Yiki nge ke kanisaka samu na bilumbu yina ke kwiza?

YINA BIBLIA KE ZONZAKA

“Nzambi . . . ke kusuna mansangasa nyonso yina kele na meso na bawu. Bantu ke kufwa dyaka ve, ke vwanda dyaka ve na mawa, ke dila dyaka ve, to ke tala dyaka ve mpasi, samu ti mambu nyonso ya yinza ya ntama ke zimbana.”​—Luzabusu 21:3, 4, Ngwisani ya malu-malu.

MAMBU YA MBOTE YINA NGE LENDA KUZWA

Nge lenda kuzwa kisalu ya nsayi mpe ya mfunu.​—Izaya 65:21-23.

Bimbevo na bampasi ya mutindu nyonso ke vwanda dyaka ve.​—Izaya 25:8; 33:24.

Nge lenda kuzwa luzingu ya nsayi mpe ya ntangu nyonso na dikanda mpe na bandiku ya nge.​—Nkunga 37:11, 29.

BETO FWANA KWIKILA MAMBU BIBLIA KE ZONZAKA?

Ee, samu na bamambu ata zole:

• Nzambi kele na ngolo ya kulungisa lukanu yayi. Na Biblia, kaka Yehova Nzambi yandi mosi ba mebokila “Yina kele na Ngolo Nyonso,” samu yandi kele na ngolo yina ke sukaka ve. (Luzabusu 15:3) Na yina, yandi lenda kulungisa lukanu ya yandi ya kubongisa inza yayi nyonso. Mutindu Biblia ke zonzaka yawu, “na Nzambi mambu nyonso lenda kusalama.”​—Matayi 19:26.

• Nzambi kele na nsatu mingi ya kulungisa lukanu yayi. Na kifwani, Yehova kele “na nsatu mingi” ya kuvumbula bantu ya kufwa.​—Yobi 14:14, 15.

  Biblia ke lakisaka dyaka ti Yesu, mwana ya Nzambi, nyakisaka bambevo. Samu na yiki yandi vwandaka kusala mutindu yina? Samu yandi vwandaka kuzola yawu. (Marke 1:40, 41) Mutindu Tata na yandi, Yesu vwandaka na nsatu mingi ya kusadisa bantu yina vwandaka na nsatu ya lusalusu.​—Yoane 14:9.

  Na yina, beto fwana kukwikila ti Yehova na Yesu zola kubakisa beto na kuzwa na mantwala luzingu ya nsayi!​—Nkunga 72:12-14; 145:16; 2 Piere 3:9.