Nkumbu ya Yehova ke mfunu samu na Yesu

1-2. a) Yinki Yesu salaka na nkokila tekila lufwa ya yandi? b) Na wapi byuvu beto ke pesa bamvutu?

NA KILUMBU ya jeudi na nkokila ya 14 Nisani, ya mvula 33 N.B., ntangu bikana kaka fioti yina ba zola tekisa Yesu, kutalisa yandi mpasi, kusambisa yandi mpe kufwa yandi. Kaka na manima ya kudya kintwadi na bantumwa ya yandi ya kukwikama na kisika mosi ya nene na zulu, yandi pesaka bawu mwa malongi ya nsuka samu na kukindisa bawu. Tekila ba bika kisika yango, Yesu salaka lusambu mosi yina vandaka mfunu mingi mpe ntumwa Yoane sonikaka yawu na Yoane kikapu 17.

² Yinki lusambu ya Yesu ke na longaka beto na mambu yina vanda kwamisa yandi tekila ba kufwa ya yandi? Mpe yinki ya ke na longaka beto na mambu yina lutilaka mfunu samu na yandi awa na ntoto? Beto pesa bamvutu na byuvu yayi.

“MU ME ZABISA BAWU NKUMBU YA NGE”

3. Yinki Yesu zonzaka na yina me tadila nkumbu ya Yehova mpe ya me sosa kuzonza yinki? (Yoane 17:6, 26)

³ Na lusambu ya yandi, Yesu zonzaka: “Mu me zabisa bawu nkumbu ya nge.” Mambu yayi Yesu zonzilaka yawu, bambala zole na lusambu ya yandi. (Tanga Yoane 17:6, 26.) Yinki yandi vanda sosa kuzonza? Yandi vanda sosa kwandi kuzonza na bawu ti nkumbu ya Nzambi vandaka Yehova? Ve, samu ti bilandi ya yandi vandaka Bazwife, ba zabaka ti nkumbu ya Nzambi vandaka Yehova. Mpe nkumbu yango ke ya kusonama bambala mingi na kati ya masonoko ya Ki-Ebre. Na yawu, ntangu Yesu zonzaka mambu yayi, yandi vanda zonzila ve nkumbu ya Nzambi, kasi mutindu ya muntu yina vandaka na manima ya nkumbu yango. Ya zola zonza, dikanisi ya yandi samu na bantu, bifu ya yandi mpe bamambu yina yandi ke salaka. Ya ke ve na muntu ya nkaka zola lenda kusala yawu mutindu Yesu.

4-5. a) Wapi ntangu nkumbu ya muntu ke kumaka mfunu na meso ya beto? Pesa kifwani. b) Wapi mutindu bantumwa kwiza zaba mbote-mbote nkumbu ya Yehova?

⁴ Kanisa mwa fioti: Kuluntu mosi ya kimvuka ya nge na nkumbu ya David ke munganga mpe nge me zaba yandi kubanda bamvula mingi. Kilumbu mosi, mambu ya mpasi me kumina nge mpe nge ke na nsatu ya munganga samu na kusadisa nge. Ba me nata nge na lupitalu kisika yina kuluntu yango ke salaka, mpe yandi me sala nyonso samu na kuvuukisa nge. Na manima ya yawu, nge ke zola dyaka yandi ya kulutila. Ntangu nge ke kuwa nkumbu ya yandi, nge ke kanisa na yina yandi salaka samu na nge! David ke dyaka ve kaka kuluntu yina nge zabaka, kasi munganga yina vuukisaka nge.

⁵ Mutindu mosi mpe, bilandi ya Yesu zabaka nkumbu ya Yehova. Kasi, ya kumaka mfunu mingi samu na bawu, ntangu Yesu sadisaka bawu na kuzaba mbote-mbote nani Yehova kele. Samu na yinki beto lenda zonza yawu? Samu ti Yesu landaka na faso ya kulunga kifwani ya Tata ya yandi na nyonso yina yandi zonzaka mpe salaka. Kutula dikebi na faso ya yandi ya kulonga mpe kutala mutindu yandi vanda bakila bantu ya nkaka, sadisaka bantumwa na “kuzaba” Yehova.—Yoa. 14:9; 17:3.

