Tatamana na kutambula na kiminu

1. Samu na yinki ntumwa Polo vandaka na kilengi na mutindu yandi nataka luzingu ya yandi?

NTUMWA Polo zabaka ti ntangu bikanaka kaka fioti ba kufwa yandi. Ata faso yina, yandi vandaka na kilengi na mutindu yandi nataka luzingu ya yandi. Yandi zonzaka: “Mu me kima mbangu tii na nsuka, mu me bumba kiminu.” (2 Tim. 4:6-8) Polo bakaka mukanu ya mbote ya kusadila Yehova na luzingu ya yandi, mpe yandi vandaka na ata ntembe ti Yehova ke sepelaka na yandi. Wa’ faso beto mpe lenda baka mikanu ya mbote mpe kuvanda ya kundimama na Nzambi?

2. Yinki zola zonza kutambula na kiminu?

² Polo zonzaka na yina me tadila yandi mosi mpe na bakristo ya nkaka yina vandaka ya kukwikama: “Beto ke tambulaka na kiminu, kasi ve na mambu yina ke talanaka na meso.” (2 Kor. 5:7) Yinki ya zola zonza? Na Biblia nzonzolo “kutambula” bantangu ya nkaka ke lakisaka mutindu muntu ke nataka luzingu ya yandi. Ntangu muntu ke tambulaka na mambu yina ke talanaka na meso, yandi ke bikaka meso ya yandi, bamambu yina yandi ke waka mpe bansatu ya yandi twadisa mikanu ya yandi. Kasi muntu yina ke tambulaka na kiminu ke sosaka dikanisi ya Yehova tekila yandi baka mikanu. Ndyatulu ya yandi ke lakisaka ti yandi ke ya kundima ti Yehova ke pesa yandi difuta, mpe yandi zaba ti kulanda malongi ya Yehova ke natina yandi bambote.—Nku. 119:66; Ebr. 11:6.

3. Wapi bambote kutambula na kiminu ke natina beto? (2 Bakorinto 4:18)

³ Beto nyonso bantangu ya nkaka tekila beto baka mikanu, beto ke tulaka ntima na yina beto ke kuwaka, ke talaka mpe na bansatu ya beto. Kasi, kana beto tula kaka ntima na yina beto ke talaka to ke kuwaka ntangu beto ke bakaka mikanu ya mfunu, ya lenda natina beto bampasi. Samu na yina yinki? Samu ti beto lenda vunama na yina beto ke talaka mpe kuwaka. Dyaka, ya lenda nata mpe beto na kutula ve dikebi na luzolo mpe na malongi ya Yehova. (Ekl. 11:9; Mat. 24:37-39) Kasi kutambula na kiminu lenda sala ti beto baka mikanu yina “Mfumu ke ndimaka.” (Efe. 5:10) Kutumama na malongi ya Yehova ke pesaka kizunu ya ntima mpe kilengi ya tsyeleka. (Nku. 16:8, 9; Iza. 48:17, 18) Ya ke salaka mpe ti beto kuzwa luzingu ya ntangu nyonso.—Tanga 2 Bakorinto 4:18.

4. Wa’ faso muntu lenda zaba ti yandi ke na tambulaka na kiminu to ve?

⁴ Wa’ faso beto lenda zaba kana beto ke na tambulaka na kiminu to ve? Samu na kuzwa mvutu, beto lenda yufula: Wapi bamambu ke twadisaka mikanu ya beto? Ya ke kwandi bamambu yina ke talanaka na meso, to beto ke sikidilaka na malongi ya Yehova? Beto tala bamambu tatu yina lenda sadisa beto na kutatamana na kutambula na kiminu. Ya ntete ntangu beto ke sosaka kisalu, ya zole ntangu beto ke sosaka muntu yina beto ke kwela mpe ya tatu ntangu kimvuka ya Yehova ke pesaka beto malongi. Na mosi na mosi ya bamambu yayi, beto ke zonzila bamambu yina beto me fwana kukanisa tekila beto baka mikanu ya mbote.

