KILESO 57
Yinki lenda sadisa nge kana nge me sala disumu ya nene
Ata ti nge ke zolá mingi Yehova mpe ke salá bangolo samu na kusala ve mambu yina ke sala yandi mpasi, ntangu ya nkaka nge lenda sala disumu. Kasi ya ke na masumu yina me lutila nene na ya nkaka. (1 Bakorinto 6:9, 10) Kana ya me kumina nge na kusala disumu ya nene, zaba ti Yehova me bika ve kuzola nge. Yandi ke na nsatu ya kulemvokila nge mpe kusadisa nge.
1. Yinki beto me fwana kusala samu Yehova lemvokila beto?
Ba yina ke zolá Yehova ke vandá na manyongi mingi kana ya me kumina bawu na kusala disumu ya nene. Kasi ba ke kuzwá kizunu na mambu yina Yehova zonzá na dikanda ya yandi: “Ata masumu ya beno kele mbwaki mutindu menga, ya ke kuma mpembe mutindu mvula ya mpembe [neige].” (Izaya 1:18) Kana beto balula ntima, Yehova ke lemvokila beto. Kasi yinki zola zonza kubalula ntima? Ya zola zonza kunyonga na ntima nyonso mambu yina beto salá, kuvutukila dyaka ve yimbi yina, mpe kubondila Yehova samu yandi lemvokila beto. Na manima, beto ke sala bangolo samu na kusoba makanisi mpe ndyatulu ya yimbi yina me nata beto na kusumuka. Beto ke sala mpe nyonso samu na kulanda malongi ya Yehova na luzingu ya beto.—Tanga Izaya 55:6, 7.
2. Wapi mutindu Yehova ke sadilá bakuluntu samu na kusadisa beto kana beto me sala disumu?
Kana beto me sala disumu ya nene, Yehova me lomba na beto na “kubokila bakuluntu ya dibuundu.” (Tanga Zaki 5:14, 15.) Bakuluntu yayi ke zolá mingi Yehova mpe ke zolá ba yina ke sadilaka yandi. Ba zaba mutindu ya kusadisa beto na kuvutula kindiku ya mbote na Yehova.—Bagalate 6:1.
Wapi mutindu bakuluntu ke sadisá beto kana beto me sala disumu ya nene? Bakuluntu zole to tatu ke sadila malongi ya Biblia, samu na kulakisa beto na yinki mambu yina beto me sala ke yimbi. Ba ke pesa mpe beto malongi yina ke sadisa beto na kuvutukila dyaka ve disumu yina beto salaka. Kana muntu me sala disumu ya nene mpe me balula ve ntima, bakuluntu ke katula yandi na kimvuka samu yandi nata ve bampangi ya nkaka na kusala mambu ya yimbi mutindu yandi.
SOSA KUZABA MBOTE-MBOTE
Longoka mbote-mbote wapi mutindu Yehova ke sadisá beto kana beto me sala disumu ya nene, mpe mutindu beto lenda vutula yandi matondo samu na lubakusu ya yandi.
3. Kuzonza pwelele masumu ke sadisa beto na kuvutula kindiku ya mbote na Yehova
Masumu nyonso yina beto ke salá, ke lwalisá ntima ya Yehova, na yawu beto me fwana kuzonzila yandi yawu nyonso. Tanga Nkunga 32:1-5, mpe na manima beto zonzila kyuvu yayi:
Samu na yinki ya ke mbote samu na beto na kuzonza masumu ya beto nyonso na Yehova?
Na manima ya kuzonzila Yehova masumu ya beto nyonso, beto me fwana kukwenda tala bakuluntu samu ba sadisa beto. Kusala mutindu yayi ke sala ti beto vanda na kizunu. Tala VIDEO, mpe na manima beto zonzila kyuvu yina ke landa.
Na video, wapi mutindu bakuluntu sadisá Canon na kuvutuka na Yehova?
