Wapi yina kele nsangu ya mbote samu na mabundu?

1. Mambundu nyonso kele ya mbote?

Na mabundu nyonso, bantu ya ntima mbote kele. Nsangu ya mbote kele ti Nzambi ketalaka bantu yango mpe yandi kekubanzaka samu na bau. Kansi diambu ya kiadi, banda ntama bakesadilaka mabundu samu na kusala mambu ya yimbi. (2 Bakorinto 4:3, 4; 11:13-15) Balapolo yina bamuangisi-nsangu kepesaka kena lakisa ti mabundu ya nkaka kena kukota ata na mambu mutindu terorisme, kufua bantu ya dikanda mosi, bamvita mpe kubebisa bana. Yakepesaka kiadi mingi na bantu yina kendiminaka Nzambi na ntima mosi!​—Tanga Matayi 24:3-5, 11, 12.

Dibundu ya kedika kekumisaka Nzambi, kansi mabundu ya luvunu kefingisaka nkumbu na yandi. Yau kelongaka bangindu yina kele na Biblia ve, na kifuani malongi ya luvunu samu na Nzambi mpe bantu ya kufua. Kansi Yehova zola ti bantu zaba kedika na diambu metadila yandi.​—Tanga Ezekiele 18:4; 1 Timote 2:3-5.

2. Wapi yina kele nsangu ya mbote samu na mabundu?

Diambu ya kiese kele ti Nzambi kevunukaka ve na mabundu yina ketubaka ti yau kezolaka yandi, kansi yau kezolaka ni yinza ya Satana. (Zaki 4:4) Mpova ya Nzambi mebokidila mabundu nyonso ya luvunu “Babilone ya Nene.” Babilone vuandaka mbanza mosi ya ntangu ya ntama, kisika nsambudulu ya luvunu bandilaka na manima ya Nkuka ya maza na ntangu ya Noa. Fioti kaka mebikana, Nzambi kesukisa na mbala mosi mabundu nyonso kevunaka bantu mpe keniokolaka bau.​—Tanga Luzabusu 17:1, 2, 5, 16, 17; 18:8.

Bansangu ya nkaka ya mbote kele ti Yehova zimbakana ve bantu ya ntima ya mbote yina kele na kati ya mabundu ya luvunu na yinza mvimba. Yandi kena kuvukisa bantu yango na mutindu yandi kena kulonga bau kedika.​—Tanga Mika 4:2, 5.

3. Yinki bantu ya ntima ya mbote fuana sala?

Yehova kekubanzaka samu na bantu yina kezolaka kedika mpe mambu ya mbote. Yandi kena lomba bau babasika na mabundu ya luvunu. Bantu yina kezolaka Nzambi kendimaka kuviluka samu na kuyangidika yandi.​—Tanga Luzabusu 18:4.

Na ntangu ya baklisto ya ntete, ntangu bantu ya ntima ya mbote kuwaka nsangu ya mbote na bantumua, bayambaka yau na kiese. Yehova longaka bau mutindu ya malumalu ya kutuadisila luzingu na bau, luzingu mosi ya kiese, yina kele na mfunu mpe na kivuvu. Bau kele kifuani ya mbote samu na beto bubu yayi, samu bau ndimaka nsangu ya mbote na mutindu batulaka Yehova na kisika ya ntete na luzingu ya bau.​—Tanga 1 Batesalonika 1:8, 9; 2:13.

Na dibuta ya bansambidi na yandi, Yehova keyambaka bayina nyonso kena kubika mabundu ya luvunu. Kana nge mendima mbokila ya Yehova, nge kekuma nkundi na yandi, nge kekota na dibuta ya malumalu ya bansambidi ya Yehova bayina kezolanaka, mpe nge kezua luzingu ya mvula na mvula.​—Tanga Marke 10:29, 30; 2 Bakorinto 6:17, 18.

4. Wapi mutindu Nzambi kepesa bantu ya makanda nyonso kiese?

Kuzaba ti yamebikana kaka fioti Nzambi sambisa mambundu ya luvunu kele nsangu ya mbote. Yau kemanisa bampasi nyonso na yinza mvimba. Mambundu ya luvunu kezimbisa diaka bantu nzila ve mpe yau kekabula bau diaka ve. Bantu nyonso yina kevuanda na luzingu kevukana na nsambudulu ya Nzambi kaka mosi ya kedika.​—Tanga Luzabusu 18:20, 21; 21:3, 4.