Nkumbu ya Yehova ke mfunu samu na beto

1-2. Wa’ faso beto me zaba ti nkumbu ya Yehova vandaka mfunu mingi samu na Yesu?

NKUMBU ya Yehova vandaka mambu ya kulutila mfunu samu na Yesu. Ya ke ve na muntu yina me nwanina nkumbu ya Yehova kulutila Yesu. Mutindu beto talaka yawu na disolo yina me luta, Yesu vandaka ya kubongama na kufwa samu na kulakisa ti nkumbu ya Yehova ke santu mpe ti yandi ke salaka bamambu nyonso yina kele mbote. (Mrk. 14:36; Ebr. 10:7-9) Na nsuka ya luyalu ya Yesu, yandi ke vutula lutumu nyonso na Tata ya yandi, samu yandi zola ti Yehova kuzwa nkembo nyonso. (1 Kor. 15:26-28) Bamambu nyonso yina Yesu ke salaka na lakisa ti yandi ke zolaka mingi Yehova.

² Yesu kwizaka awa na ntoto na nkumbu ya Tata yandi. (Yoa. 5:43; 12:13) Yandi lakisaka nkumbu ya Tata ya yandi na bilandi ya yandi. (Yoa. 17:6, 26) Yandi longaka mpe salaka bimangu na nkumbu ya Tata ya yandi. (Yoa. 10:25) Mpe Yesu lombaka na Yehova na kukengidila bilandi ya yandi “samu na nkumbu ya [Yandi].” (Yoa. 17:11) Ya tsyeleka, nkumbu ya Yehova vanda mfunu mingi samu na Yesu. Na yawu, wa’ faso muntu lenda zonza ti yandi ke mukristo ya tsyeleka kana yandi zaba ve to ke sadilaka ve nkumbu ya Yehova?

3. Yinki beto ke zonzila na disolo yayi?

³ Samu ti beto ke bakristo ya tsyeleka, beto ke landaka kifwani ya Yesu na kulakisaka luzolo mpe buzitu na nkumbu ya Yehova. (1 Pi. 2:21) Na disolo yayi, beto ke tala samu na yinki Yehova pesaka nkumbu ya yandi na ba yina “ke samuna nsangu ya mbote ya Kimfumu.” (Mat. 24:14) Beto ke tala mpe samu na yinki nkumbu ya Yehova ke mfunu samu na mosi na mosi ya beto.

“DIKANDA SAMU NA NKUMBU YA NGE”

4. a) Wapi kisalu Yesu pesaka na bilandi ya yandi tekila yandi vutuka na mazulu? b) Na wapi kyuvu beto ke kuzwa mvutu?

⁴ Tekila Yesu vutuka na mazulu, yandi zonzaka na bilandi ya yandi: “Beno ke kuzwa ngolo ntangu mpeve ya santu ke kwiza na zulu ya beno, mpe beno ke vanda bambangi ya munu na Yeruzalemi, na Zude nyonso, na Samariya tii na kisika ya kulutila ntama ya ntoto.” (Bis. 1:8) Na yawu, ba zola samuna ve kaka na Izraele kasi mpe na bisika ya nkaka. Ya pesaka nzila na bantu ya makanda nyonso na kukuma bilandi ya Yesu. (Mat. 28:19, 20) Yandi zonza mpe: “Beno ke vanda bambangi ya munu.” Kasi bilandi ya malu-malu yayi, zola vanda kaka bambangi ya Yesu to ba zola zaba mpe nkumbu ya Yehova? Bisalu kikapu 15 ke sadisa beto na kuzwa mvutu.

5. Wa’ faso bantumwa mpe bakuluntu ya Yeruzalemi lakisaka ti bantu nyonso vandaka na nsatu ya kuzaba nkumbu ya Yehova? (Tala mpe kizizi.)

