Mukanda samu na kuzaba mingi mambu yina ba me zonzila na Mukanda ya lukutakanu luzingu mpe kisalu
2-8 Janvier
BIMVWAMA YA BIBLIA | 2 BAMFUMU 22-23
“Samu na yinki ya ke mbote na kuvanda ya kukuluka?”
w00-F 15/9 29-30
Samu Yoziasi vandá muntu ya kukuluka, Yehova vandá na yandi
Na suka-suka, bantu yina ke bongisá tempelo me banda kusala. Ntangu ya nkaka Yoziasi ke na vutulá Yehova matondo na yina ba ke na yidiká bamambu ya yimbi yina bankooko ya yandi ya nkaka salá na yinzo ya Yehova. Kisalu ke na kwendá na mantwala, mpe Shafani me kwiza tala Yoziasi samu na kupesa yandi nsangu ya kisalu. Kasi yandi ke na rulo na diboko. Yinki ke na kati? Shafani me zonza na Yoziasi ti nganga-nzambi ya nene Hilkia me kuzwa ‘mukanda ya Nsiku ya Yehova yina yandi pesaka na nzila ya Moyize.’ (2 Bansangu 34:12-18) Ya vandá mambu ya kitoko. Ntangu ya nkaka, mukanda yina vandá mukanda ya Musiku yina Moyize yandi mosi sonikaka.
Yoziasi ke na nsatu ya kuwa mambu nyonso yina ke na kati ya buku yayi. Ntangu Shafani ke na tangá, Yoziasi ke na kuwá mbote-mbote samu na kuzaba wapi mutindu mosi na mosi ya misiku ke na tadilá yandi na dikanda ya Izraele. Mambu yina yandi ke na wá ke na simbá mingi ntima ya yandi. Buku yango ke na zonzilá mingi mutindu ya mbote ya kusadila Yehova, mpe bamambu yina ke kumina bawu kana ba sambila banzambi ya luvunu, mutindu kukatula bawu na bwala ya bawu samu na kunata bawu na bwala ya nkaka. Yoziasi me tala ti ba ke na landá ve misiku na mutindu ya mbote. Yandi me pasula kinkuti ya yandi mpe yandi me zonza na Hilkia, Shafani mpe bantu ya nkaka mambu yayi: ‘Beno yufula Yehova samu na mambu yina kele na mukanda yayi; samu Yehova me kuwa beto nkele ya ngolo, samu bankooko ya beto zitisaka ve mambu yina kele na mukanda yayi.’—2 Bamfumu 22:11-13; 2 Bansangu 34:19-21.
w00-F 15/9 30 § 2
Samu Yoziasi vandá muntu ya kukuluka, Yehova vandá na yandi
Bantu yina Yoziasi me filisa me kwenda tala mbikudi ya kento Hulda na Yeruzalemi. Mpe ba me vutuka na bansangu. Na nzila ya Hulda, Yehova me zonza ti bamambu nyonso ya yimbi yina ba me tanga na buku yango ke kumina bantu ya Izraele, samu ba pesá Yehova mukongo. Kasi, samu Yoziasi me lakisa ntima ya kukuluka na mantwala ya Yehova, yandi ke tala ve ntangu bampasi yayi ke kumina bantu ya Izraele. Yandi ke kufwa na kizunu, mpe ba ke kunda yandi kisika yina ba kundá bankooko ya yandi.—2 Bamfumu 22:14-20; 2 Bansangu 34:22-28.
Matadi ya ntalu ya kimpeve
w01-F 15/4 26 § 3-4
Nge lenda vanda muntu ya mbote ata kisika yina nge kulaka
Ata ti Yoziasi lutisá bumwana ya yandi nyonso na bantu yina vandá salá bamambu ya yimbi, yandi salá bamambu ya mbote na meso ya Yehova. Samu ti yandi vandá mfumu ya mbote, Biblia ke zonzaka: ‘Ya vandaka ve na mfumu mosi mutindu yandi na ntwala ya yandi, yina vutukaka na Yehova na ntima ya yandi ya mvimba mpe na moyo ya yandi ya mvimba mpe na ngolo ya yandi nyonso, na kuwakana na Nsiku nyonso ya Moyize; muntu mosi ve mutindu yandi basikaka mpe na manima ya yandi.’—2 Bamfumu 23:19-25.
Yoziasi ke kifwani ya mbote samu na ba yina kulá na kati ya makanda ya yimbi. Yinki beto lenda longoka na kifwani ya Yoziasi? Yinki sadisá Yoziasi na kusoola nzila ya mbote mpe na kubika ve yawu?
9-15 Janvier
BIMVWAMA YA BIBLIA | 2 BAMFUMU 24-25
“Kuzimbana ve na wapi ntangu beto ke na zingaka”
w01-F 15/2 12 § 2
Kilumbu yina Yehova ke sambisa bantu me kuma pene-pene!