“SAMU NA NKUMBU YA NGE YINA NGE PESAKA MUNU”

6. Wapi yina vandaka dikanisi ya Yesu ntangu yandi zonzaka ti Yehova pesaka yandi nkumbu ya yandi? (Yoane 17:11, 12)

⁶ Na kati ya lusambu, Yesu lombaka na Yehova: “Kengidila bawu samu na nkumbu ya nge yina nge pesaka munu.” (Tanga Yoane 17:11, 12.) Ya zola zonza kwandi ti ba zola banda kubokila Yesu na nkumbu ya Yehova? Ve. Tala yina Yesu zonzaka: “Nkumbu ya nge.” Na yawu, nkumbu ya Yehova kumaka ve nkumbu ya Yesu. Kasi, na yinki Yesu vanda kanisa ntangu yandi zonzaka mambu yayi? Ya ntete, Yesu vandaka mutindu muntu yina ba filisaka mpe muntu yina vanda zonza na bantu na kisika ya Yehova. Yandi salaka bimangu mpe kwizaka na ntoto na nkumbu ya Tata ya yandi. (Yoa. 5:43; 10:25) Ya zole, nkumbu ya Yesu zola zonza “Yehova ke muvuukisi.” Ya tsyeleka, nkumbu ya Yehova vanda talana na kati ya nkumbu ya Yesu.

7. Samu na yinki, Yesu zonzaka na kisika ya Yehova? Pesa kifwani.

⁷ Kifwani yayi, ke sadisa beto na kubakula samu na yinki Yesu zonzaka na kisika ya Yehova. Mfumu lenda filisa muntu samu na kuzonza na bantu ya nkaka samu na yandi. Samu ti ni mfumu me filisa muntu yango, bamambu yina yandi ke zonzaka ke vanda mfunu na meso ya bantu. Mutindu mosi mpe, samu ti ni Yehova filisaka Yesu na kuzonza na nkumbu ya yandi, bamambu yina yandi vanda zonza vandaka na lutumu.—Mat. 21:9; Luke 13:35.

8. Wapi mutindu nkumbu ya Yehova vandaka na Yesu tekila yandi kwiza awa na ntoto? (Kubasika 23:20, 21)

⁸ Biblia ke bokilaka Yesu “Ndinga” samu ti Yehova sadilaka yandi na kuzonza na bambazi mpe na bantu bamambu yina Yehova vanda zola ba zaba mpe ba sadila. (Yoa. 1:1-3) Ya lenda vanda ti Yesu vandaka mbazi yina Yehova filisaka samu na kukipe bantu ya Izraele ntangu ba vandaka na ntoto ya kuyuma. Ntangu Yehova zonzaka na bantu ya Izraele na kutumama na mbazi yango, yandi zonzaka mpe na bawu samu na yinki ba zola sala yawu. Yandi zonzaka: “Samu ti yandi ke sala na nkumbu ya munu.”a Kubasika 23:20, 21 ke zonzaka: “Munu, mu ke fidisa beno mbazi ya munu na mantwala ya beno, samu na kwendaka kengidila beno na nzila, mpe samu na kukotisa beno na kisika yina mu kubikilaka beno. Beno sala keba na ntadisi ya yandi. Beno tumama na yandi. Beno fwemisa yandi ve. Yandi ke lemvokila ve yimbi ya beno, samu ti yandi ke sala na nkumbu ya munu.” Yehova zonzaka yawu samu ti Yesu vanda zonza na kisika ya yandi mpe kaka ni yandi lakisa ti Yehova salaka bamambu ya mbote mpe ti Yehova ke santu. Ni na mutindu yayi nkumbu ya Tata vandaka na yandi.

“TATA PESA NKUMBU YA NGE NKEMBO”

9. Wapi mutindu nkumbu ya Yehova vandaka mfunu mingi samu na Yesu? Zonzila yawu.

⁹ Mutindu beto me zonzila yawu, tekila Yesu kwiza awa na ntoto nkumbu ya Yehova vandaka mfunu mingi samu na yandi. Ya ke na kamwisaka ve beto na kutala mutindu yandi lakisaka yawu na nyonso yina yandi salaka ntangu yandi vandaka awa na ntoto! Pene-pene ya nsuka ya kisalu ya yandi ya kusamuna, yandi salaka lusambu yayi: “Tata pesa nkumbu ya nge nkembo.” Na manima, Yehova pesaka mvutu na mbala mosi. Ndinga mosi ya ngolo katukaka na mazulu mpe zonzaka: “Mu me pesa yawu nkembo, mpe mu ke pesa dyaka yawu nkembo.”—Yoa. 12:28.

10-11. a) Wa’ faso Yesu pesaka nkembo na nkumbu ya Yehova? (Tala mpe kizizi.) b) Wa’ faso Yesu lakisaka ti bamambu nyonso yina Yehova salaka vanda mbote mpe ti nkumbu ya Yehova vandaka santu?

