Kento mosi na dibulu ya maza

Ntangu fioti na manima ya mukembo ya Pake, Yesu na bilandi ya yandi lutaka na Samariya ntangu ba vanda vutuka na Galile. Pene-pene na mbanza ya Sishare, Yesu telamaka na kisika yina ba vanda bokilaka dibulu ya Yakobi. Ntangu yandi vanda pema kuna, bilandi ya yandi kwendaka na mbanza samu na kusumba madya.

Kento mosi kwizaka teka maza. Yesu zonzaka na yandi: “Pesa munu maza ya kunwa.” Kento zonzaka na yandi: ‘Samu na yinki nge ke na zonzisaka munu? Mu ke muntu ya Samariya. Bazwife ke zonzisaka ve bantu ya Samariya.’ Yesu zonzaka na yandi: ‘Kana nge zabaka nani mu kele, nge zola lomba munu maza ya kunwa, mu zola pesa nge maza yina ke pesaka luzingu.’ Kento zonzaka na yandi: ‘Yinki nge ke na sosaka kuzonza? Nge ke ve na kima ya kubakila maza.’ Yesu zonzaka na yandi: ‘Muntu yina ke kunwa maza yina mu ke pesa yandi ke vanda ata fioti ve dyaka na nsatu ya maza.’ Kento zonzaka na yandi: “Mfumu, pesa munu maza yango.”

Na manima Yesu zonzaka na yandi: ‘Nata bakala ya nge awa.’ Yandi zonzaka: ‘Mu ke ve na bakala.’ Yesu vutulaka: ‘Nge me zonza mambu ya tsyeleka. Nge me vanda ya kukwela bambala 5, mpe bakala yina ke na zingaka na nge bubu yayi, beno kele ve ya kukwelana.’ Kento yango zonzaka: ‘Nge ke mbikudi. Bantu ya bwala ya munu ke kwikilaka ti beto lenda sambila Nzambi na mongo yayi, kasi Bazwife ke zonzaka ti beto lenda sambila Nzambi kaka na Yeruzalemi. Mu ke na kiminu ti ntangu Masiya ke kwiza, yandi ke zonza na beto mutindu ya kusambila.’ Na manima, Yesu zonzaka na yandi mambu yina yandi vandaka nabunu yandi zonza na muntu ya nkaka: ‘Mu ke Masiya.’

Kento yango vutukaka mbangu na mbanza mpe zonzaka na bantu ya Samariya: ‘Mu kanisa ti mu me tala Masiya. Yandi zaba mambu nyonso ya luzingu ya munu. Beno kwiza tala yandi!’ Ba landaka yandi tii na dibulu mpe ba kuwaka malongi ya Yesu.

Bantu ya Samariya bokilaka Yesu na kubikana na mbanza ya bawu. Na kati ya bilumbu zole, yandi longaka kuna mpe bantu mingi bandaka kutula kiminu na yandi. Ba zonzaka na kento ya Samariya yina: ‘Na manima ya kuwa bakala yayi, beto me ndima ti yandi ke ya tsyeleka muvuukisi ya yinza.’