Ntembe ve, mbikudulu yina Sofoni zonzá pesá dyaka mfumu Yoziasi ngolo samu na kukatula mabuundu nyonso ya yimbi na bwala ya Yuda. Yoziasi lendá kusala yawu. Kasi yandi lendá ve kusala ti bana ya Izraele bika kusala bamambu ya yimbi, mpe kusala ti Yehova lemvokila masumu yina nkooko ya yandi Manase salaka, ntangu yandi ‘fulusaka Yeruzalemi na menga ya bantu yina salaka ve yimbi.’ (2 Bamfumu 24:3, 4; 2 Bansangu 34:3) Ni na yina, kilumbu yina Yehova zolá sambisa bantu zolá kwiza.
w07-F 15/3 11 § 10
Bamambu ya mfunu yina ke na buku ya Yeremia
Na mvula 607 T.N.B., ya me sala bamvula 11 yina Sidikiya ke mfumu na Yeruzalemi. Bangonda 18 me luta yina mfumu Nebukadenezare me zunga bwala ya Yeruzalemi. Na kilumbu ya 7 ya ngonda ya 5, Nebuzaradani, mfumu ya basoda yina ke bumbá Nebukadenezare me kwiza na Yeruzalemi. Ya ke na salamá na kati ya mvula ya 19 ya kimfumu ya Nebukadenezare. (2 Bamfumu 25:8) Na kisika yina ba kele na mantwala ya bibaka ya Yeruzalemi, ntangu ya nkaka Nebuzaradani ke na baká ntangu ya kukanisa na mutindu ba lenda kota na Yeruzalemi. Na manima ya bilumbu tatu, na kilumbu ya 10 ya ngonda yina, yandi na basoda ya yandi me ‘kota na’ Yeruzalemi mpe me yokak’ yawu.—Yeremia 52:12, 13.
Matadi ya ntalu ya kimpeve
w05-F 1/8 12 § 1
Bamambu ya mfunu yina ke na buku ya 2 Bamfumu
24:3, 4. ‘Yehova mangaka kulemvokila’ Yuda, samu na menga ya bantu yina mfumu Manase mwangisaka. Luzingu ya muntu yina me sala ata kima ya yimbi ke mfunu mingi na meso ya Nzambi. Beto lenda vanda ya kundima ti, Yehova ke kufwa bantu nyonso yina mwangisá menga ya bantu yina salá ata kima ya yimbi.—Nkunga 37:9-11; 145:20.
16-22 Janvier
BIMVWAMA YA BIBLIA | 1 BANSANGU 1-3
“Masolo ya Biblia salamá ya tsyeleka”
w09-F 1/9 14 § 2
Adam na Eve zingá kwandi?
Beto tala milonga ya bankooko ya bazwife yina ba ke zonzilá na buku ya 1 Bansangu kikapu 1 tii na 9 na ya Luke kikapu 3. Mulonga ya bantu yina ba ke zonzilá na Bansangu ke na bankumbu 48, mpe ya Luke ke na bankumbu 75. Luke ke zonzilá mulonga yina ke natá na Yesu, mpe Bansangu ke zonzilá mulonga ya bamfumu na ya banganga-nzambi ya dikanda ya Izraele. Na kati ya babuku nyonso zole yayi, ya ke na bankumbu ya bantu ya kuzabana mutindu Salomo, Davidi, Yakobi, Izaki, Abrahami, Nowe, mpe Adam. Bankumbu nyonso yina ke na kati ya babuku yayi ke ya bantu yina zingá, mpe nyonso zole ke zonzilá Adam, nkooko ya ntete, mutindu muntu yina zingaka.
w08-F 1/6 3 § 4
Nowe zingá ya tsyeleka mpe mvula ya nene salamá ya tsyeleka
Na kati ya Biblia, ya ke na milonga zole ya bankooko, yina ke lakisá pwelele ti Nowe zingaka. (1 Bansangu 1:4; Luke 3:36) Esdrasi na Luke, bantu yina sonikak’ yawu sosá mbote-mbote tekila ba sonika. Luke tulá Nowe na kati ya bankooko ya Yesu Kristo.
w09-F 1/9 14-15
Adam na Eve zingá kwandi?
