Ba me tula Yesu kristo Mfumu ya Kimfumu ya Nzambi

Kimfumu ya Nzambi ke yinki?

Mvutu ya Biblia

Kimfumu ya Nzambi ke luyalu yina Yehova Nzambi me tula na zulu. Biblia ke bokilá mpe “Kimfumu ya Nzambi” “Kimfumu ya mazulu,” samu ti ya ke yala katuka na zulu. (Marke 1:14, 15; Matayi 4:17, NM) Ata ti bamambu ya nkaka ya Kimfumu ya Nzambi ke faso mosi na ya Bimfumu ya yinza yayi, kasi ya me lutila yawu na bamambu nyonso.

Ba yina ke yala kuna. Yehova tulá Yesu Kristo mfumu ya kimfumu ya Nzambi mpe pesak’ yandi kimfumu mpe lulendo ya kulutila bamfumu nyonso. (Matayi 28:18) Yesu ke sadilá lulendo ya yandi kaka samu na kusala mambu ya mbote, samu ti yandi ke Mfumu ya mbote mpe ke wá mawa ya bantu. (Matayi 4:23; Marke 1:40, 41; 6:31-34; Luke 7:11-17) Na lutwadusu ya Nzambi, Yesu me soola bantu ya ba yinsi nyonso samu ba “yala yinza nyonso” na yandi ya zulu.—Luzabusu 5:9, 10.
Bamvula yikwa ya ke sala. Kimfumu ya bantu ke ya ntangu fioti, na manima bantu ya nkaka ke baka kimfumu, kasi kimfumu ya Nzambi “ke kufwa ata fioti ve.”—Danyele 2:44.
Bantu yina ke vanda kuna. Ba yina ke zitisak’ misiku ya Nzambi mpe ke salá mambu ya kulunga, ni bawu muntu ke vanda na kimfumu ya Nzambi, ata ti ba ke ve faso mosi to ke ve bantu ya bwala mosi.—Bisalu 10:34, 35.
Misiku. Misiku ya kimfumu ya nzambi ke niminá ve kaka mambu ya yimbi, ya ke salá ti bantu yina ke vanda na kimfumu yango vanda na bifu ya mbote. Na kifwani, Biblia ke zonzaka: “‘Nge fwana kuzola Mfumu Nzambi ya nge na ntima ya nge nyonso, na mwela ya nge nyonso, mpe na mayela ya nge nyonso.’ Ni musiku yina me lutila nene mpe mfunu. Musiku ya zole yayi kele mfunu mutindu mosi na musiku ya ntete.Ya ke tubaka, ‘Nge fwana kuzola mpangi ya nge mutindu nge mosi.’” (Matayi 22:37-39) Luzolo samu na Nzambi mpe samu na bampangi ke natá bantu yina kimfumu ya Nzambi ke yala na kutula bansatu ya bampangi na kisika ya ntete.
Malongi. Kimfumu ya Nzambi me suka ve kaka na kupesa bantu yina ya ke yala misiku, kasi ya ke lakisá mpe bawu yina ba lenda sala samu na kulanda yawu.—Izaya 48:17, 18.
Kisalu ya yawu. Kimfumu ya Nzambi ke sala ve ti ba yina ke yala yawu vanda na bimvwama, samu bantu ya nkaka tala mpasi. Kisalu ya yawu ni kulungisa nsilulu yina me zonza ti bantu yina ke zolá Nzambi ke zinga ntangu nyonso na ntoto yina ke kuma paradiso.—Izaya 35:1, 5, 6; Matayi 6:10; Luzabusu 21:1-4.