Baka mikanu yina ke sepelisa Yehova

1. Wapi yina ke mambu ya mpasi yina beto nyonso me fwana kusala?

BILUMBU nyonso beto ke bakaka mikanu. Kasi mikanu ya nkaka ke ve mpasi, mutindu yinki beto ke kudya mpe na wapi ntangu beto ke kwenda lala. Beto ke na nsatu ya kubaka mikanu yina ke sepelisa beto na dikanda ya beto. Kasi ya ke ve pete na kubaka mikanu ya mutindu yayi. Samu ti ya lenda bebisa mavimpi ya beto, kilengi ya beto, bantu yina beto ke zolaka mpe lusambu ya beto samu na Yehova. Ya kulutila mfunu, beto ke na nsatu ti mikanu yina beto ke bakaka sepelisa Yehova.—Rom. 12:1, 2.

2. Wapi bamambu tatu yina lenda sadisa beto na kubaka mikanu na ndwenga nyonso?

² Ya ke vanda pete na nge na kubaka mikanu na ndwenga kana nge 1) sosa kuzaba mbote-mbote mutindu mambu kele, 2) kusosa dikanisi ya Yehova na mukanu ya nge, mpe 3) kutala mbote-mbote mosi na mosi ya bamambu yina nge ke na sosaka kusala tekila nge baka mukanu. Na disolo yayi, beto ke zonzila bamambu tatu yayi yina ke sadisa beto na kubongisa mayela ya kusala luswaswanu na mambu ya beto.—Bin. 2:11.

SOSA KUZABA MBOTE-MBOTE MUTINDU MAMBU KELE

3. Samu na yinki nge ke na nsatu ya kuzaba mutindu mambu kele tekila nge baka mukanu? Zonzila yawu.

³ Kima ya ntete yina beto me fwana kusala samu na kubaka mikanu ya mbote ni kusosa kuzaba mbote-mbote mutindu mambu kele. Samu na yinki ya ke mfunu na kusala yawu? Kanisa na muntu yina ke na maladi ya ngolo yina me kwenda tala munganga. Munganga ke pesa kwandi yandi manganga ata kuyufula byuvu to kuzaba yinki ke na yandi? Yandi ke sala ve yawu. Nge mpe ke sosa ntete kuzaba mbote-mbote mutindu mambu kele samu na kubaka mikanu ya mbote. Wa’ faso nge lenda sala yawu?

4. Mutindu Bingana 18:13 ke zonzaka yawu, wa’ faso beto lenda zaba mutindu bamambu kele? (Tala mpe kizizi.)

⁴ Bantangu ya nkaka ni byuvu yina beto ke yufulaka ke sadisaka beto na kusosa kuzaba mutindu mambu kele. Kanisa ntete, ba me bokila nge na feti. Nge ke kwenda kwandi ngulu-ngulu? Kana nge zaba ve muntu yina me bokila nge to mutindu bamambu ke salama kuna, ya ke vanda mbote nge yufula muntu yina me bokila nge mwa byuvu mutindu: “Wapi kisika mpe ntangu ya ke salama? Bantu yikwa ke vanda kuna? Nani ke twadisa bamambu yina ke salama kuna? Nani ke vanda kuna? Wapi bansaka ke vanda kuna? Malafu ke vanda kuna?” Bamvutu na byuvu nyonso yayi ke sadisa nge na kubaka mikanu na ndwenga. Bingana 18:13 (NWT) ke zonzaka: “Kana muntu pesa mvutu na mambu mosi tekila yandi zaba mambu nyonso, ya ke buzoba mpe nsoni.”

5. Yinki nge lenda sala na manima ya kusosa kuzaba mutindu mambu kele?

⁵ Na manima ya kusosa kuzaba mutindu bamambu kele kanisa na mambu nyonso yina ke salama kuna. Na kifwani, kana nge me kwiza zaba ti ba yina nyonso ke vanda kuna ke zitisaka ve malongi ya Biblia to ti bantu ke kunwa ya bawu malafu mutindu ba me zola, nge lenda kanisa na bamambu ya yimbi yina lenda salama kuna. Yinki nge ke sala kana feti yango ke vanda kilumbu yina nge ke kwendaka na lukutakanu to yina nge soolaka samu na kusamuna? Kukanisa na bamambu nyonso yina ke salama kuna ke sadisa nge na kubaka mikanu ya mbote. Kasi, ya ke dyaka na mambu ya nkaka yina nge me fwana kusala. (1 Pi. 4:3) Ntembe ve nge me sosa kuzaba mutindu mambu kele. Kasi wapi yina ke dikanisi ya Yehova samu na mambu yango?—Bin. 2:6.