¹⁰ Wa’ faso Yesu pesaka nkembo na nkumbu ya Tata yandi? Yandi zonzaka na bantu ya nkaka bifu ya mbote ya Yehova mpe bamambu ya mbote yina yandi ke salaka. Kasi, yandi sukaka ve kuna, yandi vandaka mpe na nsatu ya kulakisa ti Yehova salaka bamambu nyonso ya mbote mpe ti Yehova ke santu.b Yandi lakisaka ti ya vandaka mfunu, ntangu yandi longaka na bilandi ya yandi mutindu ya kusambila. Yandi zonzaka: “Tata ya beto yina ke na mazulu, bika ti nkumbu ya nge vanda ya santu.”—Mat. 6:9.

¹¹ Samu na yinki Yesu vandaka na nsatu ya kulakisa ti Yehova salaka bamambu nyonso ya mbote mpe ti nkumbu ya Yehova ke santu? Samu ti na bilanga ya Edeni, Satana zonzaka bamambu ya luvunu na yina me tadila nkumbu ya Yehova Nzambi. Yandi zonzaka ti Yehova ke muntu ya luvunu mpe Yehova niminaka na Adami na Eva mambu ya mbote. (Kub. 3:1-5) Yandi zonzaka mpe ti mutindu ya Yehova ya kusala bamambu vandaka ve mbote. Bamambu nyonso ya luvunu yayi, bebisaka nkumbu ya Yehova. Na mantwala, na ntangu ya Yobi, yandi zonzaka ti ba yina ke sadilaka Yehova ke sadilaka kaka yandi samu na bansatu ya bawu mosi. Yandi zonzaka mpe ti ya ke ve na muntu yina ke zolaka mingi Yehova yina lenda ndima kutatamana na kusadila Yehova na kati ya bampasi. (Yobi 1:9-11; 2:4) Nani ke muntu ya luvunu? Yehova to Satana? Ntangu zolaka lakisa yawu.

“MU KE NA PESAKA LUZINGU YA MUNU”

12. Samu Yesu vandaka na luzolo ya ngolo samu na nkumbu ya Yehova, yinki yandi vandaka ya kubongama na kusala?

¹² Samu ti Yesu ke zolaka Yehova, yandi vandaka ya kubongama samu na kunwanina mpe kukumisa santu nkumbu ya Yehova. Yandi zonzaka: “Mu ke na pesaka luzingu ya munu.” (Yoa. 10:17, 18) Ya tsyeleka, yandi vandaka ya kubongama na kufwa samu na nkumbu ya Yehova.c Adami na Eva, yina vandaka bantu ya ntete ya kulunga pesaka Yehova mukongo mpe kumaka na kisika ya Satana. Kasi, na yina me tadila Yesu, yandi vandaka ya kubongama na kukwiza awa na ntoto mpe kulakisa ti yandi ke zolaka Yehova. Yandi lakisaka yawu, na kutumamaka na Yehova na yina yandi vanda sala mpe vanda zonza. (Ebr. 4:15; 5:7-10) Na ntangu yandi vandaka awa na ntoto yandi bikanaka ya kukangama na Yehova tii na lufwa na zulu ya yinti ya mpasi. (Ebr. 12:2) Ni na mutindu yayi, yandi lakisaka luzolo samu na Yehova mpe na nkumbu ya yandi.

13. Samu na yinki Yesu vandaka ya kulunga na kulakisa ti Satana ke muntu ya luvunu? (Tala mpe kizizi.)

¹³ Ndyatulu ya Yesu lakisaka ti Satana ke muntu ya luvunu, kasi Yehova ve. (Yoa. 8:44) Ya ke ve na muntu yina zaba Yehova mbote-mbote kulutila Yesu. Bamambu nyonso ya luvunu yina Satana zonzaka na nkumbu Yehova, kana ya vandaka na mwa matsyeleka, Yesu zola zaba yawu. Kasi, Yesu vandaka ya kubongama samu na kunwanina nkumbu ya Yehova. Ata ntangu ya vanda talana mutindu Yehova bikaka yandi, yandi vandaka ya kubongama na kufwa na kukwikama nyonso na kisika ya kupesa Yehova mukongo.—Mat. 27:46.d

“MU MANISAKA KISALU YINA NGE PESAKA MUNU NA KUSALA”