NTANGU BETO KE SOSAKA KISALU

5. Na yinki beto me bonga kukanisa tekila beto ndima kisalu?

⁵ Beto nyonso ke na nsatu ya kukipe bansatu ya beto mpe ya dikanda ya beto. (Ekl. 7:12; 1 Tim. 5:8) Bisalu ya nkaka ke futaka mbongo mingi. Ba yina ke salaka kuna, lenda kuzwa mbongo mingi samu na kukipe bansatu ya dikanda ya bawu mpe kubumba mbongo ya nkaka. Kasi bisalu ya nkaka lenda futa muntu yina ke na salaka kuna, kaka mbongo yina yandi ke na yawu nsatu samu na kuzwa bima yina dikanda ya yandi ke na yawu nsatu, mutindu madya, bilele mpe kisika ya kuvanda. Ntangu beto ke sosaka kundima kisalu, ya ke ve yimbi na kukanisa na lutangu ya mbongo yina ba ke futa beto. Kasi, kutula makanisi kaka na lutangu ya mbongo yina ba ke futa beto, ke lakisa ti beto ke ve na tambulaka na kiminu.

6. Wa’ faso beto lenda tambula na kiminu ntangu beto ke sosaka kisalu? (Baebre 13:5)

⁶ Kana beto tambula na kiminu, beto ke sosa mpe kutala kana kisalu yango lenda bebisa kindiku ya beto na Yehova. Na yawu, beto lenda yufula: ‘Kisalu yango ke lomba kwandi munu na kusala bamambu yina Yehova ke yiinaka?’ (Bin. 6:16-19) ‘Ya ke bebisa kwandi kindiku ya munu na Yehova to ya ke sala ti mu vanda ntama na dikanda ya munu samu na bantangu mingi?’ (Filp. 1:10) Kana mvutu na byuvu yayi kele ee, ya ke vanda ve mbote na kundima kisalu yayi ata ti kisalu me kuma mpasi na kuzwa. Samu ti beto ke tambulaka na kiminu, beto ke bakaka mikanu yina ke lakisaka ti beto ke na kundima ti Yehova ke kipe bansatu ya beto. Baebre 13:5 ke zonzaka: “Beno fwana kuvwanda ve na nkadulu ya kuzola mbongo. Beno yangalala na bima yina kele na beno, samu ti yandi mosi Nzambi tubaka: ‘Mu ke yambula nge ve. Mu ke bika nge ve.’”—Mat. 6:33.

7-8. Wa’ faso Javier tambulaka na kiminu? (Tala mpe kizizi.)

⁷ Javier,a mpangi mosi yina ke vandaka na Amérique du Sud, zabaka ti ya vandaka mfunu na kutambula na kiminu. Yandi me zonza: “Mu kuzwaka kisalu yina ba zola futa munu mbongo kulutila bambala zole na kisalu ya munu ya ntete.” Kasi, Javier vandaka na nsatu ya ngolo ya kukuma mupasuli-nzila. Yandi me bwela: “Mfumu ya kisalu bokilaka munu na kusolola na yandi na kutala kana mu ke na makoki ya kusala. Tekila beto solola, mu sambilaka Yehova na kusadisa munu samu ti mu vandaka na kundima ti yandi zabaka yina ke mbote samu na munu. Ata ti mu vandaka na nsatu ya mikumba na kisalu yina mu vanda sosa mpe ba futa munu mbongo mingi, kasi ya kanga ve munu nzila na kusala bamambu yina mu kanisaka na kimpeve.”

⁸ Javier me bwela: “Ntangu mu vanda solola na mfumu ya kisalu yandi zonzaka na munu ti me bonga kusala ntangu nyonso na manima ya bantangu ya kisalu.” Javier bakaka mukanu ya kundima ve. Balumingu zole na manima, yandi bandaka kisalu ya mupasuli-nzila. Mpe na manima ya mvula mosi yandi kuzwaka kisalu yina vanda baka ve yandi ntangu mingi. Yandi me zonza: “Yehova kuwaka ba lusambu ya munu mpe sadisaka munu na kuzwa kisalu yina salaka ti mu vanda mupasuli-nzila. Mu ke na kilengi mingi na kuzwa kisalu yina ke na pesaka munu ntangu mingi ya kusadila Yehova mpe bampangi ya munu.”