SOSA DIKANISI YA YEHOVA

6. Mutindu Zaki 1:5 ke zonzaka yawu, samu na yinki beto me lunga kusambila Yehova samu yandi sadisa beto?

⁶ Lomba na Yehova na kusadisa nge na kubakula dikanisi ya yandi na mukanu yina nge ke baka. Yehova me pesa beto nsilulu ti yandi ke pesa beto mayela ya kusala luswaswanu na mambu, kana mukanu yina beto ke baka ke sepelisa yandi. Mutindu Zaki 1:5 ke zonzaka yawu: “Kana muntu na kati ya beno ke na kondwa ndwenga, yandi lomba yawu na Nzambi, mpe Nzambi ke pesa yandi yawu, samu ti Nzambi ke pesaka na bantu nyonso na ntima ya mbote mpe ata kupesa masembo.” (Ngwisani ya malu-malu).

7. Wa’ faso nge lenda zaba dikanisi ya Yehova ntangu nge ke bakaka mikanu? Zonzila yawu.

⁷ Na manima ya kusambila Yehova samu yandi twadisa nge, teka dikebi na mvutu ya yandi. Na kifwani, kana nge me zimbana kisika yina nge ke na kwendaka, nge lenda yufula na muntu yina ke vandaka na kisika yina na kusadisa nge. Kasi ya ke vanda kwandi mayela nge kwenda tekila yandi pesa nge mvutu? Ve nge ke sala ve yawu. Nge ke teka dikutu mbote-mbote na malongi yina yandi ke na pesa nge. Mutindu mosi, na manima ya kulomba Yehova ndwenga, nge ke sosa mvutu ya yandi na Biblia mpe malongi yina ke na kwelanaka na mambu ya nge. Na kifwani, kana nge me baka mukanu na kukwenda na feti yina beto me zonzila, nge ke sosa kuzaba yinki Biblia ke zonzaka samu na feti yina, yinki ya ke zonzaka samu na bantu yina ke zitisaka ve malongi ya Biblia, mpe mfunu ya kutula Kimfumu ya Nzambi na kisika ya ntete na luzingu ya nge.—Mat. 6:33; Rom. 13:13; 1 Ko. 15:33.

8. Yinki nge lenda sala kana nge ke na nsatu ya lubakusu samu na kuzwa bamambu yina nge ke na sosaka? (Tala mpe kizizi.)

⁸ Bantangu ya nkaka nge lenda vanda na nsatu ya lubakusu samu na kuzwa bamambu yina nge ke na sosaka. Nge lenda sosa malongi na bampangi ya kento na ya bakala yina ke ya kukula na kimpeve. To nge lenda sosa nge mosi bamambu yina lenda sadisa nge. Nge lenda kuzwa yawu na mikanda ya beto ya kulongoka mutindu Buku ya kusosa samu na Bambangi ya Yehova mpe Masonoko samu na luzingu ya Bakristo. Mambu yina nge ke na sosaka kusala ni kubaka mukanu yina ke sepelisa Yehova. Kuzimbana ve yawu.

9. Wa’ faso beto lenda vanda ya kundima ti mukanu yina beto me baka ke sepelisa Yehova? (Baefeze 5:17)

⁹ Wa’ faso beto lenda zaba ti mukanu yina beto me baka ke sepelisa Yehova? Kima ya ntete, ni kusosa kuzaba mbote-mbote nani yandi kele. Biblia ke zonzaka ‘nzayilu ya Muntu ya Kuluta Santu kele mayela ya kubakula mambu.’ (Bin. 9:10, NWT-MK) Kuzaba Yehova mbote-mbote zola zonza kuzaba bifu ya yandi, dikanisi ya yandi, bamambu yina yandi ke zolaka to yina yandi ke yiinaka. Nge lenda yufula: ‘Na nyonso yina mu zaba samu na Yehova, wapi mukanu mu lenda baka yina ke sepelisa yandi?’—Tanga Baefeze 5:17.

