Benda bileso na kifwani ya luzingu ya Samuele

Samuele vandá ya kukangama na Yehova luzingu ya yandi nyonso. Ntangu yandi vandá ntwenya, yandi mangá kulanda kifwani ya yimbi ya bana ya Eli, Hofni na Fineasi. (1Sa 2:22-26) Yehova vandá kaka na Samuele ntangu yandi vandá kula. (1Sa 3:19) Ntangu yandi kumá ya kununa, yandi lembá ve na kusadila Yehova mpe na kuvanda ya kukangama kaka na yandi, ata bana ya yandi vandá ve ya kukangama na Yehova.—1Sa 8:1-5.

Yinki kifwani ya Samuele lenda longa beto? Kana nge ke ntwenya, vanda na kundima ti Yehova zaba bamambu ya mpasi yina nge ke na kutaná na yawu, mpe yina ya ke na salá nge. Yandi lenda sadisa nge na kuvanda na bukindi. (Iza 41:10, 13) Kana nge ke kibuti, mpe mwana ya nge ke sadilá ve Yehova, kifwani ya Samuele lenda pesa nge bukindi. Yandi natá ve na ngolo bana ya yandi yina vandá ya kukula na kulanda misiku ya Yehova. Yandi bika mambu na maboko ya Yehova, yandi lembá ve na kuvanda ya kukangama na yandi, mpe na kusepelisa ntima ya Tata ya yandi ya mazulu, Yehova. Ntangu ya nkaka kifwani ya nge ya mbote ke nata mwana ya nge na kuvutukila Yehova.

LUTISA VIDEO BENDA BILESO NA BIFWANI YA BAWU—SAMUELE, MPE NA MANIMA YUFULA BYUVU YAYI:

• 

  Wapi mutindu Samuele lakisá bukindi ntangu yandi vandá ntwenya?

• 

  Wapi mutindu Danny lakisá bukindi?

• 

  Wapi kifwani ya mbote Samuele pesá ntangu yandi kumá ya kununa?

• 

  Wapi kifwani ya mbote bibuti ya Danny pesaka?