⁵ Na 49 N.B., bantumwa na bakuluntu vukanaka na Yeruzalemi samu na kutala kana ba yina ke ve Bazwife me bonga kuzenga kibakala samu na kukuma bakristo. Na nsuka ya disolo yango, Zaki yina ke leki ya Yesu zonzaka: “[Piere] me zonzila mbote-mbote mutindu Nzambi tulaka mbala ya ntete dikebi na makanda, samu na kubasisa na kati ya bawu dikanda samu na nkumbu ya yandi.” Na wapi nkumbu Zaki vanda zonzila? Na manima ya kuzonzila bamambu yina mbikudi Amose zonzaka, yandi bwelaka: “Samu ba yina me bikana sosa Yehova na matsyeleka nyonso, kintwadi na bantu ya makanda nyonso, bantu yina ba ke bokilaka na nkumbu ya munu, Yehova muntu me zonza.” (Bis. 15:14-18) Ba zola longoka ve kaka kuzaba Yehova kasi, ba zola ‘bokila bawu na nkumbu ya yandi.’ Ya zola zonza, ba zola lwata nkumbu ya Nzambi mpe ba zola zaba bawu na nkumbu yango.

6-7. a) Samu na yinki Yesu kwizaka awa na ntoto? b) Wapi mambu ya nkaka ya kulutila mfunu nataka Yesu na ntoto?

⁶ Nkumbu ya Yesu zola zonza ‘Yehova ke muvuukisi.’ Mpe ni na nzila ya Yesu, Yehova ke kuvuukisa bantu nyonso yina ke lakisaka kiminu na yandi mpe na mwana ya yandi. Yesu kwizaka na ntoto na kupesa luzingu ya yandi samu na bantu. (Mat. 20:28) Na nzila ya ntalu ya kufuta, bantu ke na bweso ya kuzwa mulemvo ya masumu ya bawu mpe ya kuzwa luzingu ya ntangu nyonso.—Yoa. 3:16.

⁷ Kasi, samu na yinki bantu vandaka na nsatu ya ntalu ya kufuta? Samu na mambu yina salamaka na bilanga ya Edeni. Mutindu beto me tala yawu na disolo yina me luta, Bibuti ya beto ya ntete Adami na Eva pesaka Yehova mukongo mpe bebisaka bweso ya kuzinga ntangu nyonso. (Kub. 3:6, 24) Kasi, ya vandaka dyaka na mambu ya nkaka ya kulutila mfunu na luvuukusu ya bantu. Ni luvunu yina ba zonzilaka na nkumbu ya Yehova. (Kub. 3:4, 5) Na yawu, luvuukusu ya bana ya Adami na Eva, vanda kwelana na mambu yina salamaka na bilanga ya Edeni, kukumisa santu nkumbu ya Yehova.

8. Na wapi bamambu ba yina nyonso ke lakisa kiminu samu na Yesu me fwana kuzaba?

⁸ Ba yina nyonso ke lakisa kiminu na Yesu, ya vanda Bazwife to ba yina ke ve Bazwife, ba fwana kuzaba ti ni na Yehova ke katukaka luvuukusu. (Yoa. 17:3) Kaka mutindu Yesu, kulwata nkumbu ya Yehova zola lakisa ba ke banani. Ya zola vanda mpe mfunu samu na bawu na kubakula mfunu ya kukumisa santu nkumbu ya Yehova. (Bis. 2:21, 22) Bilandi nyonso ya kukwikama ya Yesu, me fwana kulongoka na kuzaba Yesu kasi mpe Yehova. Ni na yawu, yandi sukisaka lusambu yina ke na Yoane kikapu 17 na bamambu yayi: “Mu me zabisa bawu nkumbu ya nge, mpe mu ke zabisa yawu, samu luzolo yina nge zolaka munu vanda na kati ya bawu mpe munu na bumosi na bawu.”—Yoa. 17:26.

“BENO KE BAMBANGI YA MUNU”

9. Wa’ faso beto lenda lakisa ti nkumbu ya Yehova ke mfunu mingi samu na beto?

⁹ Bilandi nyonso ya Yesu zola sala ti mambu ya kukumisa santu nkumbu ya Yehova vanda mfunu samu na bawu. (Mat. 6:9, 10) Ba me fwana kulakisa ti nkumbu ya Yehova ke na zulu ya bankumbu nyonso. Mpe kulakisa na ndyatulu ya bawu ti nkumbu yango ke mfunu mingi. Kasi, wa’ faso beto lenda tula diboko na kumisa santu nkumbu ya Yehova mpe kusukula yawu na luvunu nyonso yina Satana zonzaka na nkumbu yango?