9. Yinki disolo ya Trésor ke na longaka nge?

⁹ Yinki beto lenda sala kana kisalu ya beto ke na salaka ti beto tambula ve na kiminu? Beto tala mambu yina kuminaka Trésor yina ke vandaka na Congo. Yandi me zonza: “Kisalu ya munu ya malu-malu vanda ya kusakana ve. Ba vanda futaka munu mbongo kulutila bambala tatu na kisalu ya munu ya ntete.” Trésor vanda kwiza dyaka ve na balukutakanu bambala mingi samu ti yandi vanda sala na manima ya bantangu ya kisalu. Ba vanda sala mpe yandi tiya na kubumba bansalulu ya mayuya. Trésor zola bika kisalu yango kasi yandi vandaka na boma ya kuvanda dyaka ve na kisalu. Yinki sadisaka yandi? Yandi me zonza: “Abakuke 3:17-19 sadisaka munu na kubakula, ata ti mu vanda dyaka ve na kisalu, Yehova ke kipe munu. Na yawu, mu bikaka kisalu yango.” Yandi me sukisa: “Bamfumu mingi ya kisalu ke kanisaka kana muntu ke na sosaka kisalu yina ba ke pesa yandi mbongo mingi, yandi me fwana kutekisa bansatu ya dikanda ya yandi mpe bamambu ya yandi ya kimpeve. Mu ke na kilengi ya kubumba kindiku ya munu na Yehova mpe ya dikanda ya munu. Mvula mosi na manima, Yehova sadisaka munu na kuzwa kisalu yina zola sala ti mu sepela na yina mu ke na yawu mpe kulutisa ntangu mingi na kisalu ya munu ya kimpeve. Ntangu beto ke tulaka Yehova na kisika ya ntete na luzingu ya beto, beto lenda vanda na bamambu ya mbongo na kati ya mwa ntangu, kasi Yehova ke kipe beto.” Ya tsyeleka, kana beto tula ntima na Yehova mpe na bansilulu ya yandi, beto ke tatamana na kutambula na kiminu mpe yandi ke sakumuna beto.

NTANGU BETO KE SOSAKA MUNTU YINA BETO KE KWELA

10. Na yinki beto me bonga ve kukanisa ntangu beto ke soolaka muntu yina beto ke kwela?

¹⁰ Dikwela ke dikabu ya Yehova mpe ya ke ve yimbi na kusosa kukwela. Mpangi ya kento yina ke na kanisaka kukwelana ke sosa kutala bamambu yayi na mpangi ya bakala: faso ya yandi ya kukipe nzutu, ndyatulu ya yandi, mutindu bantu ya nkaka ke tadilaka yandi, faso ya yandi ya kusadila mbongo, mutindu yandi ke bakilaka bantu ya dikanda ya yandi, mpe yina mpangi yango ke salaka yandi na ntima.b Kusala yawu ke ve yimbi. Kasi, kana yandi suka kaka na kutala bamambu yayi, yandi ke tambula na bamambu yina ke na talaka na meso.

11. Wa’ faso beto lenda tambula na kiminu ntangu beto ke sosaka muntu yina beto ke kwela? (1 Bakorinto 7:39)

¹¹ Yehova ke sepelaka mingi na bampangi ya kento na ya bakala yina ke landaka malongi ya yandi, ntangu ba ke sosaka muntu yina ba ke kwela. Na kifwani, ba ke vingilaka ti ba yela “na nzutu mpe na faso ya kukanisa” tekila ba banda kusosa kuzabana na muntu samu na makwela. (1 Kor. 7:36) Samu na bawu kento to bakala ya mbote ke muntu yina ke na bifu yina Yehova ke zolaka. (Bin. 31:10-13, 26-28; Efe. 5:33; 1 Tim. 5:8) Kana muntu yina ke ve mbangi ya Yehova ke na sosaka bawu makangu, ba ke tulaka ntima na dilongi yina ke zonzaka na “kukwelana kaka na kisadi ya Mfumu,” yina ke na 1 Bakorinto 7:39. (Tanga.) Ba ke na tatamanaka na kutambula na kiminu na kundima ti ya ke ve na muntu yina ke na makoki ya kukipe to kubumba bantima ya bawu kulutila Yehova.—Nku. 55:22.

