Yesu me soola Solo

Solo vandaka muntu ya Roma yina butamaka na Tarse. Yandi vandaka Mufarize, yandi zabaka mbote-mbote Musiku ya Bazwife, mpe yandi vanda yiinaka bakristo. Yandi vanda basisaka na ngolo bakristo ya bakento na ya babakala na bayinzo ya bawu mpe yandi vanda tulaka bawu na boloko. Yandi vandaka mpe ntangu bantu mingi yina vandaka na nkele, kufwaka Etiene na matadi.

Kasi Solo vanda sepela ve ba kwamisa kaka bakristo ya Yeruzalemi. Na yawu, yandi lombaka na nganga-nzambi ya nene na kufilisa yandi na mbanza ya Damase samu yandi kwenda nyokola bakristo ya kuna. Ntangu Solo kumaka pene-pene na mbanza yango, nsemo mosi zungaka yandi, mpe yandi kubwaka na ntoto. Yandi kuwaka ndinga mosi yina zonzaka na yandi: ‘Solo, samu na yinki nge ke na kwamisaka munu?’ Solo vutulaka: ‘Nge ke nani?’ Yandi vutulaka: ‘Mu ke Yesu. Kwenda na Damase, mpe kuna nge ke longoka mambu yina nge me fwana kusala.’ Na mbala mosi Solo vanda tala dyaka ve, mpe ya sosaka ti muntu simba yandi na diboko samu na kunata yandi na mbanza.

Na Damase, ya vandaka na mukristo mosi na nkumbu ya Ananiase. Yesu zonzaka na yandi na kimona-meso: ‘Kwenda na yinzo ya Yuda na bala-bala yina ba ke bokilaka Kusungama, mpe sosa Solo.’ Ananiase zonzaka: ‘Mfumu, mu me kuwaka bamambu mingi na yina me tadila bakala yina! Yandi ke tulaka bilandi ya nge na boloko!’ Kasi Yesu zonzaka: ‘Kwenda tala yandi. Mu me soola yandi samu na kusamuna nsangu ya mbote na makanda mingi.’

Na yawu, Ananiase kwendaka na sika ya Solo mpe zonzaka na yandi: ‘Mpangi ya munu Solo, Yesu me filisa munu na sika ya nge samu na kufungula nge meso.’ Na mbala mosi, Solo bandaka dyaka kutala. Yandi longokaka na yina me tadila Yesu mpe yandi kumaka kilandi ya yandi. Yandi kuzwaka mbotokolo mutindu mukristo, mpe yandi bandaka kusamuna na basinagoge, kintwadi na bakristo ya nkaka. Nge lenda kanisa na yina ya vanda sala Bazwife na kutala Solo kusamuna bantu, na yina me tadila Yesu? Ba vanda zonza: ‘Yayi ke ve ni bakala yina vanda kwamisa bilandi ya Yesu?’

Na kati ya bamvula tatu, Solo samunaka bantu ya Damase. Bazwife vanda yiinaka Solo mpe ba vanda bongisa bamambu samu na kufwa yandi. Kasi bampangi ya kimvuka kuwaka mambu yina ba vanda sosa kusala yandi. Na yawu, ba sadisaka yandi na kukima. Ba tulaka yandi na kati ya kitunga mpe ba kulumusaka yandi na dibulu ya kibaka ya mbanza.

Ntangu Solo kumaka na Yeruzalemi, yandi sosaka kuvukana na bampangi ya kuna. Kasi ba vandaka na boma ya yandi. Na yawu, kilandi mosi na nkumbu ya Barnabasi nataka Solo na bantumwa mpe salaka ti ba ndima ti Solo sobaka ya tsyeleka. Solo bandaka kusamuna nsangu ya mbote na tiya nyonso kintwadi na bampangi ya kimvuka ya Yeruzalemi. Mwa bantangu na manima, ba bandaka kubokila yandi Polo.