Beto zonzila dilongi mosi ya Biblia yina ke mfunu mingi samu na bantu yina ke sambilaka: munkayulu ya luzingu ya Yesu. Dilongi yayi ke zonzá ti, Yesu pesá luzingu ya yandi ya kulunga mutindu munkayulu samu na kukuula bantu na masumu. (Matayi 20:28; Yoane 3:16) Mutindu beto me zaba yawu, munkayulu ke ntalu ya kufuta samu na kukuula kima yina me zimbana to yina ba me simba. Ni na yawu, Biblia ke zonzilá Yesu mutindu “ntalu ya kufuta.” (1 Timote 2:6) Kasi ya kufuta yinki? Biblia ke pesá mvutu: “Kaka mutindu na Adami bantu nyonso ke fwaka, mutindu mosi mpe na [Kristo] bantu nyonso ke kuzwa luzingu.” (1 Bakorinto 15:22) Luzingu ya kulunga yina Yesu pesá mutindu munkayulu samu na kukuula bantu ya kutumama me fwanana na luzingu ya kulunga yina vandá na Adam tekila yandi sumuka na Eden. (Baroma 5:12) Ya zola zonza ti, kana Adam zingá ve, ya ke buzoba na kundima ti Yesu pesá luzingu ya yandi mutindu munkayulu samu na kukuula bantu na masumu.
Matadi ya ntalu ya kimpeve
it-1-F 977 § 2-3
Mulonga ya bankooko
Bankumbu ya bakento. Ba zonzilá ve mingi bankumbu ya bakento na milonga ya bankooko. Ntangu ba vandá soniká nkumbu ya kento, ya vandá na mwa mambu ya mfunu yina salá ti ba sonika yawu. Na kifwani, ba ke zonzilá nkumbu ya Sarai (Sara) na Kubanda 11:29, 30. Ntangu ya nkaka, ya vandá samu ti Mwana ya nsilulu zolá butuka na mulonga ya bana ya yandi, kasi ve ya kento ya nkaka ya Abrahami. Ntangu ya nkaka, ba ke zonzilá mpe Milka na baverse yayi samu ti yandi vandá nkooko ya Rebeka, kento ya Izaki. Izaki zolá kwela ve kento na makanda ya nkaka. Na yawu, ba zonzilá nkumbu ya Milka samu na kulakisa ti bankooko ya Rebeka vandá dikanda mosi na Abrahami. (Kub 22:20-23; 24:2-4) Na Kubanda 25:1, ba ke zonzilá Ketura, kento yina Abrahami kwelá na manima ya lufwa ya Sara. Ya ke na lakisá ti bamvula 40 na manima ya kubutuka ya Izaki, Abrahami vandá kaka na kibakala yina Yehova vumbulá na kati ya nzutu ya yandi. (Ro 4:19; Kub 24:67; 25:20) Ya zola zonza mpe ti bantu ya Madiani, bantu ya makanda ya nkaka ya Arabia na bantu ya Izraele katuká na muntu mosi, Abrahami.
Ba ke zonzilá Lea, Rashele, na makangu ya Yakobi. Ba ke zonzilá mpe bankumbu ya bana ya bakala yina bakento yayi butaka. (Kub 35:21-26) Ya ke na sadisá beto na kuzaba bamambu yina Nzambi salá na manima samu na bana ya bawu. Ni bamambu ya mutindu yayi ke salá ti ba zonzila bakento ya nkaka na kati ya milonga ya bankooko ya bazwife. Ntangu ya nkaka, ba vandá zonzilá bankumbu ya bakento ntangu bakento yango vandá ve na bampangi ya bakala mpe ni na nzila ya bawu dikabu zolá kwenda na bana. (Kut 26:33) Kasi samu na Tamare, Rahabi, na Rute, bamambu vandá ve faso mosi. Samu na mosi na mosi ya bakento yayi, ya ke na bamambu ya mfunu yina salá ti ba kota na kati ya mulonga ya bankooko ya Masiya, Yesu Kristo. (Kub 38; Ru 1:3-5; 4:13-15; Mt 1:1-5) Ya ke na bakento ya nkaka yina ba ke zonzilá bankumbu na milonga ya bankooko yina ke na 1 Bansangu 2:35, 48, 49; 3:1-3, 5.
23-29 Janvier
BIMVWAMA YA BIBLIA | 1 BANSANGU 4-6
“Yinki balusambu ya munu ke lakisaka?”
w10-F 1/10 23 § 3-7
‘Muntu yina ke waka lusambu’
Yabesi vandá bakala yina vandá zolá kusambila. Na kubanda ya lusambu ya yandi, yandi lombá lusakumunu ya Nzambi. Na manima, yandi lombá bima tatu yina lakisá ti yandi vandá na kiminu ya ngolo.
Kima ya ntete yina yandi lombá ke ni yayi: ‘Kumisa teritware ya munu nene.’ (Verse 10) Bakala ya lukumu yayi vandá ve muntu ya lukoso yina ke tulá meso na bantoto ya bampangi. Ntangu ya nkaka, na lusambu ya yandi, yandi vandá zonzila bantu, kasi bantoto ve. Yandi vandá lomba ti teritware ya yandi kuma nene na kati ya kizunu, samu bisadi ya Nzambi kuma mingi ya kulutila.