12. Yinki kifwani ya Rosa ke na longaka nge?

¹² Beto tala mambu yina kuminaka Rosa, yina ke mupasuli-nzila na Colombie. Kisalu ya yandi nataka yandi na kusolola mingi na bakala mosi yina ke ve mbangi ya Yehova. Bakala yango bandaka kusosa yandi makangu. Rosa mpe vanda zola yandi. Yandi me zonza: “Na kutala, yandi vandaka bakala mosi ya mbote. Yandi vanda sadisa bantu na bwala yina yandi vanda vandaka. Ya vanda talana mutindu yandi vandaka na luzingu ya kitoko. Mu vanda zolaka mingi faso yandi vanda bakilaka munu. Yandi vandaka na bifu nyonso yina munu vanda sosa na muntu yina zolaka kwela munu. Mambu ya kyadi ke ti yandi vandaka ve mbangi ya Yehova.” Yandi me bwela: “Samu ti mu pesaka yandi ntima ya munu ya vandaka mpasi na kuzonza na yandi ve. Na ntangu yina mu vanda tala ti munu ke kaka munu mosi mpe mu vandaka na nsatu ya kukwela. Kasi, mu kuzwaka ve muntu na kati ya matsyeleka.” Rosa sukaka ve na kutala yina yandi vandaka na nsatu ya kutala. Kasi, yandi kanisaka na mutindu mukanu ya yandi zola bebisa kindiku ya yandi na Yehova. Na yawu, yandi zengaka masolo na bakala yango mpe yandi tulaka makanisi ya yandi na kisalu ya yandi ya kimpeve. Ntangu fioti na manima ba bokilaka yandi na kusala lekole ya EER mpe bubu yayi yandi ke mupasuli-nzila ya nene (Pionière spéciale). Rosa me zonza: “Yehova me fulusa ntima ya munu na kilengi.” Ata ti ya ke ve pete na kutambula na kiminu na bamambu yina ke simbaka ntima ya beto, kasi kubika makanisi ya Yehova twadisa beto ke natina beto kaka mbote.

NTANGU KIMVUKA YA YEHOVA KE PESAKA BETO MALONGI

13. Wa’ faso beto lenda banda kutambula na bamambu yina ke na talanaka na meso ntangu beto ke zwaka malongi na kimvuka ya Yehova?

¹³ Samu na kusadila Yehova, bambala mingi beto ke kuzwaka malongi yina ke katukaka na bakuluntu, na ntwadisi ya circonscription, na Betele to na Kimvuka ya Bantwadisi. Kasi, bantangu ya nkaka beto lenda zaba ve samu na yinki ba me pesa beto malongi. Beto lenda vanda na bantembe na malongi yango. Mpe kubanda kutula meso na bafoti ya bampangi yina ke pesaka beto yawu.

14. Yinki lenda sadisa beto na kutambula na kiminu ntangu ba ke pesaka beto malongi na kimvuka ya Yehova? (Baebre 13:17)

¹⁴ Beto ke tambulaka na kiminu ntangu beto ke tulaka ntima ti ni Yehova ke twadisaka kimvuka ya yandi mpe yandi zaba bamambu nyonso. Ya ke nataka beto na kutumama na mbangu na kilengi. Baebre 13:17 ke zonzaka: “Beno zitisa bantwadisi ya beno, mpe beno tumama na bawu. Ya tsyelika, bawu ke bikaka ve na kukeba beno mbote, samu ti bawu ke zabisa na sika ya Nzambi wapi mutindu bawu kebaka beno. Beno fwana kusala nyonso yina me lunga, samu ti bawu sala kisalu ya bawu na kilengi. Bawu fwana kusala yawu ve na manyongo, kana ve beno ke kuzwa ndandu ve.” Beto zaba ti kutumama na malongi yina ba ke pesaka beto ke bumbaka bumosi na kati ya kimvuka. (Efe. 4:2, 3) Beto ke na kundima ti ata ti bantu yina ke pesaka beto malongi ke bantu ya masumu, Yehova ke sakumuna beto kana beto tumama. (1 Sa. 15:22) Mpe na ntangu ya kulunga, Yehova ke yidika bamambu.—Mika 7:7.