10. Yinki bikapu 42 tii na 44 ya buku ya Izayi ke na longaka beto? (Izayi 43:9; 44:7-9) (Tala mpe kizizi.)

¹⁰ Bikapu 42 tii na 44 ya Izayi ke longaka beto mutindu beto lenda sala samu na kukumisa santu nkumbu ya Yehova. Na bikapu yango, Yehova ke na lombaka na ba yina ke sambilaka ve yandi, na kulakisa kana banzambi ya bawu kele moyo. Kasi yandi yufulaka, ya ke kwandi na bantu yina lenda pesa kimbangi na banzambi yango? Ata muntu vandaka na makoki ya kusala yawu. Izayi 43:9 ke zonzaka: “Bika ti bayinsi nyonso kuvukana, mpe ti bantu makanda ya bantu kuyonzama! Nani na kati ya bawu bikulaka na mambu yayi? Ba nani vwandaka bantu ya ntete na kubikula yawu? Bika ti bawu kulakisa bambangi ya bawu, mpe ti bawu kulakisa mambu ya bawu ya kudedama. Bika ti ba kuwa bawu mbote, mpe ti ba kutuba: ‘Ee! ya kele ya tsyelika’! mpe Izayi 44:7-9 ke zonzaka: Nani yina kele mutindu munu? Yandi looka! Yandi samuna yawu, yandi zabisa munu mambu nyonso yina me salama, katuka ntangu yina mu yidikaka bantu ya ntete! Yandi tuba mpe mambu yina ke salama na bilumbu yina ke kwiza. Beno bantu ya munu, beno vwanda ve na boma, beno tekita ve, mu zabisaka beno yawu ntama, mu salaka ti beno kuzaba yawu? Beno kele bambangi ya munu. Ya kele dyaka na Nzambi ya nkaka kana munu ve? Ve, mu kele ditadi ya nene, mu zaba Nzambi ya nkaka ve. Bantu yina ke yidikaka banzambi ya biteki, bawu nyonso kele kaka mpamba, biteki ya bawu ya ntalu ke na ndandu ve, yawu mosi kele bambangi ya bawu, yawu ke talaka ve, yawu zaba kima ve, bawu ke tala nsoni.”

11. Yinki Yehova ke na zonzaka na dikanda ya yandi na Izayi 43:10-12?

¹¹ Izayi 43:10-12 ke zonzaka: “Bambangi ya munu ni beno bantu ya munu, beno na kisyelo ya munu yina mu soolaka, beno zaba yawu, beno kukwikila munu mpe ti beno kubakula ti ni munu: Tekila munu, Nzambi ya nkaka vwandaka ve, mpe na manima ya munu, ya ke vwanda ve na Nzambi ya nkaka. Ni [Yehova] me tuba yawu. Kaka ni munu, ni munu kele [Yehova], mpe kana ni munu ve, ya kele ve na muvuukisi ya nkaka. Ni munu zonzaka mambu yayi, ni munu ke vuukisaka mpe ni munu bikulaka yawu, kasi ya kele ve nzambi ya nzenza na kati ya beno me sala yawu, beno kele bambangi ya munu, ni munu kele Nzambi, ni [Yehova] me tuba yawu.” Yehova zonzaka na dikanda ya yandi: “Beno kele bambangi ya munu, ni munu kele Nzambi.” Yandi lombaka na bawu na kupesa mvutu na kyuvu: “Ya kele dyaka na Nzambi ya nkaka kana munu ve?” (Iza. 44:8) Beto ke na bweso ya nene ya kupesa mvutu na kyuvu yayi. Nzonzolo mpe ndyatulu ya beto lenda lakisa ti kaka ni Yehova ke Nzambi ya matsyeleka. Nkumbu ya yandi ke na zulu ya bankumbu nyonso. Ata ti Satana ke na salaka beto tiya, beto lenda lakisa na faso ya beto ya kudyatila ti beto ke zolaka Yehova, mpe beto ke bikana kaka ya kukangama na yandi. Kusala yawu, ke pesa beto bweso ya kutula diboko na kumisa santu nkumbu ya Yehova.