Na manima, Yabesi bondilá samu “diboko” ya Nzambi vanda na zulu ya yandi. Diboko ya Nzambi ke ngolo yina yandi ke sadilá samu na kusadisa bisadi ya yandi. (1 Bansangu 29:12) Samu na kuzwa bima yina yandi vandá sosa, Yabesi sambilá Nzambi. Yandi zabá ti diboko ya yandi ke ve nkufi samu na kusadisa bantu yina ke lakisá kiminu ya bawu na yandi.—Izaya 59:1.
Na kumanisa, Yabesi lombá na lusambu: ‘Bumba munu na bampasi, samu ya natina ve munu mpasi.’ Ntangu yandi zonzá ‘samu ya natina ve munu mpasi,’ ntangu ya nkaka Yabebi vandá sambila ve samu bampasi kumina ve yandi, kasi samu bampasi nata ve yandi na kuvanda na manyongi ya kulutila to kumanisa yandi ngolo.
Lusambu ya Yabesi lakisá ti yandi vandá na nsatu bantu mingi sambila Yehova, mpe yandi vandá tulá ntima na muntu yina ke kuwá balusambu. Wa’ faso Yehova pesá mvutu na lusambu ya yandi? Na nsuka ya disolo, beto ke tangaka: “Nzambi lungisaka mambu yina yandi lombaka.”
Matadi ya ntalu ya kimpeve
w05-F 1/10 9 § 7
Bamambu ya mfunu yina ke na buku ya 1 Bansangu
5:10, 18-22. Na bilumbu ya mfumu Saule, makanda ya Izraele yina vandá vanda na esti ya Yodani nungá bantu ya Agri, ata ti ba vandá mingi kulutila makanda ya Izraele. Yinki salá ti ba nunga? Basoda ya ngolo yayi tulá ntima ya bawu na Yehova mpe ba sosá lubakusu ya yandi. Na mvita yina ba ke nwanisa beto, Satana na bambazi ya yandi ke na ngolo kulutila beto. Na yawu, beto me bonga kutula ntima ya beto nyonso na Yehova samu na kununga.—Baefeze 6:10-17.
30 Janvier–5 Février
BIMVWAMA YA BIBLIA | 1 BANSANGU 7-9
“Na lubakusu ya Yehova, nge lenda lungisa bisalu ya nene”
w05-F 1/10 9 § 8
Bamambu ya mfunu yina ke na buku ya 1 Bansangu
9:26, 27. Balevi yina vandá kengidilá bamwelo vandá na kisalu ya mfunu mingi. Ba vandá pesá bawu fungula ya bamwelo yina vandá natá na bisika ya santu ya tempelo. Bilumbu nyonso, ba vandá fungulá bamwelo. Yehova me pesa mpe beto kisalu ya kusadisa bantu kisika beto kele samu ba sadila yandi. Mutindu Balevi yina vandá kengidilá bamwelo, beto mpe me bonga kulakisa ti beto ke bantu yina ba lenda tula ntima.
w11-F 15/9 32 § 7
Mutindu Fineasi, nge lenda nunga bamambu ya mpasi
Fineasi vandá na mingi ya kusala na kati ya kimvuka ya Izraele ya ntama. Kasi samu yandi lakisá bukindi, mayela, mpe yandi tulá ntima na Yehova, yandi lendá kununga bamambu ya mpasi. Yehova sepelá na tiya yina yandi lakisá samu na kukipe kimvuka ya yandi. Bamvula 1000 na manima, Yehova natá Esdrasi na kusonika mambu yayi: ‘Fineasi mwana ya Eleazare muntu vandaka ntete ntwadisi ya bawu; Yehova vandaka na yandi.’ (1 Ns. 9:20) Bika ti Yehova vanda na ba yina nyonso ke twadisá kimvuka ya yandi, mpe na bisadi ya nkaka yina ke ya kukangama na yandi.
Matadi ya ntalu ya kimpeve
w10-F 15/12 21 § 6
Beto yimbila Yehova!
Na manima ya bambikudi, Yehova yandi mosi lombá na bisadi ya yandi na kukembila yandi na banzimbu. Balevi yina vandá yimbá vandá salá ve bisalu ya nkaka yina ba vandá lombá na Balevi na kusala. Na yawu, ba vandá na ntangu mingi samu na kusonika banzimbu, mpe ntangu ya nkaka samu na kuyimba yawu bambala mingi.—1 Ns. 9:33.
