Mfumu ya ntete ya Izraele

Yehova pesaka bana ya Izraele bazuzi samu na kutwadisa bawu, kasi bawu, ba vandaka na nsatu ya mfumu. Ba zonzaka na Samuele: ‘Babwala nyonso pene-pene ya beto ke na bamfumu. Beto mpe ke na nsatu ya mfumu.’ Samuele talaka ti mambu yango vandaka yimbi. Na yawu, yandi sambilaka Yehova. Yehova zonzaka na yandi: ‘Ni nge ve bantu yayi me losa. Ni munu ba me losa. Zonza na bawu ti ba lenda kuzwa mfumu, kasi mfumu yango ke lomba bawu bima mingi.’ Ata faso yina, ba zonzaka: ‘Ya me tala ve beto. Beto ke na nsatu ya mfumu!’

Yehova zonzaka na Samuele ti bakala mosi na nkumbu ya Sawule ke vanda mfumu ya ntete. Ntangu Sawule kwendaka tala Samuele na Rama, Samuele tulaka yandi mafuta na zulu ya yintu. Ni yina lakisaka ti yandi me kuma mfumu.

Na manima Samuele bokilaka bana ya Izraele samu na kulakisa bawu mfumu ya bawu ya malu-malu. Kasi ba vanda tala ve Sawule. Nge zaba samu na yinki? Samu yandi vandaka ya kubumbana na kati ya bimfunda. Ntangu ba talaka Sawule, ba basisaka yandi mpe ba telemisaka yandi na kati-kati ya bantu. Sawule vandaka yinda kuluta bantu nyonso mpe yandi vandaka kitoko mingi. Samuele zonzaka: ‘Beno tala muntu yina Yehova me soola.’ Bana ya Izraele zonzaka na ndinga ya ngolo: ‘Luzingu ya yinda na mfumu!’

Na kubanda, mfumu Sawule vanda kuwaka Samuele mpe vanda tumamaka na Yehova. Kasi na manima yandi sobaka. Na kifwani, mfumu vandaka ve na luve ya kupesa minkayulu. Kilumbu mosi, Samuele zonzaka na Sawule na kuvingila yandi kwiza, kasi Samuele kwizaka ve na mbangu. Na yawu, Sawule bakaka mukanu ya kupesa minkayulu yandi mosi. Yinki Samuele salaka? Yandi zonzaka na yandi: ‘Nge zolaka manga ve kutumama na Yehova.’ Sawule bendaka kwandi kileso na mambu ya yimbi yina yandi salaka?

Na manima, ntangu Sawule kwendaka nwanisa bantu ya Amaleki, Samuele zonzaka na Sawule na kufwa bantu nyonso kuna. Kasi Sawule bakaka mukanu ya kufwa ve mfumu Agagi. Yehova zonzaka na Samuele: ‘Sawule me bika munu mpe yandi me kuwa ve munu.’ Samuele nyongaka mingi, mpe yandi zonzaka na Sawule: ‘Samu nge me manga kutumama na Yehova, yandi ke soola muntu ya nkaka mutindu mfumu.’ Ntangu Samuele balukaka na kukwenda, Sawule simbaka kikuti ya yandi mpe ya pasukaka. Na manima Samuele zonzaka na Sawule: ‘Yehova me botola nge kimfumu.’ Yehova pesaka kimfumu na muntu yina vanda zolaka yandi mpe yina vanda tumamaka na yandi.