Wapi mutindu Biblia lenda sadisa munu?—Kitini 1: Sosa kuzaba yina ke na kati

Briana, yina ke na bamvula 15 me zonza: “Mu vanda sosa kutanga Biblia, kasi kutala nene ya yawu pesaka munu boma ya kutanga dyaka yawu.”

Nge mpe ke kanisaka faso yina? Disolo yayi lenda sadisa nge!

• Samu na yinki kutanga Biblia?

• Wapi mutindu mu me fwana kutanga Biblia?

• Yina bantwenya ya nkaka ke kanisaka

Samu na yinki kutanga Biblia?

Dikanisi ya kutanga Biblia ke lembisaka kwandi nge? Kana ya ke faso yina, beto ke sadisa nge. Ntangu ya nkaka nge ke kanisaka ti Biblia ke buku ya nene mingi yina ke na bapaje kuluta 1 000, yina ke na bisoni ya fioti-fioti mpe yina ke ve na bizizi. Nge lenda fwanisa ve yawu na tele mpe na bavideo.

Kasi kanisa ntete na mambu yayi: Kana nge me kuzwa kima mosi yina ke na bimvwama na kati, nge ke fungula yawu samu na kutala bima yina ke na kati. Faso yina ve?

Biblia ke mutindu kima yina ke na bimvwama na kati. Ya lenda sadisa nge na kukuma na mayela yina lenda sadisa nge na:

• Kubaka mikanu ya mbote

• Kuwisana mbote-mbote na bibuti ya nge

• Kuzwa bandiku ya mbote

• Kununga basusi

Samu na yinki Biblia ke kaka na mfunu mingi tii bubu yayi ata ya kele buku mosi ya ntama mingi? Ya ke samu ti “nyonso yina kele ya kusonama na Dibuku ya Nzambi, katukaka na Nzambi.” (2 Timote 3:16) Ya zola zonza ti malongi yina ke na kati ya Biblia katukaka na kisika yina malongi ya kulutila mbote ke katukaka.

Wapi mutindu mu me fwana kutanga Biblia?

Mutindu ya ntete: Banda kutanga Biblia na buku ya kubanda tii na nsuka. Ya ke sadisa nge na kuzaba na bunkufi mambu yina ke na kati ya Biblia. Nge lenda tanga Biblia na bafaso mingi. Beto tala bifwani zole:

• Biblia ke na babuku ya fioti-fioti 66. Na yawu nge lenda banda na Kubanda yina ke buku ya ntete, tii nge ke kuma na buku ya nsuka, Luzabusu.

• Nge lenda tanga Biblia na kulandaka mutindu yina bamambu lutilaka.

Yina nge lenda sala: Appendice A7 yina ke na kati ya Biblia La Bible. Traduction du monde nouveau ke zonzilaka mutindu bamambu lutilaka na luzingu ya Yesu ntangu yandi vandaka na ntoto.

Mutindu ya zole: Soola disolo mosi yina ke na zonzilaka mambu ya mpasi yina me kumina nge. Na kifwani:

• Nge ke na sosaka kwandi bandiku ya mbote? Tanga disolo ya Yonatani na Davidi. (1 Samuele, bikapu 18-20) Mpe sadila kitini “Comment se faire des amis fidèles” samu na kutala bileso yina lenda vanda mfunu samu na nge.

• Nge ke kwandi na nsatu ya kukanga ntima na mantwala ya mutambu? Tanga disolo ya Yozefi yina ke zonzilaka mutindu yandi kimaka mutambu. (Kubanda, kikapu 39) Mpe sadila kitini “Comment résister à la tentation? Joseph—Partie 1” mpe “Accusé à tort! Joseph—Partie 2” samu na kutala bileso yina lenda vanda mfunu samu na nge.

• Nge ke na nsatu ya kuzaba faso lusambu lenda sadisa nge? Tanga disolo ya Nehemi. (Nehemi, kikapu 2) Mpe sadila kitini “Dieu a répondu à sa prière” samu na kutala bileso yina lenda vanda mfunu samu na nge.

Yina nge lenda sala: Ntangu nge ke tanga Biblia, soola kisika yina ke ve na makelele, samu nge tula mbote-mbote dikebi na mambu yina nge ke tanga.

Mutindu ya tatu: Soola disolo mosi ya Biblia to kikapu mosi ya Bankunga, tanga yawu mpe na manima sosa mutindu nge lenda sadila yawu na luzingu ya nge. Nge lenda yufula nge mosi byuvu yayi na manima ya kutanga:

• Samu na yinki Yehova salaka ti ba sonika mambu yayi na kati ya Biblia?

• Yinki ya ke na lakisaka munu na kimuntu ya Yehova to mutindu ya yandi ya kusala bamambu?

• Wapi mutindu mu lenda sadila mambu yayi na luzingu ya munu?

Yina nge lenda sala: Nge lenda sadila Biblia ya malu-malu La Bible. Traduction du monde nouveau, yina ke sadisa nge na kutala bavideo, ba cartes mpe bima mingi ya nkaka yina lenda sadisa nge na kuzola dyaka mingi kutanga ya nge ya Biblia.