Yehova me solola na Samuele

Eli nganga-nzambi ya nene vandaka na bana zole ya babakala yina vandaka banganga-nzambi na tabernakle. Bankumbu ya bawu vandaka Hofni na Fineasi. Ba vanda tumamaka ve na misiku ya Yehova mpe vanda bakilaka bantu na mutindu ya yimbi. Ntangu bana ya Izraele vanda nataka minkayulu na Yehova, Hofni na Fineasi vanda bakaka kitini ya kulutila mbote ya kibulu samu na bawu mosi. Eli vanda kuwaka mambu yina bana ya yandi vanda salaka, kasi yandi salaka ata kima. Yehova zola bika kwandi ti mambu vanda kaka faso yayi?

Ata ti Samuele vandaka mwana ya fioti na mantwala ya Hofni na Fineasi, yandi landaka ve kifwani ya bawu. Yehova vanda sepelaka na Samuele. Kilumbu mosi na mpimpa ntangu yandi vanda lala, Samuele kuwaka ndinga mosi vanda bokila yandi. Yandi telamaka mpe kwendaka na mbangu na sika ya Eli, mpe zonzaka: ‘Munu yandi yayi!’ Kasi Eli vutulaka: ‘Mu me bokila ve nge. Kwenda lala.’ Samuele vutukaka na mfulu. Na manima yandi kuwaka dyaka ndinga yango. Ntangu Samuele kuwaka dyaka yawu na mbala ya tatu, Eli kwizaka zaba ti ya vandaka ni Yehova. Yandi zonzaka na Samuele ti kana yandi kuwa dyaka ndinga yina, yandi me bonga kuzonza: ‘Zonza Yehova. Kisadi ya nge ke na kuwaka.’

Samuele vutukaka na mfulu. Na manima yandi kuwaka: ‘Samuele! Samuele!’ Yandi vutulaka: ‘Zonza, samu kisadi ya nge ke na kuwaka.’ Yehova zonzaka na yandi: ‘Zonza na Eli mu ke semba yandi na dikanda ya yandi. Yandi zaba ti bana ya yandi ke na kusalaka mambu ya yimbi na kati ya tabernakle, kasi yandi ke na salaka ata kima.’ Na suka ya kilumbu yina landaka, Samuele vanda fungula bamwelo ya tabernakle kaka mutindu yandi vandaka na kifu ya kusalaka yawu. Yandi vandaka na boma ya kuzonza na nganga-nzambi mambu yina Yehova zonzaka. Kasi Eli bokilaka Samuele mpe yufulaka yandi: ‘Mwana ya munu, yinki Yehova me zonza na nge? Zonza na munu mambu nyonso.’ Na yawu, Samuele zonzaka na Eli mambu nyonso.

Samuele vanda kula mpe Yehova vandaka ntangu nyonso na yandi. Na Izraele nyonso, bantu zabaka ti Yehova soolaka Samuele na kuvanda mbikudi mpe zuzi.