6-12 Février
BIMVWAMA YA BIBLIA | 1 BANSANGU 10-12
“Kumisa ngolo nsatu ya nge ya kusala luzolo ya Nzambi”
w12-F 15/11 6 § 12-13
“Longa munu na kusala luzolo ya nge”
Davidi vandá talá malongi yina ke ya kubumbana na manima ya misiku, mpe yandi vandá zolá kusadila yawu. Kilumbu mosi, yandi zonzá ti yandi vandá na nsatu ya kunwa ‘maza ya dibulu ya maza yina vandaka pene-pene ya mukelo ya Betelemi.’ Na ntangu yina, kimvuka mosi ya basoda ya Filistia vandaka na Betelemi. Ata mpili yina, bantu tatu ya Davidi nwaná na kukota kuna, mpe na kuzwa maza. Davidi ‘mangaka kunwa yawu mpe tiamunaka yawu samu na Yehova.’ Samu na yinki? Davidi zonzaka: ‘Na kutadila mabanza ya Nzambi ya munu, ngindu ya kusala dyambu yayi lenda kwizila munu ve ata fioti! Munu fwana kwandi kunwa menga ya bantu yayi yina me tula luzingu ya bawu na mpasi? Samu ba tulaka luzingu ya bawu na mpasi samu na kunata yawu.’—1 Ns. 11:15-19.
Davidi zabá ti Musiku zonzá na kudya ve menga, kasi na kumwangisa yawu samu na Yehova. Mpe yandi zabá samu na yinki Yehova pesá musiku yayi. Davidi zabá ti ‘luzingu ya kima yina ke zingaka kele na menga.’ Kasi, ba pesak’ yandi maza, menga ve. Samu na yinki yandi mangaka? Davidi vandá tala dilongi yina ke ya kubumbana na manima ya musiku yina. Na meso ya yandi, maza na menga ya bantu tatu yina, vandá ntalu mosi. Ni na yina, dibanza ya kunwa maza yango kwizilá yandi ata fioti ve. Yandi talá ti yandi fwana kumwangisa yawu na ntoto.—Lev. 17:11; Kul. 12:23, 24.
w18.06-F 17 § 5-6
Bika misiku ya Nzambi mpe malongi yina ke ya kubumbana na manima ya yawu twadisa ndinga yina ke zonzilá nge na kati ya ntima
Samu misiku ya Nzambi sadisa beto, beto me fwana kaka ve kutanga to kuzaba yawu. Beto me fwana kuzola mpe kuzitisa yawu. Biblia ke zonzaka: ‘Beno yina mambu ya yimbi, mpe beno zola mambu ya mbote.’ (Amosi 5:15) Kasi, wa’ faso beto ke lenda kusala yawu? Beto me fwana kulongoka kutala bamambu mutindu Yehova ke talak’ yawu. Beto baka kifwani: nge ke na lendá ve kuzwa mpongi. Docteur me zonza na nge na kudya madya ya mbote, na kusala sport, mpe kusoba mwa bamambu na luzingu ya nge. Nge me sala yawu, mpe ya me simba. Ntembe ve, nge ke vutula matondo na docteur na yina yandi me sadisa nge na kubongisa luzingu ya nge.
Mutindu mosi mpe, Nzambi yina yidiká beto pesá beto misiku yina lenda bumba beto na bampasi yina ndyatulu ya yimbi ke natá, mpe kubongisa luzingu ya beto. Na kifwani, kanisa na misiku ya Biblia na yina me tadila luvunu, bafaso ya yimbi ya kuvukisa nzutu, bamambu ya ngolo, bunganga, kusadila mayela ya yimbi mpe kuyiba. (Tanga Bingana 6:16-19; Luz. 21:8) Ntangu beto ke talá bambote yina beto ke kuzwá na kulanda misiku yango, luzolo ya beto samu na Yehova mpe na misiku ya yandi ke kumá dyaka ngolo.
Matadi ya ntalu ya kimpeve
it-1-F 492 § 2-3
Ntima
Kusadila Nzambi na “ntima ya mvimba.” Samu ya tambula na mutindu ya mbote, ntima yina ke bulá na kati ya nzutu lendá vanda ve ya kukabuka. Kasi ntima ya kimpeve lenda vanda ya kukabuka. Davidi sambilaka: ‘Pesa munu ntima ya kukondwa kukabuka samu mu wa nkumbu ya nge boma.’ Mambu yina yandi zonzá ke na lakisá ti ntima ya muntu lenda vanda ya kukabuka na yina me tadila bamambu yina yandi ke zolá mpe bamambu yina yandi ke na boma ya yawu. (Nku 86:11) Muntu ya mutindu yayi lenda vanda na “ntima-zole.” Ya zola zonza ti yandi ke sadilá Nzambi kaka na mwa tiya ndambu. (Nku 119:113; Luz 3:16) Muntu lenda vanda mpe na “bantima” (to na ‘ntima na ntima’). Muntu yango ke sosá kusadila bamfumu zole, to yandi ke zonzá ve mambu yina ke na yandi na ntima. (1Ns 12:33; Nku 12:2, nyp) Yesu ngalá bantu yina ke na bantima zole.—Mt 15:7, 8.