10. Samu na yinki misiku ya Biblia me lutila bansalulu ya dikanda ya beto mpe ya kisika yina beto kele?

¹⁰ Samu na kusepelisa Yehova, bantangu ya nkaka beto me fwana kubaka mikanu yina ke sepelisa ve dikanda mpe bandiku ya beto. Na kifwani, bibuti ya nkaka ke salaka tiya na bana ya bawu ya kento na kukwelana na muntu yina ke na mbongo mingi to bakala yina lenda pesa bawu mbongo mpe bima mingi samu na makwela ya bwala, ata ti yandi ke ve na kimpeve ya ngolo. Ya tsyeleka, bibuti zola ti bana ya bawu vanda na luzingu ya mbote, kasi nani ke sadisa bawu na kukula na kimpeve? Yinki Yehova ke kanisaka na kyuvu yayi? Beto tala mvutu na Matayi 6:33. Yesu zonzaka na bakristo na kutatamana na “kusosa ntete Kimfumu ya Nzambi.” Ata ti beto ke zitisaka bibuti ya beto mpe bantu yina ke vandaka kisika mosi na beto, mambu ya kulutila mfunu samu na beto ni kusosa kusepelisa Yehova.

TALA MBOTE-MBOTE MOSI NA MOSI YA BAMAMBU YINA NGE KE NA SOSAKA KUSALA TEKILA NGE BAKA MUKANU

11. Wapi kifu yina ke na Bafilipi 1:9, 10 lenda sadisa nge na kutala mbote-mbote mosi na mosi ya makanisi ya nge tekila nge baka mukanu?

¹¹ Na manima ya kuzwa malongi ya Biblia samu na mukanu yina nge ke baka, nge ke na nsatu ya kutala mbote-mbote mosi na mosi ya bamambu yina nge ke na sosaka kusala nge tekila nge baka mukanu. (Tanga Bafilipi 1:9, 10) Mayela ya kusala luswaswanu na mambu ke sadisa nge na kutala yinki nge ke kuzwa na mosi na mosi ya mambu yina nge me tala samu na kubaka mukanu ya mbote. Bantangu ya nkaka mukanu lenda vanda pete na kubaka. Kasi mikanu nyonso ve ke pete. Mayela ya kusala luswaswanu na mambu ke sadisa nge na kubaka mikanu ya mbote ata ti ya ke mpasi.

12-13. Kana nge na sosaka kisalu, wa’ faso mayela ya kusala luswaswanu na mambu lenda sadisa nge na kubaka mukanu ya mbote?

¹² Kanisa na mambu yayi. Nge ke na sosaka kisalu samu na kukipe bansatu ya dikanda ya nge. Bisalu zole me talana. Nge ke sosa kutala bamambu nyonso yayi na yina me tadila bisalu yango, wapi mutindu ya kisalu ya kele, ya ke baka bangunga yikwa, mpe bilumbu yikwa nge ke sala. Bisalu yango mukristo lenda sala yawu. Na nyonso zole ntima ya nge ke na kisalu yina ba ke pesa nge mbongo mingi, kasi ya ke na bamambu ya nkaka nge me fwana kutala mbote-mbote tekila nge baka mukanu.

¹³ Na kifwani, mosi na mosi ya bisalu yango ke kanga kwandi nge nzila na kuvanda na balukutakanu? Ya ke kudya kwandi nge ntangu yina nge vandaka na yawu nsatu samu na kukipe dikanda ya nge na kimpeve to na kinsuni? Kuyufula byuvu yayi ke sadisa nge na kutula kindiku ya nge na Yehova mpe bansatu ya dikanda ya nge na kisika ya ntete kasi ve kusosa kuvanda na bimvwama mingi, samu ti ya ke “bamambu ya kulutila mfunu.” Kukanisa mutindu yayi ke nata nge na kubaka mukanu yina Yehova ke sakumuna.