12. Wapi mutindu mbikudulu yina ke na Izayi 40:3, 5 salamaka?

¹² Ntangu beto ke nwaninaka nkumbu ya Yehova, beto ke landaka kifwani ya Yesu. Izayi bikulaka mpe ti ya ke na muntu yina zola “yidika nzila samu na Yehova.” (Iza. 40:3) Wapi mutindu mambu yayi lunganaka? Yoane Mubotiki yidikaka nzila samu na Yesu, yina kwizaka awa na ntoto mpe zonzaka na nkumbu ya Yehova. (Mat. 3:3; Mrk. 1:2-4; Luke 3:3-6) Mbikudulu yango bwelaka: “Nkembo ya [Yehova] ke talana.” (Iza. 40:5) Wapi mutindu ya talanaka? Ya ke ntangu Yesu vandaka awa na ntoto, yandi landaka mbote-mbote kifwani ya Tata ya yandi, ya vanda talana mutindu Yehova yandi mosi vandaka awa.—Yoa. 12:45.

13. Wa’ faso beto lenda landa kifwani ya Yesu?

¹³ Mutindu Yesu, beto ke bambangi ya Yehova. Beto ke lwataka nkumbu ya yandi mpe beto ke zonzaka na bantu nyonso bamambu nyonso ya kitoko yina yandi ke na salaka. Beto me fwana na kusuka ve kaka kuna, kasi beto me fwana kuzonzila na bantu bamambu nyonso yina Yesu salaka, samu na kukumisa santu nkumbu ya Yehova. (Bis. 1:8) Yesu ke mbangi ya Yehova ya ntete mpe beto ke landaka kifwani ya yandi. (Luz. 1:5) Kasi yinki nkumbu ya Yehova zola zonza samu na mosi na mosi ya beto?

YINKI NKUMBU YA YEHOVA ZOLA ZONZA SAMU NA BETO

14. Mutindu ke zonzaka yawu Nkunga 105:3, yinki nkumbu ya Yehova ke salaka beto?

¹⁴ Beto ke bulaka ntulu na nkumbu ya Yehova. Nkunga 105:3 ke zonzaka: “Beno tala kilengi na Nkumbu ya yandi ya [santu]! Beno yangalala na bantima, beno bayina ke na kusosa [Yehova]!” Ntangu beto ke bulaka ntulu na nkumbu ya Yehova, ya ke salaka yandi kilengi. (Yer. 9:23, 24; 1 Kor. 1:31; 2 Kor. 10:17) Beto ke na kilengi mingi samu ti beto ke na bweso ya kuzonzila na bantu ya nkaka ti Yehova ke santu mpe nyonso yina yandi ke salaka ke mbote. Beto me fwana kuvanda ve na nsoni ya kuzonzila na bampangi ya beto ya lekole, ya kisalu mpe bantu yina ke vandaka pene-pene na beto ti beto ke Bambangi ya Yehova. Satana zola ti beto zonzila dyaka ve nkumbu ya Yehova. (Yer. 11:21; Luz. 12:17) Na kutala, Satana na bambikudi ya luvunu zola ti bantu zimbana nkumbu ya Yehova. (Yer. 23:26, 27) Kasi beto, ba yina ke zolaka nkumbu yango, beto ke sepelaka na yawu “bantangu nyonso.”—Nku. 5:11; 89:16.

15. Yinki zola zonza kubokila nkumbu ya Yehova?

¹⁵ Beto ke bikaka ve kubokila nkumbu ya Yehova. (Yoe. 2:32; Rom. 10:13, 14) Kubokila nkumbu ya Yehova ke ve kaka kuzaba to kubokila nkumbu yango. Ya zola zonza kusosa kuzaba mutindu ya muntu yandi kele, kutula yandi ntima, kusosa lubakusu ya yandi, mpe malongi ya yandi. (Nku. 20:7; 99:6; 116:4; 145:18) Ya ke mpe kuzonzila nkumbu ya yandi, bifu yandi na bantu ya nkaka, samu na kunata bawu na kubalula ntima mpe na kusala nyonso yina ba lenda sala samu na kuvanda ya kundimama na Yehova.—Iza. 12:4; Bis. 2:21, 38.