Muntu yina ke sosá kusepelisa Nzambi me fwana kusadila yandi na ntima ya mvimba. Yandi me fwana kuvanda ve na ntima ya kukabuka, to na bantima zole. (1Ns 28:9) Kusala yawu ke lombá bangolo mingi samu ntima kele yimbi mingi mpe mabanza ya ntima ya muntu kele yimbi. (Yer 17:9, 10; Kub 8:21) Samu ntima ya beto vanda ntangu nyonso ya mvimba, beto me bonga kusambila na ntima nyonso (Nku 119:145; Bid 3:41), kulongoka ntangu nyonso mambu ya Nzambi (Esd 7:10; Bin 15:28), kusamuna nsangu ya mbote na tiya nyonso (tala Yer 20:9), mpe kulutisa ntangu na bantu yina ke sadilá Yehova na ntima ya mvimba.—Tala 2Mf 10:15, 16.
13-19 Février
BIMVWAMA YA BIBLIA | 1 BANSANGU 13-16
“Kana beto sala bamambu mutindu Yehova ke lakisá beto, ya ke simba”
w03-F 1/5 10
Nge ke lombá kwandi: ‘Yehova kele wapi?’
Ntangu sanduku ya luwawanu vutuká na Izraele, ya lutisá bamvula mingi na Kiriati-yearimi. Mfumu Davidi vandá sosa kunata yawu na Yeruzalemi. Yandi sololá na bamfumu ya bwala, mpe yandi zonzá na bawu ti, ‘kana ya talanaka mbote na meso ya bawu mpe kana Yehova ndimaka yawu,’ ba ke katula sanduku na kisika ya vandaka. Kasi, Davidi baká ve ntangu na kusosa kuzaba dikanisi ya Yehova samu na mambu yayi. Kana yandi sosá kuzaba, ba zolá nata ve sanduku na pusu-pusu. Balevi ya dikanda ya Kohati zolá nata yawu na mapeka ya bawu, mutindu Yehova lombaka. Bambala mingi, Davidi vandá lombá Yehova twadisa yandi. Kasi na mbala yayi, yandi salá ve yawu. Ya natiná bawu bampasi ya kulutila. Mwa ntangu na manima, Davidi zonzaka: ‘Yehova Nzambi ya beto wilaka beto nkele, samu beto sosaka ve mutindu ya mbote ya kusala mambu.’—1 Bansangu 13:1-3; 15:11-13; Kutanga 4:4-6, 15; 7:1-9.
w03-F 1/5 11 § 13
Nge ke lombá kwandi: ‘Yehova kele wapi?’
Na manima, Balevi baká sanduku na yinzo ya Obedi-edomi, mpe ba natak’ yawu na Yeruzalemi. Kilumbu yango, ba yimbá nzimbu yina Davidi sonikaka. Nzimbu yango vandá bambula bawu mambu yayi: ‘Beno sosa Yehova mpe ngolo ya yandi. Beno sosa luse ya yandi ntangu nyonso. Beno bambuka bisalu ya kuyituka yina yandi me salaka, bimangu ya yandi mpe mambu yina yandi me zengaka.’—1 Bansangu 16:11, 12.
Matadi ya ntalu ya kimpeve
w14-F 15/1 10 § 14
Sambila Yehova, Mfumu ya ntangu nyonso
Davidi natá sanduku ya luwawanu na Yeruzalemi. Na kilumbu ya kyese yina, balevi kembilá Yehova na nzimbu mosi yina vandá zonzila mambu ya mfunu yayi: ‘Beno zabisa na kati ya makanda ti: “Yehova me kuma Mfumu.”’ (1 Ns. 16:31) Beto lenda yufula: ‘Yehova ke mfumu ya ntangu nyonso. Kasi na wapi mutindu yandi ke kumá dyaka mfumu bantangu ya nkaka?’ Yehova ke kumá mfumu ntangu yandi ke lakisá lutumu ya yandi, to ntangu yandi ke tulá bantu samu na kulakisa lutumu ya yandi, to samu na kusala bamambu ya nkaka. Mambu yayi yina me tadila kimfumu ya Nzambi ke mfunu mingi. Tekila Davidi kufwa, Yehova zonzá na yandi ti kimfumu ya yandi ke vanda ntangu nyonso. Yandi zonzaka: ‘Munu ke basisa bana ya nge na manima ya nge, mwana ya nge mosi, mpe munu ke telemisa kimfumu ya yandi ngolo.’ (2 Sa. 7:12, 13) Bamvula kuluta 1000 na manima, “mwana” yango ya Davidi talaka. Ya vandá nani, mpe na wapi ntandu yandi zolá kuma mfumu?
