Yinki yina Kimfumu ya Nzambi?

BIBLIA METUBA MUTINDU YAYI

“Nzambi ya dizulu ketula kimfumu mosi yina kesala bebisama ve.”​—Danyele 2:44, Traduction du monde nouveau.

“Nzambi mepesa beto mwana ya bakala! Yandi yina muntu tayalaka beto.”​—Izaya 9:5, La Bible en Kituba (Kikongo ya Leta).

YAU KELE MBOTE SAMU NA NGE

• Yakele na luyalu mosi ya lunungu yina lenda natina nge mambote banda bubu yayi.​—Izaya 48:17, 18.

• Na yinza ya yimpa yina kena kuiza, nge kezinga na mavimpi ya mbote mpenza mpe na kiese.​—Luzabusu 21:3, 4.

BETO FUETI NDIMINA MPENZA YINA BIBLIA KETUBAKA?

Ee, ata samu na mambuzole kaka:

• Yesu monisaka yina Kimfumu ya Nzambi kesala na bilumbu kena kuiza. Yesu longaka balongoki na yandi basambilaka samu Kimfumu ya Nzambi kuiza mpe luzolo na yandi yasalama na ntoto. (Matayi 6:9, 10) Yesu monisaka mutindu kisambu yango kekokisama.

  Ntangu Yesu vuandaka awa na ntoto, yandi dikilaka bantu ya nsatu, yandi vukisaka bimbevo, mpe yandi futumunaka bantu yakufua! (Matayi 15:29-38; Yoane 11:38-44) Lokola yandi vuandaka muntu yina fueti vuanda Mfumu na Kimfumu ya Nzambi, Yesu monisaka na bunkufi yina Kimfumu ya Nzambi kesala samu na bantu.​—Luzabusu 11:15.

• Mambu yina kena luta na yinza memonisa ti Kimfumu ya Nzambi zola kuiza. Yesu samunaka ti tekila Kimfumu ya Nzambi natina bantu kiyenge na ntoto, yinza ya beto fueti vuanda na bamvita, bansatu mpe kuningana ya ntoto.​—Matayi 24:3, 7.

  Yau kele mambu beto kena mona bubu yayi. Na yau, beto lenda tula kivuvu ti ntama mingi ve, Kimfumu ya Nzambi kesukisa mpasi nionso yina.