**Ya ke kwandi na kilumbu yina terrorisme ke manisa?**

Na manima ya mambu ya yimbi yina ba terroristes me sala, nge lendá yufula: ‘Yinki ya ke salá Nzambi na kutala bamambu yayi? Samu na yinki bamambu yayi ke salamaka? Ya ke kwandi na kilumbu yina terrorismea ke manisa? Wa’ faso mu lenda kuzwa kizunu ya ntima?’ Biblia ke pesá bamvutu ya kitoko na byuvu yayi.

Yinki ya ke salá Nzambi na kutala terrorisme?

Nzambi ke yiná bamambu ya ngolo mpe terrorisme. (Nkunga 11:5; Bingana 6:16, 17) Mpe Yesu muntu yina Nzambi filisá, sembá bilandi ya yandi ntangu ba salá mambu ya ngolo. (Matayi 26:50-52) Ata bantu ya nkaka ke zonzá ti ba ke salá yimbi na nkumbu ya Nzambi, ni Nzambi ve muntu ke tumisá bawu na kusala yawu. Mpe yandi ke kuwá ata fioti ve balusambu ya bawu.—Izaya 1:15.

Nzambi ke na mawa ya bantu nyonso yina ke talá mpasi. Ya zola zonza ti yandi ke mpe na mawa samu na ba yina talá mpasi samu na bamambu yina ba terroristes salaka. (Nkunga 31:7; 1 Piere 5:7) Biblia ke lakisá mpe ti Nzambi ke manisa bamambu nyonso ya ngolo.—Izaya 60:18.

Mambu yina ke natá bantu na kusala terrorisme

Biblia ke lakisá mambu yina ke natá bantu na kusala terrorisme. Ya ke zonzaka: “Muntu me yalaka muntu [samu] na kupesa yandi mpasi.” (Longi 8:9) Banda ntama, bantu yina ke na lutumu me sadila bamambu ya ngolo samu na kunyokola bampangi. Ba yina ba vandá nyokola me sadila mpe terrorisme samu na kuvutula yimbi yina ba vandá sala bawu.—Longi 7:7.

Terrorisme ke manisa

Nzambi pesá nsilulu ti yandi ke katula bamambu ya ngolo, mpe bamambu yina ke pesá bantu boma, mpe yandi ke sala ti kizunu vanda na ntoto. (Izaya 32:18; Mika 4:3, 4) Yandi ke:

Katula mambu yina ke natá bantu na kusala terrorisme. Nzambi ke katula bimfumu ya bantu awa na ntoto. Na kisika ya yawu, yandi ke tula kimfumu mosi yina ke yala ntoto nyonso. Yesu Kristo, Mfumu ya Kimfumu yina, ke bakila bantu nyonso mutindu mosi, mpe yandi ke katula bantu yina ke nyokolá bampangi mpe ke salá bamambu ya ngolo. (Nkunga 72:2, 14) Na ntangu yina, ata muntu ke sala dyaka terrorisme. Bantu ‘ke wa kyese ya mingi na ngemba ya mingi.’—Nkunga 37:10, 11.
Yidika bamambu nyonso yina terrorisme me nata. Nzambi ke belusa bantu na bamputa yina ba kuzwá na nzutu to na ntima samu na terrorisme. (Izaya 65:17; Luzabusu 21:3, 4) Yandi ke vumbula ata bantu yina kufwá, samu ba zinga na kizunu awa na ntoto.—Yoane 5:28, 29.

Biblia ke zonzilá yinki ke lakisá ti ntangu yina Nzambi ke sala bamambu yayi me kuma pene-pene. Kasi nge lenda yufula: ‘Samu na yinki Nzambi nabunu yandi katula terrorisme?’ Samu na kuzwa mvutu, tala video Pourquoi Dieu permet-il les souffrances ?

a “Terrorisme” zola zonza kusala bamambu ya ngolo mpe ya yimbi mingi na bantu ya mpamba, samu na kupesa bantu boma mpe kunata ba yina ke na lutumu na kusoba bamambu na bwala, to na mutindu ba ke bakilá mabuundu ya nkaka. Ntangu ya nkaka ba terroristes ke pesá bantu boma kaka na kukebisá bantu na bamambu yina ba lendá sala.

Biblia ke sadisá bantu na kuzwa ngolo na kati ya bampasi

Malongi zole yayi ya Biblia lenda sadisa nge.

Kusambila Nzambi.—Bafilipi 4:6, 7.
Kukanisa mingi na kivuvu yina Biblia ke pesaka.—Baebre 6:19.

Samu na kuzwa malongi ya nkaka ya Biblia, tanga “Comment ne pas vous laisser submerger par l’inquiétude.”

Bambangi ya Yehova yina talá mpasi samu na terrorisme kuzwá mpe lubakusu ya bampangi ya bawu bakristo. Tala bifwani zole yayi:

Natalya na mwana ya yandi ya bakala ya bamvula 9 Aslan vandá na l’école mosi na Beslan na bwala ya Russie ntangu ba terroristes kotá mpe kangá bantu kuluta 1 000 kuna. Mambu ya kyadi ke ti bantu mingi kufwá, mingi-mingi bana. Natalya na Aslan vuukaka. Kasi mambu yina vandá kwamisa kaka makanisi ya bawu na kati ya bantangu mingi. Tala yinki sadisá bawu na kuzwa ngolo na manima.
Pablo na sophie fwidilá mwana ya bawu ya bakala ntangu ba terroristes mwangisá ba tours jumelles na New York. Na video yayi, tala yinki sadisá bawu mpe bantu ya nkaka yina talá mpasi na manima ya bamambu yina ba terroristes salaka.