Beto fwana kuzonza pwelele mpe kubumba ata mambu na bakuluntu, samu ba sadisa beto na mutindu ya mbote. Tanga Zaki 5:16, mpe na manima beto zonzila kyuvu yayi:
Wapi mutindu kuzonza matsyeleka na bakuluntu ke salá ti ya vanda ve mpasi na bawu na kusadisa beto?
Zonza disumu ya nge nyonso, kubumba ata mambu na bakuluntu, mpe ndima Yehova sadisa nge na luzolo nyonso
4. Yehova ke lakisaka ntima ya kyadi na basumuki
Kana muntu me sala disumu ya nene mpe me manga kulanda malongi ya Yehova, ba ke katula yandi na kati ya kimvuka, mpe beto ke lutisa dyaka ve ntangu na yandi. Tanga 1 Bakorinto 5:6, 11 mpe na manima beto zonzila kyuvu yayi:
Mutindu levure ke vimbisá pâte ya dimpa, samu na yinki kulutisa ntangu na muntu yina me sumuka mpe me manga kubalula ntima lenda bebisa kimvuka?
Samu na kulanda kifwani ya ntima ya kyadi yina Yehova ke lakisaka na muntu yina me sala disumu, bakuluntu ke salaka nyonso samu na kusadisa ba yina ba katulaka na kati ya kimvuka. Mingi na kati ya bawu vutukaka na kati ya kimvuka. Samu na yinki? Samu ti, ata ya vanda sala bawu mpasi samu ba katulaka bawu na kati ya kimvuka, ya sadisaka bawu na kuzaba ti mambu yina ba salaka vandaka yimbi.—Nkunga 141:5.
Wapi mutindu faso ya Yehova ya kubakila muntu yina me sala disumu ke lakisaka ti yandi ke salaka bamambu ya kulunga, ke na ntima ya kyadi mpe luzolo?
5. Yehova ke lemvokilá beto ntangu beto ke balulá ntima
Yesu sadilá kifwani mosi yina ke sadisá beto na kuzaba yinki ya ke salaka Yehova ntangu muntu ke balulá ntima. Tanga Luke 15:1-7, mpe na manima beto zonzila kyuvu ayi:
Yinki disolo yayi ke na longá nge na yina me tadila Yehova?
Tanga Ezekiele 33:11, mpe na manima beto zonzila kyuvu yayi:
Wapi mambu ya mfunu muntu fwana kusala samu na kulakisa ti yandi me balula ntima?
Mutindu muntu yina ke kipeke mameme, Yehova ke kipeke na ntima mosi bisadi ya yandi
BANTU YA NKAKA KE ZONZAKA: “Kana mu kwenda zonza mambu yina mu me sala na bakuluntu, mu ke na boma ba katula munu na kimvuka.”
Yinki nge lenda zonza na muntu yina ke na kanisá mutindu yina?
NA BUNKUFI
Kana beto me sala disumu ya nene mpe beto me nyonga na ntima nyonso mambu yina beto me sala, mpe me sala bangolo na kuvutukila dyaka ve yawu, Yehova ke lemvokila beto.
Mambu ya kusimba
Samu na yinki ya ke mbote samu na beto na kuzonzila masumu ya beto nyonso na Yehova?
Yinki beto fwana kusala samu Yehova lemvokila masumu ya beto?
Kana beto me sala disumu ya nene, samu na yinki beto me fwana kuzonza na bakuluntu?
SOSA KUZABA DYAKA
Tala wa’ faso Yehova lakisá bakala mosi ntima ya mawa mutindu Izaya 1:18 ke zonzilaka yawu.
Kusala ata fioti ve ntembe na ntima ya mawa ya Yehova (5:02)
Yinki bakuluntu ke sosaka kusala samu na kusadisa muntu yina me sala disumu ya nene?
Longoka faso ba ke lakisaka luzolo mpe ntima ya kyadi na ba yina me sala disumu kasi me balula ve ntima.
Na disolo “ Il fallait que je revienne vers Jéhovah, ” tala samu na yinki bakala mosi yina kwendá ntama na matsyeleka kwizá tala ti Yehova bendá dyaka yandi na sika ya yandi.
“ La Bible transforme des vies ” (La Tour de Garde, 1er Avril 2012)