Ba mangaka kufukama

Ntangu fioti na manima ya kutala kiteki na ndosi, mfumu Nebukadenezare yidikaka kiteki mosi ya nene na wolo. Yandi tulaka yawu na Dura mpe bokilaka bantu ya kulutila mfunu ya bwala samu ba vukana na mantwala ya yawu. Na kati ya bawu vandaka mpe na Shadrake, Mishaele, mpe Abedenego. Mfumu pesaka musiku yayi: ‘Ntangu beno ke kuwa makelele ya bampungi, ya bagitare mpe ya bima ya nkaka ya miziki, beno fukama na mantwala ya kiteki! Muntu nyonso yina ke fukama ve, ba ke losa yandi na tiya ya nene.’ Bantwenya tatu yayi ke fukama kwandi na mantwala ya kiteki, to ba ke sambila kaka Yehova?

Na manima, mfumu pesaka musiku ya kubula miziki. Bantu nyonso fukamaka mpe sambilaka kiteki, kaka Shadrake, Mishaele, mpe Abedenego salaka ve yawu. Bantu talaka bawu mpe kwendaka zonza na mfumu: ‘Baebre tatu yayi me manga kusambila kiteki ya nge.’ Nebukadenezare zonzaka ba nata bawu na sika ya yandi mpe yandi zonzaka na bawu: ‘Mu ke pesa beno bweso ya nkaka ya kusambila kiteki yayi. Kana beno sala ve yawu, mu ke losa beno na tiya ya nene. Ya ke ve na nzambi yina ke lenda kuvuukisa beno na maboko ya munu.’ Ba vutulaka: ‘Beto ke ve na nsatu ya bweso ya nkaka. Nzambi ya beto lenda vuukisa beto. Kasi, ata ti yandi sala ve yawu, O mfumu, beto ke sambila ve kiteki yayi.’

Nebukadenezare dasukaka mingi. Yandi zonzaka na bantu ya yandi: ‘Beno sala ti tiya kuma ngolo bambala 7 kuluta!’ Na manima yandi zonzaka na basoda ya yandi: ‘Beno kanga bawu basinga, mpe beno losa bawu na kati!’ Tiya yango vandaka ngolo mingi. Na yawu, ntangu basoda pusanaka pene-pene, ba kufwaka na mbala mosi. Baebre tatu yayi kubwaka na tiya. Kasi ntangu Nebukadenezare talaka na kati, na kisika ya kutala bantu tatu, yandi talaka bantu 4 vanda tambula. Yandi kumaka na boma mingi mpe yandi yufulaka na bisadi ya yandi: ‘Beto me losa ve bantu tatu na tiya? Mu ke na talaka bantu 4, mpe mosi ya bawu ke na talanaka mutindu mbazi!’

Nebukadenezare kwendaka pene-pene ya tiya mpe bokilaka na ndinga ya ngolo: ‘Beno basika, beno bisadi ya Nzambi ya Kulutila Kuzangama!’ Bantu nyonso kamwaka na kutala Shadrake, Meshake, mpe Abedenego kubasika; kasi nzutu ya bawu vandaka ve ya kunyenga. Nzutu ya bawu, bansuki, mpe bilele ya bawu nyengaka ve, mpe ba vandaka mpe ve na nsunga ya mulinga.

Nebukadenezare zonzaka: ‘Nzambi ya Shadrake, ya Meshake, mpe ya Abedenego ke nene. Yandi me filisa mbazi mpe me vuukisa bawu. Ya ke ve na nzambi mutindu Nzambi ya bawu.’

Mutindu Baebre tatu yayi, nge me baka kwandi mukanu ya kuvanda ya kukangama na Yehova na mantwala ya mambu ni mambu yina lenda salama?