15-16. Yinki sadisaka Kevin na kutambula na kiminu ata ti yandi vandaka na bantembe? (Tala mpe kizizi.)

¹⁵ Beto tala mambu mosi yina ke lakisa beto mfunu ya kutambula na kiminu. Ata ti na Pérou bantu mingi ke zonzaka Espagnol, bamfumu mingi ya makanda ke zonzaka ndinga ya bwala. Mosi ya yawu ke Quechua. Na kati ya bamvula mingi bampangi yina ke zonzaka Quechua vanda sosa bantu yina ke zonzaka ndinga yayi. Kasi, samu na kuzitisa misiku ya bwala ba salaka bansobolo na mutindu ya kusosa bantu yina ke zonzaka Quechua. (Rom. 13:1) Ya nataka basamuni ya nkaka na kuzonza ti faso ya kusala yayi zola simba ve. Kasi, ntangu ba tumamaka na malongi yayi, Yehova sakumunaka bangolo mpe ba kuzwaka bantu mingi yina ke zonzaka ndinga yayi.

¹⁶ Kevin, kuluntu ya kimvuka ya ndinga ya Quechua, vandaka mosi ya bantu yina vandaka na bantembe. Yandi me zonza: “Mu kanisaka, ‘Wa’ faso beto lenda sala samu na kuzwa bantu yina ke zonzaka Quechua?’” Yinki yandi salaka? Yandi me zonza: “Mu bambukaka na Bingana 3:5 mpe na Moyize. Yehova pesaka Moyize malongi yina vanda talana ti ya zola simba ve. Yandi zonzaka na Moyize na kubasisa dikanda ya Izraele na Ezipte tii na Nzadi-Mungwa ya Mbwaki. Kuna ya vanda talana mutindu ti ya vandaka ve na kisika ya nkaka ya kukima mpe bantu ya Ezipte zola simba bawu. Ata faso yina Moyize tumamaka mpe Yehova sakumunaka yandi.” (Bas. 14:1, 2, 9-11, 21, 22) Kevin kusoba faso ya yandi ya kusamuna. Yinki ya nataka? Yandi me zonza: “Ya kamwisaka munu na kutala mutindu Yehova sakumunaka beto. Tekila bansobolo yayi, beto vanda tambulaka mingi samu na kusosa bantu yango, bantangu ya nkaka beto vanda zwaka kaka muntu mosi to zole yina vanda zonzaka Quechua. Bubu yayi, beto ke kwendaka na bisika yina bantu mingi ke zonzaka Quechua. Ya me sala ti beto kuzwa masolo mingi na bantu, kuvutukila kutala bawu mpe kulongoka Biblia na bawu. Mpe mingi ya bawu ke na kwizaka na balukutakanu.” Ya tsyeleka ntangu beto ke tambulaka na kiminu, Yehova ke sakumunaka kaka beto.

17. Yinki beto me longoka na disolo yayi?

¹⁷ Bamambu tatu yina beto me tala me lakisa beto mfunu ya kubika ve na kutambula na kiminu. Kasi, beto zola tambula na kiminu na bamambu nyonso ya luzingu ya beto, mutindu ntangu beto ke soolaka bansaka, bamvula yina beto ke lutisa na lekole, mpe mutindu ya kukulisa bana. Ntangu beto ke bakaka mikanu, beto zola bika ve bamambu yina beto ke na talaka twadisa beto. Kasi, beto me fwana kubika malongi ya Yehova mpe bansilulu ya yandi twadisa beto. Kusala yawu ke sala ti beto lenda “kutumama na [Yehova] Nzambi ya beto, bantangu nyonso.”—Mika 4:5.