14. Wapi difuta Yehova pesaka Yesu samu yandi bikanaka ya kukangama?

¹⁴ Na lusambu ya yandi na nkokila tekila lufwa ya yandi, Yesu zonzaka: “Mu manisaka kisalu yina nge pesaka munu na kusala.” Yandi vandaka na kundima ti Yehova zola sakumuna yandi samu ti yandi bikanaka ya kukangama. (Yoa. 17:4, 5) Yandi salaka mambu ya mbote na kutula ntima na Yehova. Yehova bikaka ve yandi na kati ya ndyamu. (Bis. 2:23, 24) Yehova vumbulaka yandi mpe pesaka yandi kisika ya kuzanguka na mazulu. (Filp. 2:8, 9) Na manima, yandi bandaka kuyala mutindu Mfumu ya Kimfumu ya Nzambi. Yinki Kimfumu yango ke lungisa? Mvutu ke na kitini ya zole ya lusambu yina Yesu lakisaka na bilandi ya yandi, kisika yina beto ke tangaka: “Bika ti Kimfumu ya nge kwiza. Bika ti luzolo ya [Yehova] salama na ntoto, mutindu na mazulu.”—Mat. 6:10.

15. Yinki Yesu ke lungisa?

¹⁵ Ntangu me bikana kaka fioti yina Yesu ke kufwa bambeni ya Nzambi mpe kufwa bantu ya yimbi na Armagedoni. (Luz. 16:14, 16; 19:11-16) Na manima ya yawu, yandi ke losa Satana na “dibenga ya yinda,” kisika yina yandi lenda sala ata kima. (Luz. 20:1-3) Na kati ya bamvula 1 000 yina yandi ke yala, yandi ke nata kizunu na ntoto mpe ke nata bantu na kukuma ya kulunga. Yandi ke vumbula bantu ya kufwa. Yandi ke kumisa ntoto nyonso paradiso. Luzolo ya Nzambi ke lungana!—Luz. 21:1-4.

16. Wapi mutindu luzingu ke vanda na nsuka ya luyalu ya Yesu?

¹⁶ Wapi mutindu luzingu ke vanda na nsuka ya luyalu ya Yesu? Bantu ke kuma ya kulunga mpe disumu ke vanda dyaka ve. Bantu ke vanda dyaka ve na nsatu ya kulomba mulemvo ya masumu ya bawu na nzila ya ntalu ya kufuta, ya nganga-Nzambi, mpe ya muntu yina ke vutulaka kindiku na kati Nzambi na bantu. “Mbeni ya nsuka, lufwa, ke vanda dyaka ve.” Bantu ya kufwa ke vumbuka. Bantu nyonso ke kuma ya kulunga.—1 Kor. 15:25, 26.

17-18. a) Yinki ke salama na manima ya bamvula 1 000 ya luyalu ya Yesu? (b) Yinki Yesu ke sala na nsuka ya luyalu ya yandi? (1 Bakorinto 15:24, 28) (Tala mpe kizizi.)

¹⁷ Wapi mambu ya nkaka ke salama na nsuka ya luyalu ya Yesu? Ba ke zonzila dyaka ve mambu ya kukumisa santu nkumbu ya Yehova. Samu na yinki? Na bilanga ya Edeni, Satana zonzaka ti Yehova ke muntu ya luvunu mpe ti yandi ke ve na luzolo samu na bantu. Kubanda ntama, bantu yina ke sadilaka Yehova me lakisa mbala na mbala ti faso ya Yehova ya kutwadisa me lutila mbote. Na yawu, na manima ya bamvula 1 000 ya luyalu ya Yesu, nkumbu ya Yehova ke vanda dyaka ve na mvindu mpe ya ke talana pwelele ti Yehova ke Tata ya luzolo.

¹⁸ Na nsuka ya bamvula 1 000 ya luyalu ya Yesu, bantu nyonso ke zaba ti bamambu yina Satana zonzaka na yina me tadila Yehova vandaka luvunu. Yinki Yesu ke sala na nsuka ya luyalu ya yandi? Yandi ke landa kwandi dikulu ya Satana? Ve! (Tanga 1 Bakorinto 15:24, 28.) Yandi ke vutula Kimfumu na Tata ya yandi mpe ke tumama na yandi. Ya tsyeleka, Yesu ke ve mutindu Satana. Yesu ke ya kubongama samu na kubika bima nyonso, samu yandi ke zolaka mingi Tata ya yandi.

19. Samu na yinki nkumbu ya Yehova ke mfunu mingi samu na Yesu?

¹⁹ Ya ke ve na kamwisaka beto na yina Yehova zolaka pesa nkumbu ya yandi na Yesu! Yesu lakisaka na faso ya kulunga mutindu Tata ya yandi kele. Samu na yandi, ata kima me lutila mfunu na nkumbu ya Yehova. Yandi vandaka ya kubongama na kufwa samu na nkumbu yango mpe na nsuka ya luyalu ya yandi, yandi ke vutula nyonso na Yehova. Wa’ faso beto lenda landa kifwani ya yandi? Beto ke kuzwa mvutu na disolo yina ke landa.