Nsangu ya mbote: disolo ya kisalu ya Yesu—Kisalu ya ngolo yina ke talanaka ve

Kubasika ya kitini ya ntete ya film Nsangu ya mbote: Disolo ya kisalu ya Yesu, ke mosi ya bamambu ya mfunu yina Bambangi ya Yehova vanda vingila mvula yayi. Ba millions ya bantu me tala yawu. Kasi yayi ke kaka ni kubanda samu ti film yayi, ke na bitini 18! Yinki bampangi ya kento na ya bakala me sala samu beto kuzwa bavideo nyonso yayi, mpe wapi mutindu beto ke na tulaka diboko na kisalu yayi?

Faso ba ke na kipeke bampangi yina ke na salaka na film

Bitini mingi ya film Nsangu ya mbote ke na salamaka na filiale ya Australasie.a Bantu 50 tii na 80 ke na salaka na kisika yina ba ke na bongisaka konso kitini ya film. Ba ke na pesaka bawu madya ya midi, ya nkokila mpe na mwa bima ya fioti-fioti ya kudya. Bilumbu mingi na mantwala, ba ke na bongisaka mbote-mbote madya yina bampangi ke kudya. Esther yina ke salaka na service ya madya, me zonza: “Beto ke sumbaka bima mingi ya kudya na bantu mingi, samu na kuzwa bima ya mbote na lutangu ya mbongo ya kulunga. Samu na kubebisa ve madya, beto ke sosaka kuzaba lutangu ya bantu samu ya sadisa beto na kuzaba yinki ya kulamba konso kilumbu.” Beto ke basisaka 2 400 FCFA konso kilumbu, samu na kudya ya muntu mosi.

Bampangi yina ke na salaka, ke ve kaka na nsatu ya madya kasi ke mpe na nsatu ya kubumba nzutu. Wapi mutindu? Na Australie, bantangu ya ngolo ke vandaka bilumbu mingi. Kasi bantangu yango ya ngolo ke vandaka ve mbote samu na mavimpi. Samu na kubika ve ti bampangi vanda na yisi ya ntangu, bampangi yina ke sadisaka na production ke salaka bangolo samu na kubongisa bisika samu bampangi kuzwa mwa madidi, bima yina lenda bumba bawu na ntangu, mpe maza ya kunwa. Kevin, yina ke salaka na audio/video me zonza: “Mingi na kati ya bampangi yina ke sadisaka na production ke vandaka ve na Betele. Kasi ba ke kwizaka samu na kupesa diboko. Ba ke na salaka kisalu yayi mpe mingi ya nkaka na kilengi mpe kukuluka nyonso. Kana bampangi yayi ve, beto zola lenda ve kulungisa kisalu yayi.”

Kana film ke na salamaka ve na Betele

Bitini ya nkaka ya film ke bonga ve kana ba sala yawu na Betele. Ni na yawu, ba me lunga kukwenda ntama. Na kifwani, samu na kukotisa na film bisika yina ke na Biblia, bampangi me lunga kukwenda na bisika ya kubumbana yina ke ve na bansinga ya courant, banzila ya goudron to bayinzo ya bubu yayi. Bima mutindu bilele mpe bima nyonso yina ba ke vanda na yawu nsatu samu na kusadila, ba me bonga kukutika yawu mbote-mbote, kunata yawu na kisika yina ba ke na salaka film mpe kubumba yawu na kisika ya mbote. Tekila ba banda kusala konso kitini ya film, bampangi yina ke twadisaka na kisalu ya production ke sosaka ntete kubongisa bima yina ke nataka courant, maza ya kunwa ya mbote mpe ba toilettes. Samu na kulutisa mpimpa, bampangi yina ke na salaka ke na lalaka na ba camion ya nene, na hôtel to na bampangi ya nkaka yina ke vandaka na kisika yina.

Kana film ke na salamaka ve na Betele, ya ke lombaka mbongo, ntangu mpe bangolo mingi na konso muntu yina ke na salaka. Ni na yawu na 2023, Kimvuka ya Bantwadisi ndimaka ti ba sumba écran mosi ya nene na lutangu ya mbongo pene-pene na 1 milliard mpe 500 millions ya ba FCFA. Écran yango ke kwizaka na ba écrans ya fioti yina ke basisaka bizizi mbote-mbote mpe na mutindu yina lenda sala ti bavideo talana mutindu ba me sala yawu na kisika ya nkaka. Na yawu, ya me sala ti beto basisa dyaka ve mbongo mingi samu na kukwenda sala film na bisika ya nkaka. Darren, mpangi mosi ya filiale ya Australasie me zonza: “Mutindu ya kusala yina, lenda sala ti bampangi yina ke na salaka lemba ve mpe ya ke sadisa na kuzwa bizizi mingi mpe na manima, kusoola kizizi ya mbote. Na kifwani, kana beto ke na ngaanda mpe beto ke na sosaka kuzwa kizizi ya ntangu yina ke na kotaka, beto ke vanda kaka na mwa baminiti fioti samu na kuzwa yawu. Kasi écran ya nene yayi lenda sadisa beto na kuzwa bizizi mingi ya ntangu yina ke na kotaka tii beto ke kuzwa kizizi yina me lutila kubonga.”

“Ya ke na talanaka mutindu munu me pesa ata kima”

Samu na kusala konso kitini ya film Nsangu ya mbote, ya ke na lombaka bantu mingi mpe bantu mingi ya kulutila samu na kisalu ya production. Yinki ya ke na salaka bampangi na kutala nyonso yina dikanda ya Betele ke na salaka samu na kukipe bansatu ya bawu?

Amber, yina me katuka na Melbourne, me sala ba kilomètres kuluta 700 samu na kutula diboko na kisalu yayi. Yandi me sonika: “Ntangu mu kumaka na aéroport, bampangi ya Betele kipeke munu. Mingi na kati ya bawu bokilaka munu samu na kudya na bawu to na kunwa maza ya tiya. Na kisika yina beto vanda sala film, bampangi vanda sala nyonso samu na kulakisa munu luzolo ya bawu. Nzyetolo ya munu me natina munu bambote mingi mpe ya ke na talanaka mutindu munu me pesa ata kima!”

Derek yina ke salaka na production me zonza: “Bampangi mingi me sadisa banda kisalu yayi bandaka! Mu ke na vutulaka matondo na yina mu ke na salaka kintwadi na bampangi ya kento na ya bakala yina me pesa ntangu, bima, mpe bangolo ya bawu samu na kisalu yayi. Ba ke na sadisaka beto, ba ke na pesaka ntangu ya bawu mpe ba ke na ntima ya mbote. Ya ke na talanaka pwelele ti Yehova ke na sakumunaka beto nyonso. Mu ke na ndimaka ti yandi ke ve kaka na sepelaka na kutala mutindu kisalu ke na kwendaka, kasi mpe na mutindu yina beto ke na lungisaka yawu.”

Beto ke na tondaka beno na mutindu yina beno ke na tulaka diboko na kisalu yayi na nzila ya makabu yina beno ke na pesaka, ya vanda mpe yina beno ke na salaka na nzila ya donate.jw.org.