14. Wa’ faso mayela ya kusala luswaswanu na mambu mpe luzolo lenda sadisa beto na kubwisa ve kiminu ya bampangi?

¹⁴ Mayela ya kusala luswaswanu na mambu ke salaka mpe ti beto kanisa na yina mikanu ya beto lenda sala na bantu ya nkaka. Ya ke sala ti beto ‘bwisa ve kiminu ya bampangi.’ (Filp. 1:10) Ya ke mpe mfunu ntangu beto ke bakaka mikanu na yina me tadila beto mosi, mutindu faso ya beto ya kulwata, ya kuzenga basuki mpe ya kukipe nzutu ya beto. Na kifwani, ya lenda vanda na bilele to faso ya kuzenga basuki yina beto ke zolaka. Kasi, yinki nge ke sala, kana bilele yina nge ke lwataka to faso yina nge ke salaka basuki lwalisaka bantu yina ke ve Bambangi ya Yehova to Bambangi ya Yehova? Mayela ya kusala luswaswanu na mambu ke sadisa beto na kuzitisa faso ya bawu ya kutala bamambu. Luzolo ke nata beto na kusala bamambu yina ke “mbote samu na bampangi” mpe kukondwa kulutisa ndilu. (1 Ko. 10:23, 24, 32; 1 Tim. 2:9, 10) Kusala yawu ke nata beto na kubaka mukanu yina ke lakisa ti beto ke zolaka mpe ke zitisaka bampangi.

15. Na yinki nge me fwana kukanisa tekila nge baka mukanu ya mfunu?

¹⁵ Kana nge ke na nsatu ya kubaka mukanu ya mfunu, kanisa na yina nge lenda sala samu na kulungisa yawu. Yesu longaka beto na “kutala mbongo yina ya ke lomba.” (Luke 14:28) Na yawu, nge me fwana kutala ntangu, bima mpe bangolo yina ya ke lomba na nge samu na kulungisa dikanisi ya nge. Bantangu ya nkaka, nge lenda solola na dikanda ya nge na kutala yinki mosi na mosi lenda sala samu na kusadisa nge na kulungisa mukanu ya nge. Samu na yinki ya ke mfunu na kusala yawu? Ya lenda sadisa nge na kutala wapi bansobolo nge lenda sala samu na kulungisa mukanu ya nge. Ntangu nge ke zonzila na dikanda ya nge mpe nge ke kuwa bawu, ba ke vanda na kilengi ya kusala na nge samu na kulungisa mukanu ya nge.—Bin. 15:22.

BAKA MUKANU YINA NGE LENDA LUNGISA

16. Wapi bamambu nge me bonga kusala samu mukanu yina nge ke baka simba? (Tala mpe encadré “Mutindu ya kubaka mikanu ya mbote.”)

¹⁶ Kana nge landa bamambu yina beto me zonzila na disolo yayi, nge ke vanda ya kubongama samu na kubaka mukanu ya mbote. Nge ke sosa kuzaba mbote-mbote mutindu mambu kele mpe kusosa malongi ya Biblia yina ke sadisa nge na kubaka mukanu yina ke sepelisa Yehova. Na nsuka, nge lenda lomba na Yehova na kusadisa nge na kubaka mukanu yina lenda simba.

17. Yinki lenda sadisa beto na kubaka mikanu ya mbote?

¹⁷ Ata ti na ntama nge bakaka mikanu yina simbaka, kuzimbana ve ti ni ndwenga ya Yehova sadisaka nge na kubaka mukanu ya mbote, kasi ve mayela ya nge mosi to bamambu yina nge kutanaka na yawu. Kaka ni Yehova lenda pesa nge nzayilu ya matsyeleka, mayela ya kubakula mambu, mpe mayela ya kusala luswaswanu na mambu. Bifu tatu yayi, ke sadisa beto na kuvanda na ndwenga. (Bin. 2:1-5) Yehova lenda sadisa beto na kubaka mikanu yina lenda sepelisa yandi.—Nku. 23:2, 3.