Nzambi zola mu sala yinki na luzingu ya munu?

Mvutu ya Biblia

Nzambi zola beno zaba kimuntu ya yandi, beno zola yandi mpe beno kuma bandiku ya yandi. (Matayi 22:37, 38; Yoane 4:8) Beno lenda longoka wa’ faso beno lenda sala mambu yina Nzambi ke zolá kana beno teka dikebi na malongi mpe na luzingu ya Yesu. (Yoane 7:16, 17) Yesu vandá suká ve kaka na kuzonza bamambu yina Nzambi vandá zolá, kasi na luzingu ya yandi nyonso yandi vandá sadila yawu. Ni na yawu yandi zonzá “mu katukaka na zulu samu na kusala luzolo ya Tata yina fidisaka munu, kasi luzolo ya munu mosi ve.”—Yoane 6:38.

Mu ke kwandi na nsatu Nzambi bokila munu, yandi lakisa munu kimona meso to yandi pesa munu kidimbu samu na kuzaba yina yandi me zola samu na munu?

Ve, samu ti na kati ya Biblia ke na bansangu yina Nzambi tulá samu na bantu. Ya lenda sadisa beno na “kuvanda ya kulunga samu na kusala konso kisalu ya mbote.” (2 Timote 3:16, 17) Nzambi me zola ti beno tanga Biblia samu ya sadisa beno na “kubakula mambu” yina yandi me zola samu na beno.—Baroma 12:1, 2; Baefeze 5:17.

Mu ke lenda kwandi kusala mambu yina Nzambi me zola?

Ee, nge ke lenda, samu Biblia me zonza ti: ‘Misiku ya Nzambi kele mpasi ve samu na beto.’ (1 Yoane 5:3, ngwisani ya malu-malu) Ya zola zonza ve ti ya ke mambu ya pete na kutumama ntangu nyonso na misiku ya Nzambi, kasi bambote yina beto ke kuzwa me lutila mingi bangolo yina beto ke sala. Yesu yandi mosi zonzá: “kyese na bantu yina ke kuwaka Mambu ya Nzambi mpe ke sadilaka yawu!”—Luke 11:28, ngwisani ya malu-malu.