Yesu me sala bimangu mingi

Yesu kwizaka na ntoto samu na kusamuna nsangu ya mbote ya Kimfumu ya Nzambi. Samu na kulakisa mambu yina Yesu ke sala ntangu yandi ke kuma mfumu, Yehova pesaka Yesu mpeve ya santu samu na kusala bimangu. Yandi vanda belusa kimbevo ni kimbevo. Bisika yina yandi vanda kwenda, bantu ya bimbevo vanda kwiza na sika ya yandi samu yandi sadisa bawu, mpe yandi vanda belusa bawu nyonso. Bantu ya meso ya kufwa vanda tala, bantu ya makutu ya kufwa vanda kuwa, bantu ya makulu ya kufwa vanda tambula, mpe bantu yina bampeve ya yimbi vanda twadisaka, kuzwaka kimpwanza. Ata ntangu ba vanda simbaka kaka nsongi ya kinkuti ya yandi, ba vanda belukaka na bimbevo ya bawu. Bantu vanda landaka Yesu bisika nyonso yina yandi vanda kwendaka. Yesu vanda bingisaka ve bantu, ata na ntangu yina yandi vandaka na nsatu ya kuvanda yandi mosi.

Kilumbu mosi, ba natinaka Yesu na yinzo yina yandi vandaka, muntu ya makulu ya kufwa. Kasi samu yinzo vandaka ya kufuluka na bantu, nzila vandaka ve. Na yawu, ba tobolaka yinzo yango na zulu mpe ba kulumusaka muntu yango na sika ya Yesu. Na manima Yesu zonzaka na bakala yango: ‘Telama mpe tambula.’ Ntangu bakala yango telamaka, bantu kamwaka.

Kilumbu ya nkaka, ntangu Yesu kotaka na bwala mosi, bantu 10 yina vandaka na kimbevo ya bwazi telamaka na ntama mpe vanda zonza na ndinga ya ngolo: ‘Yesu, sadisa beto!’ Na ntangu yina, bantu yina vandaka na kimbevo ya bwazi vandaka ve na luve ya kuvanda pene-pene na bantu ya nkaka. Yesu zonzaka na babakala yayi na kukwenda na tempelo, samu Musiku ya Yehova vanda zonzaka ti bantu yina me beluka na kimbevo ya bwazi fwana kukwenda na tempelo. Na nzila ya kukwenda na tempelo, ba belukaka. Ntangu mosi ya bantu yayi kwizaka zaba ti yandi me beluka, yandi vutukaka na sika ya Yesu samu na kuvutula yandi matondo mpe kukembila Nzambi. Na kati ya bantu 10 yayi, kaka mosi vutulaka Yesu matondo.

Kento mosi yina lutisaka bamvula 12 na kati ya kimbevo ya yandi vandaka dyaka ve na kivuvu ya kubeluka. Yandi kwizaka na manima ya Yesu na kati ya bantu mpe simbaka nsongi ya kinkuti ya Yesu. Na mbala mosi, yandi belukaka. Ntangu ya salamaka, Yesu yufulaka: “Nani me simba munu?” Kento yango vandaka na boma mingi, kasi yandi kwizaka na mantwala ya Yesu mpe zonzaka na yandi matsyeleka. Yesu kindisaka yandi mpe zonzaka na yandi: ‘Mwana ya munu ya kento, kwenda na kizunu.’

Mfumu mosi na nkumbu ya Zayiruse bondilaka Yesu: ‘Kwiza na yinzo ya munu! Mwana ya munu ya fioti ya kento ke na kimbevo ya ngolo.’ Kasi tekila Yesu kuma na yinzo ya Zayiruse, mwana yango kufwaka. Ntangu Yesu kumaka, yandi talaka bantu mingi kwizaka samu na kudila na dikanda yina. Yesu zonzaka na bawu: ‘Beno kudila ve, yandi ke kaka na lalaka.’ Na manima, Yesu simbaka diboko ya mwana yango mpe zonzaka: “Mwana, telama!” Na mbala mosi yandi telamaka, mpe Yesu zonzaka na bibuti ya yandi na kupesa yandi kima ya kudya. Meka na kukanisa na yina ya salaka bibuti ya yandi na ntima!