16. Wa’ faso beto lenda lakisa ti Satana ke muntu ya luvunu?

¹⁶ Beto ke ya kubongama samu na kutala mpasi samu na nkumbu ya Yehova. (Zaki 5:10, 11) Ntangu beto ke bikanaka ya kukangama na Yehova na kati ya bampasi, beto ke lakisaka ti Satana ke muntu ya luvunu. Na ntangu ya Yobi, Satana zonzaka bamambu ya luvunu na yina me tadila bisadi ya Yehova. Yandi zonzaka: “Nyonso yina kele na muntu, yandi lenda pesa yawu samu na kuvuukisa luzingu ya yandi.” (Yobi 2:4) Satana zonzaka ti bantu ke sadilaka Yehova ntangu bamambu ke mbote samu na bawu. Kasi, ntangu ba ke kutanaka na bamambu ya mpasi, ba ke bikaka Yehova. Kukwikama ya Yobi lakisaka ti Satana ke muntu ya luvunu. Beto mpe ke na bweso ya kulakisa ti Satana ke muntu ya luvunu. Wa’ faso beto lenda sala yawu? Kupesa ve Yehova mukongo ata bankwamusu ya Satana. Beto vanda na kundima ti Yehova ke kengidila beto samu na nkumbu ya yandi.—Yoa. 17:11.

17. Mutindu 1 Piere 2:12 ke zonzaka yawu, wapi yina ke faso ya nkaka ya kukembila Yehova?

¹⁷ Beto ke lakisaka buzitu na nkumbu ya Yehova. (Bin. 30:9; Yer. 7:8-11) Samu beto ke zonzaka na kisika ya Yehova mpe ke ya kulwata nkumbu ya yandi, beto lenda kembila nkumbu yango to kulosa mvindu ya zulu ya yawu. 1 Piere 2:12 ke zonzaka: “Beno vwanda na nkadulu ya mbote na ntwala ya bantu yina zaba ve Nzambi. Na yina, ata bawu zonza mambu ya yimbi na yina me tadila beno ti beno kele bantu ya yimbi, bawu ke zaba bisalu ya beno ya mbote, mpe ke kembisa Nzambi na kilumbu yina yandi ke kwiza.” Ata ti beto ke bantu ya masumu, beto ke salaka nyonso yina beto na makoki ya kusala samu na kukembila Yehova na nzonzolo mpe na ndyatulu ya beto. Kusala yawu, ke mutindu ya kukembila Yehova.

18. Wa’ faso beto lenda lakisa ti nkumbu ya Yehova ke mfunu samu na beto? (Tala mpe noti ya yisi ya paje.)

¹⁸ Nkumbu ya Yehova ke mfunu mingi kuluta nkumbu ya beto. (Nku. 138:2) Samu na yinki ya ke mfunu? Samu ti ntangu beto ke salaka bamambu ya mbote samu na kusepelisa Yehova, bambala mingi bantu yina ke zolaka ve yawu lenda zonza bamambu ya yimbi na yina me tadila beto.a Yesu vandaka ya kubongama samu na kufwa mutindu kimpumbulu samu na kukembila nkumbu ya Tata ya yandi. Yandi bikaka ve ti bamambu yina bantu vanda kanisa na yina me tadila yandi, nata yandi na kuvanda na manyongo ya kulutila. (Ebr. 12:2-4) Yandi vandaka ya kubongama samu na kusala luzolo ya Tata ya yandi.—Mat. 26:39.

19. Yinki nkumbu ya Yehova ke salaka nge mpe samu na yinki?

¹⁹ Beto ke bulaka ntulu na nkumbu ya Yehova, mpe ntangu ba ke bokilaka beto Bambangi ya Yehova, ya ke sepelisaka beto. Samu ti nkumbu ya Yehova ke mfunu samu na beto, beto ke tatamana na kukembila yandi, ata ti bantu ya nkaka ke talaka ti ya ke mambu ya mpamba. Dyaka, nkumbu ya Yehova ke ya kulutila ya beto. Na yawu, beto tatamana na kukembila nkumbu yango ata bankwamusu ya Satana. Kana beto sala yawu, beto ke lakisa ti nkumbu ya Yehova ke mfunu mingi samu na beto mutindu ya kele samu na Yesu.