Davidi na Sawule

Na manima ya lufwa ya Goliati, Sawule tulaka Davidi mfumu ya basoda ya yandi. Davidi nungaka bamvita mingi mpe kumaka ya kuzabana. Ntangu nyonso Davidi vanda katukaka na mvita, bakento vanda basikaka na kuyimba mpe kubina: ‘Sawule me kufwa mafunda ya bantu, kasi Davidi mafunda na mafunda ya bantu!’ Sawule bandaka kusala Davidi kimbanda mpe kusosa kufwa yandi.

Davidi zabaka kusika mbote-mbote harpe. Kilumbu mosi, ntangu Davidi vanda bula harpe samu na Sawule, Sawule losilaka yandi dikonga. Davidi kimaka yawu, mpe ya kwendaka kota na kibaka. Sawule mekaka kufwa Davidi bambala mingi. Davidi kimaka mpe kwendaka bumbana na ntoto ya kuyuma.

Sawule bakaka basoda 3000 mpe kwendaka sosa Davidi. Kilumbu mosi Sawule kotaka na kati ya ditadi mosi ya nene, kisika yina Davidi na bantu ya yandi bumbanaka. Babakala yayi zonzaka na ndinga ya yisi: ‘Yayi ni bweso ya nge ya kufwa Sawule.’ Davidi pusanaka malembe mpe zengaka kitini ya kinkuti ya Sawule. Sawule zabaka ve mambu yina Davidi salaka. Ya salaka Davidi mpasi na ntima, samu yandi lakisaka ve buzitu na mfumu yina Yehova soolaka. Yandi mangaka ti bantu ya yandi sala Sawule yimbi. Davidi bokilaka Sawule na ndinga ya ngolo mpe zonzaka: Mu zolaka kufwa nge ntangu mu kuzwaka makoki ya kusala yawu. Sawule sobaka kwandi makanisi ya yandi?

Ve. Yandi bikaka ve kusosa kufwa Davidi. Kilumbu mosi na mpimpa, Davidi na mwana-nkazi ya yandi Abishai kotaka kisika yina Sawule vandaka. Abnere, yina vanda kengidilaka Sawule vandaka ya kulala. Abishai zonzaka: ‘Ntangu yawu yayi! Bika mu kufwa yandi.’ Davidi vutulaka: ‘Yehova yandi mosi ke semba Sawule. Beto baka kaka dikonga na kima ya yandi ya kutudila maza mpe beto kwenda.’

Davidi kwendaka na zulu ya mongo yina vandaka pene-pene. Yandi zonzaka na ndinga ya ngolo: ‘Abnere, samu na yinki nge me bumba ve mfumu ya nge? Wapi kisika ke kima ya kutudila maza na dikonga ya Sawule?’ Sawule zabaka ti ya vandaka ndinga ya Davidi, yandi zonzaka: ‘Nge zolaka kufwa munu, kasi nge me sala ve yawu. Mu zaba ti ni nge ke vanda mfumu ya Izraele na manima ya munu.’ Sawule vutukaka na yinzo ya yandi. Kasi bantu nyonso ve ya dikanda ya Sawule vanda yiinaka Davidi.