Wapi mutindu Biblia lenda sadisa munu?—Kitini 2: Yina nge lenda sala samu na kusepela na kutanga Biblia

Ntwenya mosi na nkumbu ya Will zonzaka: “Kutanga Biblia lenda lembisa nge kana nge me zaba ve faso ya mbote ya kutanga yawu.”

Nge ke na zolaka kuzaba yinki ya kusala samu nge sepela na kutanga Biblia? Disolo yayi ke sadisa nge.

• Kota na disolo ya Biblia

• Sosa kuzaba mbote-mbote

• Yinki bantwenya ya nkaka ke zonzaka

Kota na disolo ya Biblia

Sala nete nge ke na kati ya disolo yango ya Biblia. Nge lenda sala mutindu yayi:

1. Soola disolo mosi ya Biblia yina nge ke zolaka kulongoka. Nge lenda baka mambu mosi yina ke na lutaka na kati ya Biblia to kikapu mosi ya babuku ya Matayi, Marke, Luke to Yoane, to nge lenda soola mosi ya masolo yina ke na kati ya ‘Biblia ke na tangamaka faso na teatre’ na jw.org.

2. Tanga disolo yango. Nge lenda tanga yawu nge mosi, na bampangi ya nge to na bantu ya dikanda ya nge. Mosi lenda tanga disolo mpe bampangi ya nkaka lenda vanda bantu ya nkaka yina ke na na zonzaka na kati ya disolo.

3. Nge lenda meka kusala mambu yayi:

   • Sala bizizi ya disolo yango. To nge lenda sala bizizi yina ke zonzila faso bamambu ke na landasanaka na disolo. Sonika na yisi ya konso kizizi bamambu yina ke na lutaka.

   • Ntangu nge ke na tangaka disolo ya muntu mosi yina lakisaka kiminu, sonika bifu ya yandi, mambu yina yandi salaka mpe balusakumunu yina yandi kuzwaka.

   • Sala nete disolo yina nge ke na tangaka me salama bubu yayi. Sonika faso mosi na mosi ya ba yina ke na kati ya disolo zola zonzila yawu, mpe sala mutindu nge ke na yufulaka bawu byuvu samu ba zonza faso bamambu me luta.

   • Ntangu nge ke na tangaka disolo ya muntu yina bakaka mukanu ya yimbi, sosa na kukanisa faso bamambu zola lutila kana yandi bakaka mukanu ya mbote. Na kifwani, kanisa na ntangu yina ntumwa Piere mangaka Yesu. (Marke 14:66-72) Wapi mukanu yandi zola baka samu bamambu luta na faso ya mbote?

   • Kana nge ke zolaka kusonika, nge lenda sonika na banzonzolo ya nge mosi faso bamambu salamaka na disolo mosi ya Biblia mpe bileso yina nge lenda benda na disolo yango.—Baroma 15:4.

     

Sosa kuzaba mbote-mbote

Kana nge me sosa kuzaba mbote-mbote ata bamambu ya fioti-fioti, ya ke sadisa nge na kuzwa matadi ya ntalu yina vandaka ya kubumbana. Bantangu ya nkaka mot mosi to zole yina ke na disolo ya Biblia lenda sadisa nge na kuzaba mambu mingi.

Na kifwani, nge lenda fwanisa mambu yina ke na Matayi 28:7 na yina ke na Marke 16:7.

• Samu na yinki ntangu Marke zonzaka ti Yesu zola talana na bilandi ya yandi, yandi bwelaka “mpe na Piere”?

• Kima yina lenda sadisa na kuzwa mvutu: Marke vandaka ve kisika bamambu yayi lutaka. Ya lenda vanda ti ni Piere zonzilaka yandi yawu.

• Kimvwama yina ke ya kubumbana: Samu na yinki ya salaka Piere kilengi na kuzaba ti Yesu zola talana dyaka na yandi? (Marke 14:66-72) Wapi mutindu Yesu lakisaka ti yandi vandaka ndiku ya tsyeleka samu na Piere? Wapi mutindu nge lenda landa kifwani ya Yesu, mpe kukuma ndiku ya mbote samu na bampangi?

Ntangu nge ke salaka ti Masonoko ya Biblia kuma moyo, mpe nge ke sosaka kuzaba yawu mbote-mbote, nge ke sepela na kutanga ya nge ya Biblia