Bilandi me kuzwa mpeve ya santu

Bilumbu 10 na manima ya kuvutuka ya Yesu na zulu, bilandi ya yandi kuzwaka mpeve ya santu. Ya vandaka na kilumbu ya mukembo ya Pantekote 33 ya N.B., bantu katukaka bisika mingi mpe kwizaka na Yeruzalemi samu na kusala mukembo yayi. Bilandi pene-pene ya 120 vukanaka kintwadi na kati ya yinzo mosi na etaje. Na mbala mosi, mambu mosi ya ngitukulu salamaka. Kima mosi yina vandaka mutindu tiya basikaka na zulu ya yintu ya konso kilandi, mpe ba bandaka kuzonza bandinga mingi. Makelele mosi yina vandaka mutindu makelele ya mupepe ya ngolo wakanaka na kati ya yinzo.

Banzenza yina kwizaka na Yeruzalemi kuwaka makelele yango, ba kimaka mbangu na yinzo yina samu na kutala yinki vanda luta kuna. Ba pamukaka na kutala ti bilandi vanda zonza na bandinga ya bawu. Ba vanda zonza: ‘Bantu yayi ke bantu ya Galile. Wa’ faso ba ke na zonzaka na bandinga ya beto?’

Piere na bantumwa ya nkaka telamaka na mantwala ya bantu nyonso yina vandaka kuna. Piere zonzaka na bawu faso Yesu kufwaka mpe ti Yehova vumbulaka yandi na lufwa. Piere bwelaka: ‘Ntangu yayi Yesu ke na mazulu na diboko ya kibakala ya Tata, mpe yandi pesaka Yesu mpeve ya santu mutindu yandi pesaka nsilulu. Ni na yina beno ke na talaka mpe ke na kuwaka bimangu yayi.’

Bamambu yina Piere zonzaka simbaka bantima ya bantu yina vanda kuwa yandi, mpe ba zonzaka: “Yinki beto me bonga kusala?” Piere zonzaka na bawu: ‘Beno balula bantima mpe beno kuzwa mbotokolo na nkumbu ya Yesu. Beno mpe ke kuzwa dikabu yayi, yina ke mpeve ya santu.’ Kaka kilumbu yina, bantu 3 000 kuzwaka mbotokolo. Banda kilumbu yina, bilandi na Yeruzalemi bandaka kukuma mingi. Na lusalusu ya mpeve ya santu, bantumwa salaka bimvuka samu na kulonga bilandi bamambu yina Yesu lombaka na bawu na kusala.