Yozefi vandaka mosi ya bana ya nsuka yina Yakobi butaka. Bayaya ya yandi ya babakala talaka ti tata ya bawu vanda zolaka mingi Yozefi. Yinki nge me kanisa ti ya salaka bawu na ntima? Ba bandaka kusala yandi kimbanda mpe kuyiina yandi. Na manima, Yozefi salaka bandosi ya ngitukulu mpe yandi zonzaka yawu na bayaya ya yandi. Samu na bayaya ya yandi, bandosi yina vanda sosa kuzonza ti kilumbu kele ba ke fukama na mantwala ya yandi. Na yawu, ba yiinaka dyaka yandi na faso ya kulutila!

Kilumbu mosi bayaya ya Yozefi vanda bumba mameme pene-pene na mbanza ya Shekeme. Yakobi filisaka Yozefi na kwenda tala faso bamambu vanda lutila kuna. Na ntama, ba talaka Yozefi mpe ba bandaka kuzonza bawu na bawu: ‘Beno tala muntu ya bandosi ke na kwizaka. Bika beto kufwa yandi!’ Ba kangaka yandi mpe ba losaka yandi na dibulu mosi ya yinda. Kasi, mosi ya bayaya ya yandi na nkumbu ya Yuda zonzaka: ‘Beto kufwa ve yandi! Kasi bika beto tekisa yandi mutindu ngaamba.’ Na yawu, ba tekaka Yozefi na bambongo 20 ya bisengo na bantu ya mumbungu ya Madiani yina vanda kwenda na Ezipte.

Na manima bayaya ya Yozefi tulaka kinkuti ya yandi na kati ya menga ya nkombo, ba filisaka yawu na tata ya bawu, mpe ba zonzaka: ‘Yayi ke ve kwandi kinkuti ya mwana ya nge?’ Na yawu, Yakobi kanisaka ti kibulu ya brusu me kufwa Yozefi. Ya salaka yandi mpasi mingi na ntima. Ata muntu lendaka kubondila yandi.

Na Ezipte, ba tekaka Yozefi mutindu ngaamba na sika ya muntu mosi ya mfunu na nkumbu ya Potifare. Kasi Yehova vandaka na Yozefi. Potifare talaka ti Yozefi vanda sala kisalu ya yandi mbote mpe yandi vandaka muntu yina ba lenda tula ntima. Na yawu, Potifare tulaka Yozefi na zulu ya bima ya yandi nyonso.

Kento ya Potifare talaka ti Yozefi vandaka kitoko mpe na ngolo. Bilumbu nyonso, yandi vanda lombaka na Yozefi ba vukisa nzutu. Yinki Yozefi zolaka sala? Yandi mangaka mpe zonzaka: ‘Ve! Ya ke mambu ya yimbi. Mfumu ya munu ke tulaka munu ntima, mpe nge ke kento ya yandi. Kana mu vukisa nzutu na nge, mu ke sala disumu na mantwala ya Nzambi!’

Kilumbu mosi kento ya Potifare sosaka kunata Yozefi na ngolo na kuvukisa nzutu na yandi. Yandi simbaka Yozefi na kinkuti, kasi Yozefi kimaka. Ntangu Potifare vutukaka na yinzo, kento ya yandi zonzaka na yandi ti Yozefi sosaka kuvukisa nzutu na yandi. Ya vandaka luvunu. Potifare kumaka na nkele ya mingi mpe yandi tulaka Yozefi na boloko. Kasi Yehova zimbanaka ve Yozefi.

Ntangu Yozefi vandaka na boloko, Faraoni, yina vandaka mfumu ya Ezipte, salaka bandosi yina ata muntu lendaka kuzonza na yandi yinki ya zola zonza. Mosi ya bisadi ya Faraoni zonzaka na yandi ti Yozefi lenda zonza na yandi yinki bandosi ya yandi zola zonza. Na mbala mosi Faraoni zonzaka ba kwenda baka Yozefi.