20-26 Février
BIMVWAMA YA BIBLIA | 1 BANSANGU 17-19
“Bumba kilengi ya nge ata na ntangu bamambu ke salamá ve mutindu nge vandá vingila”
w06-F 15/7 19 § 1
Beto tula meso ya beto na bumbote ya dibuundu ya Yehova
DAVIDI ke mosi ya bantu ya mfunu yina ba ke zonzilá na kitini ya Biblia yina ba soniká na ndinga ya Ebre. Yandi vandá mvungi ya mameme, mbikudi, mfumu mpe yandi vandá yimbaka. Davidi tulá ntima ya yandi nyonso na Yehova. Luzolo ya ngolo yina yandi vandá na yawu samu na Yehova natak’ yandi na kusosa kutunga yinzo samu na Nzambi. Yinzo yina, to tempelo, zolá kuma kisika yina ba zolá sambila Yehova na Izraele. Davidi zabá ti bamambu nyonso yina ba zolá sala samu na kusambila Yehova na tempelo zolá natina dikanda ya Nzambi kilengi na balusakumunu. Ni na yawu Davidi yimbaka: ‘Kyese na muntu yina nge me soola mpe yina nge me nata pene-pene samu yandi zinga na ngaanda ya nge. Beto ke fuluka na kyese ya bumbote ya yinzo ya nge, tempelo ya nge ya santu.’—Nkunga 65:4.
Kuzwa kilengi na yina nge ke salá samu na Yehova
Faso mosi mpe, beto lenda kulisa kilengi ya beto si beto tula bangolo nyonso na bisalu yina ba ke pesá beto. ‘Lutisa ntangu mingi’ na kisalu ya predikasion mpe na bisalu ya nkaka na kati ya kimvuka. (Bis. 18:5; Ebr. 10:24, 25) Bongisa bakomentere yina nge ke pesá na balukutakanu samu ya pesa bampangi ngolo. Sala na faso ya mbote badevware yina ba ke pesá nge na balukutakanu. Si ba me lomba na nge na kusala kisalu mosi na kati ya kimvuka, kwiza na heure mpe sala yawu na faso ya kulunga. Kisalu ni kisalu yina ba ke pesa nge, ata ya ke na talaná fioti, kubakila ve yawu faso kima ya mpamba. Fioti-fioti, sosa kubongisa faso ya nge ya kusala bamambu. (Bin. 22:29) Si nge sala bangolo nyonso yayi samu na Yehova, kikamarade ya nge na yandi ke kula, kilengi ya nge mpe ke kula. (Gal. 6:4) Ya ke sala mpe ti ya vanda ve mpasi na nge na kusepela na bampangi yina me kuzwa baresponsabilite yina nge ke na vingilá.—Rom. 12:15; Gal. 5:26.
Matadi ya ntalu ya kimpeve
w20.02 12, encadré
Beto ke zolá mingi Yehova, Tata ya beto
Yehova ke tudilá kwandi mu meso?
Nge me yufulá deja kyuvu yayi: ‘Ya ke na ba-milliard ya bantu na zulu ya ntoto, samu na yinki Yehova ke tudila mu meso?’ Si nge ke kanisá faso yayi, zaba ti bantu mingi ya mbote ke yufulá mpe kyuvu yayi. Mfumu David soniká: “O Yehova, muntu ke nani samu nge tudila yandi meso, mwana ya muntu ke nani samu nge tula yandi dikebi.” (Nku. 144:3) David zabá ti, Yehova zabak’ yandi mbote-mbote. (1 Ns. 17:16-18) Na nzila ya Biblia mpe ya kimvuka ya yandi, Yehova ke lakisá nge ti, yandi ke tulá meso na luzolo yina nge ke na yawu samu na yandi. Tala mwa baverse ya Biblia yina lenda sadisa nge na kundima yawu:
• Yehova zabá nge avant nge butama.—Nku. 139:16.
• Yehova zaba mambu yina ke na ntima ya nge mpe makanisi ya nge.—1 Ns. 28:9.
• Yehova, yandi mosi ke wá mosi na mosi ya balusambu ya nge.—Nku. 65:2.
• Ndyatulu ya nge lenda pesa Yehova kilengi to kunyongisa yandi.—Bin. 27:11.
• Yehova, yandi mosi bendá nge na kimvuka ya yandi.—Yoa. 6:44.
• Si nge kufwa, samu Yehova zaba nge mbote-mbote, yandi ke vumbula nge na lufwa. Yandi ke pesa nge nzutu ya malu-malu mpe yandi ke vutula makanisi yina ke na nge bubu yayi. Nge ke vanda kaka na kimuntu yina nge ke na yawu, mpe nge ke bambukila mambu nyonso yina nge zabaka.—Yoa. 11:21-26, 39-44; Bis. 24:15.
