—Bulletin of the Atomic Scientists.
“Bamvula yina me luta, bamambu yayi me lutila na yinza: mipepe ya ngolo, batiya, bisifu ya ngolo, kubebana ya bima ya kitoko yina ke vandá na yinsi ya bamaza, ntangu ya ngolo, mpe bamvula yina ke dyamisá bayinzo.”—National Geographic.
“Na Afrique, bikunku ya nene ya makonko me lutila bamvula yayi.”—The Associated Press.
Ya ke kwandi na mambu ya nene mpe ya ngolo yina ke salama mpe ke mwangisa yinza nyonso? Yinki Biblia ke zonzaka?
Ntoto ke zimbana kwandi?
Ve. Mambu ya Nzambi, Biblia, ke zonzá na beto ti ntoto ke vanda ntangu nyonso. (Longi 1:4) Nzambi ke mwangisa ve ntoto yina yandi yidiká, kasi yandi ke “kufwa bayina ke bebisaka yinza.”—Luzabusu 11:18.
Beto me kuma kwandi na nsuka ya yinza?
Biblia ke lakisá ti “yinza” yina ke kufwa, ni bantu yina ke mangá kulanda misiku ya Nzambi, mpe ke salá bamambu nyonso yina ba zola. Kaka mutindu yandi salak’ yawu na ntangu ya Nowe, Nzambi ke kufwa “bantu yina ke zitisaka ve yandi.”—2 Piere 2:5; 3:7.
1 Yoane 2:17 ke zonzá ti “yinza ke na kuzimbana, mutindu mosi mpe bima nyonso ya yinza yina bantu ke zolaka.” Verse yayi ke lakisá ti Nzambi ke mwangisa ve ntoto, kasi yandi ke kufwa bantu yina ke salá bamambu ya yimbi.
Na wapi ntangu nsuka ya yinza ke kuma?
Biblia ke zonzá ve pwelele na wapi ntangu nsuka ya yinza ke kuma. (Matayi 24:36) Kasi ya ke lakisá ti nsuka ya yinza ke dyaka ve ntama. Biblia zonzá ti bamambu yayi ke salama:
Bamvita, bansatu, bimbevo yina ke mwangana na bisika mingi, mpe kuningana ya ntoto ya ngolo “na bisika ya mutindu na mutindu.”—Matayi 24:3, 7, 14, nwt-MK; Luke 21:10, 11; Luzabusu 6:1-8.
Bantu mingi ke kuma na munimi ya kulutila. Na kifwani, ba ke “zola mbongo,” “ke pesa ve matondo,” mpe “ke lenda ve na kukutika banzutu ya bawu.”—2 Timote 3:1-5.
Bantu mingi me kwiza ndima ti banda 1914, bamambu yina Biblia zonzá ke na lunganá na yinza, mpe ti nsuka ya yinza ke dyaka ve ntama. Na kuzaba mingi, tala “Que révèle la chronologie de la Bible sur l’année 1914?” mpe “Quel est le signe des « derniers jours »?”
Yinki Biblia ke bokilá “apocalypse”?
Na ndinga ya Greke “apocalypse” yina Biblia ke zonzilá zola zonza “kubasisa” to “kuzabisa.” Bantangu ya nkaka, ba ke sadilak’ yawu samu na kuzonza mambu yina vandá ya kubumbana, mpe ba me basisa yawu. Biblia ke zonzilá mpe ‘kutalana ya Mfumu Yesu.’ Mambu yayi ke salama ntangu Yesu ke zabana mutindu muntu yina ke na ngolo ya kukatula bamambu nyonso ya yimbi na ntoto, mpe kufuta ba yina ke sadilá Nzambi.—2 Batesalonika 1:6, 7; 1 Piere 1:7, 13.
Buku ya nsuka ya Biblia ke na nkumbu ya Apocalypse, to Luzabusu, samu ya ke zonzilá bamambu yina ke salama na mantwala. (Luzabusu 1:1) Buku yina ke na bansangu ya mbote, mpe yina ke pesá kivuvu. (Luzabusu 1:3) Ya ke lakisá ti Nzambi ke katula bamambu nyonso ya yimbi, mpe ke kumisa ntoto paradiso. Na ntangu yina, bantu ke tala dyaka ve bampasi, mpe ata lufwa ke vanda dyaka ve.—Luzabusu 21:3, 4.
Nge ke na nsatu ya kuzaba dyaka bamambu ya kitoko yina Biblia ke zonzá samu na bilumbu yina ke kwiza? Bambangi ya Yehova ke vanda na kilengi ya kulongoka Biblia na nge, ya mpamba. Kuvingila ve na kusonikila bawu.