Adami na Eva tumamaka ve na Nzambi

Kilumbu mosi ntangu Eva vandaka yandi mosi, nyoka sololaka na yandi mpe zonzaka: ‘Ya ke kwandi ya tsyeleka ti Nzambi niminaka beno na kudya bambuma ya bayinti nyonso?’ Eva vutulaka: ‘Beto lenda kudya bambuma ya bayinti nyonso, katula kaka mosi. Kana beto kudya mbuma ya yinti yina, beto ke kufwa.’ Nyoka bwelaka: ‘Beno ke kufwa ve. Samu, kana beno kudya mbuma ya yinti yina, beno ke kuma faso Nzambi.’ Mambu yayi vandaka kwandi ya tsyeleka? Ve, ya vandaka luvunu. Kasi Eva ndimaka bamambu yina nyoka zonzaka. Eva bikaka ve kutala mbuma yina tii ntangu yandi kumaka na nsatu ya yawu. Yandi kudyaka mbuma yango mpe pesaka yawu na Adami. Adami zabaka ti kana ba tumama ve na Nzambi ba ke kufwa. Kasi ata faso yina, yandi kudyaka mbuma yina ba niminaka bawu.

Na manima, kaka kilumbu yango, Yehova sololaka na bawu. Yandi yufulaka bawu samu na yinki ba tumamaka ve na yandi. Eva zonzaka ti ya vandaka foti ya nyoka, mpe Adami zonzaka ti ya vandaka foti ya Eva. Samu Adami na Eva tumamaka ve na Yehova, yandi bingisaka bawu na bilanga ya Edeni. Samu ba vutuka dyaka ve kuna, Yehova tulaka bambazi mpe mbele ya yinda ya tiya na kisika ya kukotila na bilanga ya Edeni.

Yehova zonzaka ti yandi ke pesa kitumbu na muntu yina vunaka Eva. Ya vandaka ve ni nyoka muntu vanda solola na Eva. Yehova yidikaka ve nyoka na makoki ya kuzonza. Ya vandaka ni mbazi mosi ya yimbi muntu vanda zonza na nzila ya nyoka. Yandi salaka yawu samu na kuvuna Eva. Ba ke bokilaka mbazi yango Satana Dyabulu. Na bilumbu yina ke kwiza, Yehova ke kufwa Satana samu yandi lenda dyaka ve kuvuna bantu mpe kunata dyaka ve bawu na kusala bamambu ya yimbi.