27 Février–5 Mars
BIMVWAMA YA BIBLIA | 1 BANSANGU 20-22
“Sadisa bantwenya na kulungisa bamambu na kisalu ya Yehova”
w17.01-F 29 § 8
“Pesa na bantu ya kukwikama na Yesu Kristo ndongosolo yina”
Tanga 1 Bansangu 22:5. Ntangu ya nkaka, Davidi kanisá ti Salomo vandá ve na makoki ya kutwadisa kisalu ya nene ya mutindu yayi. Yinzo yango zolá vanda “kitoko mingi,” mpe na ntangu yina, Salomo vandá ‘ntwenya mpe yandi zabá mambu mingi ve.’ Ata mpili yina, Davidi zabá ti Yehova zolá pesa na Salomo nyonso yina yandi vandá na yawu nsatu samu na kulungisa kisalu yina ba pesak’ yandi. Na yawu, Davidi tulá makanisi ya yandi na yina yandi lendá sala, mpe yandi yidiká bima mingi.
w17.01-F 29 § 7
“Pesa na bantu ya kukwikama na Yesu Kristo ndongosolo yina”
Davidi mangá ve kutula diboko na kisalu ya kutunga tempelo ata ti yandi zabá ti ni yandi ve zolá kuzwa nkembo na kisalu yina. Ya tsyeleka, na manima ba kwizá bokila ve yinzo yango tempelo ya Davidi, kasi ya Salomo. Ntangu ya nkaka, Davidi nyongá na yina yandi lungisá ve dikanisi yina yandi vandá na yawu na ntima. Ata mpili yina, yandi salá nyonso samu kisalu salama. Yandi tulá bangolo ya yandi nyonso samu na kuyidika bimvuka ya bantu yina zolá sala kisalu, mpe samu na kuvukisa bisengo, kwivre, arza, wolo, na bayinti ya sedre. Dyaka, yandi zonzá mambu yayi na Salomo samu na kukindisa yandi: ‘Ntangu yayi, mwana ya munu, bika Yehova kuvanda na nge, mpe bika nge nunga mpe nge tunga yinzo ya Yehova Nzambi ya nge, kaka mutindu yandi tubaka samu na nge.’—1 Ns. 22:11, 14-16.
w18.03-F 11-12 § 14-15
Bibuti, beno sadisa bana ya beno na kukula na kimpeve mpe na kuzwa mbotokolo
Bakuluntu lenda bakisa bibuti yina ke sadisá bana ya bawu na kukula na kimpeve mpe na kuzwa mbotokolo. Bakuluntu lenda sala yawu na kuzonzilá na faso ya mbote bamambu yina ba lenda lungisa na kimpeve. Ntangu yandi vandá na bamvula 6, mpangi mosi ya kento sololá na mpangi Charles Russell. Yandi me zonza: “Yandi lutisá baminuti 15 na kusolola na munu na bamambu yina munu vandá na nsatu ya kulungisa na kimpeve.” Wapi bambuma masolo yina butaka? Na manima, mpangi ya kento yayi kumá pionnier, mpe yandi lutisá bamvula kuluta 70 na kati ya kisalu yayi. Ntembe ve, bamambu yina beto ke zonzá samu na kukindisa bampangi, lenda simba ntima ya bawu na kati ya bamvula mingi. (Bin. 25:11) Bakuluntu lenda bokila mpe bibuti na bana ya bawu samu na kusala bunkete na yinzo ya kimfumu. Ba lenda pesa bana bisalu na kutalá mvula na ngolo ya bawu.
Bampangi ya kimvuka lenda sadisa bantwenya ntangu ba ke lakisá bawu ti ba ke mfunu na meso ya bawu. Na kifwani, tula meso na bamambu yina ke na lakisá ti twenya ke na kulá na kimpeve. Nge lenda siika yandi ntangu yandi me sala devoir to me pesa mvutu ya mbote na lukutakanu ya kimvuka, ntangu yandi me zonzila kiminu ya yandi na lukolo, to ntangu yandi me kanga nzutu na kubwa ve na disumu. Nge lenda baka lukanu ya kusolola na twenya mosi tekila lukutakanu banda to na manima. Kana nge sala yawu, bantwenya ke tala ti ba ke mfunu na kati ya ‘dibuundu ya nene.’—Nku. 35:18.
Matadi ya ntalu ya kimpeve
w05-F 1/10 11 § 6
Bamambu ya mfunu yina ke na buku ya 1 Bansangu
21:13-15. Yehova zonzá na mbazi ya yandi na kubika kufwa bantu. Yandi zonzak’ yawu samu ya ke salak’ yandi mpasi ntangu dikanda ya yandi ke kutaná na bampasi. Ya tsyeleka, “mawa ya yandi kele mingi.”