Faraoni zonzaka na yandi: ‘Nge lenda zonzila munu yinki zola zonza bandosi ya munu?’ Yozefi zonzaka na Faraoni: ‘Na kati ya bamvula 7, Ezipte ke vanda na madya mingi, mpe na kati ya bamvula 7 yina ke landa, nsatu ya ngolo ke vanda. Sosa muntu mosi ya mayela yina ke bumba madya samu dikanda ya nge kufwa ve nsatu.’ Faraoni vutulaka: ‘Ni nge mu me soola! Nge ke vanda muntu ya zole ya kulutila mfunu na kati ya Ezipte!’ Wa’ faso Yozefi zabaka yinki zola zonza bandosi ya Faraoni? Ni Yehova sadisaka yandi.

Na kati ya bamvula 7 yina landaka, Yozefi bumbaka madya. Na manima nsatu ya ngolo bulaka ntoto nyonso, kaka mutindu Yozefi zonzaka yawu. Bantu vanda katuka na bisika nyonso samu na kukwiza sumba madya na Yozefi. Tata ya yandi, Yakobi kuwaka ti madya vandaka na Ezipte. Na yawu, yandi filisaka 10 ya bana ya yandi samu na kwenda sumba madya.

Bana ya Yakobi kwendaka na Yozefi. Ntangu Yozefi talaka bawu, yandi zabaka ti ya vandaka bayaya ya yandi. Kasi bayaya ya yandi zabaka ve ti ya vandaka Yozefi. Ba fukamaka na mantwala ya yandi, kaka mutindu yandi talaka yawu na ndosi ntangu yandi vandaka ntwenya. Yozefi vandaka na nsatu ya kuzaba kana bayaya ya yandi vanda yiinaka ntete yandi. Na yawu yandi zonzaka na bawu: ‘Beno me kwiza tala bwala ya beto samu na kusosa kuzaba bisika yina beto kele ve ngolo.’ Ba zonzaka: ‘Ve! Beto butamaka beto 12, beto ke bantu ya Kanana. Mpangi ya beto mosi kufwaka, mpe mwana-nsuka me bikana na tata ya beto.’ Yozefi zonzaka na bawu: ‘Beno nata yandi awa mpe mu ke kwikila na mambu yina beno ke na zonzaka.’ Na yawu, ba vutukaka na tata ya bawu.

Ntangu madya manisaka dyaka, Yakobi filisaka dyaka bana ya yandi na Ezipte. Ba nataka Benzame mwana-nsuka ya bawu. Samu na kumeka bampangi ya yandi, Yozefi bumbaka kopo ya yandi ya kisengo na kati ya saki ya bambuma ya Benzame mpe na manima Yozefi vuninaka bampangi ya yandi ti ba me laba yawu. Ntangu bisadi ya Yozefi kuzwaka kopo na kati ya saki ya Benzame, bampangi ya Yozefi pamukaka. Ba bondilaka Yozefi na kusemba bawu na kisika ya Benzame.

Ntangu yayi, Yozefi kwizaka zaba ti bampangi ya yandi sobaka. Yozefi vanda lenda dyaka ve kukanga ntima. Yandi dilaka mpe zonzaka: ‘Ya ke munu mpangi ya beno Yozefi. Tata ya munu ke ntete moyo?’ Bampangi ya yandi pamukaka. Yandi zonzaka: ‘Beno kunyonga ve samu na mambu yina beno salaka munu. Nzambi filisaka munu awa samu na kuvuukisa luzingu ya beno. Ntangu yayi, beno kwenda mbangu mpe beno nata tata ya munu awa.’

Ba vutukaka na bwala ya bawu samu na kuzonza na tata ya bawu nsangu ya mbote yayi, mpe ba nataka yandi na Ezipte. Na manima ya bamvula mingi, Yozefi na tata ya yandi kwizaka vukana dyaka.