Mukristo lenda ndima kwandi kubaka manganga ntangu yandi ke belaka?
Mvutu ya Biblia
Ee. Yesu ndimá ti bilandi ya yandi me lunga kubaka manganga kana ba ke na belá ntangu yandi zonzá “Bantu ya mavimpi ya mbote kele ve na nsatu ya dokotolo, kasi ni bambevo kele na nsatu ya yandi.” (Matayi 9:12) Ata ti Biblia ke ve buku yina lenda belusa bimbevo, ya ke pesá malongi yina ke natá beto na kusala bamambu yina Nzambi ke zolaka.
Byuvu yina nge lenda yufula nge mosi
1. Mu zaba kwandi mbote-mbote wapi manganga ba na sosá kupesa munu? Biblia ke longá beto na kusosa kuzaba mbote-mbote bamambu yina me tadila traitement yina beto ke baka, kasi ‘kundima ve na mbangu mambu nyonso.’—Bingana 14:15.
2. Mu lenda kwenda tala kwandi ba dokotolo ya nkaka samu na kusosa kuzaba dyaka mingi? Malongi ya “bandongisi mingi” lenda sadisa beto mingi ntangu bimbevo ya beto ke ngolo.—Bingana 15:22.
3. Manganga yina mu ke baka ke kwandi ya kukwelana na musiku ya Biblia yina me zonza ti beto “kudya ve to sadila ve . . . menga”?—Bisalu 15:20.
4. Ba ke sadila kwandi bunganga samu na kuzaba yinki ke na munu to samu na kubelusa munu? Biblia ke niminá “kusadila bunganga.” (Bagalate 5:19-21) samu na kuzaba kana ba ke sadila bunganga, teka dikebi na byuvu yayi:
Muntu yina ke sadisa munu ke sadilá bunganga?
Ntangu ba ke na belusá beto, ba me zonza na beto ti ni banzambi to bantu yina ke zolá ve beto ke na sadilá bundoki samu beto bela?
Ba ke sadila kwandi minkayulu, biteki, banzimbu to bima ya nkaka yina ke na bunganga na kati samu na kuyidika manganga yina mu ke baka to samu na faso yina mu ke baka yawu?
5. Na yina me tadila mavimpi ya munu, mu ke kwandi na manyongo ya kulutila? Biblia ke longá beto ti: “Lembani ya beto fwana kuzabana na bantu nyonso.” (Bafilipi 4:5) Kutala bamambu na faso ya mbote ke sadisa beto na kubakula “mambu ya mfunu,” mutindu bamambu ya kimpeve.—Bafilipi 1:10; Matayi 5:3.