Hulda lungisá dikanisi ya yandi
NA BWALA ya Indonésie, na mwa île mosi ya fioti yina ba ke bokilá Sangir Besar, bantu nyonso zaba bampangi ya beto tatu ya bakento samu na kisalu ya bawu ya kusamuna. Ba ke sadisá bantu na kuzaba Biblia. Kasi, mwa bamvula yina me luta, ba vandá sala mpe kisalu ya nkaka pene-pene ya maza.
Île ya Sangir Besar na nore ya Indonésie
Na kubanda, ba vandá tambula na kati ya maza, ba vandá sosa matadi ya nene mpe ba vandá basisa yawu na ngaanda ya maza. Matadi ya nkaka vandá nene mutindu ballon. Na manima, bakento tatu yayi vandá vanda na zulu ya mwa dibaya mpe vandá sadila kikonko (marteau) samu na kupasula matadi yango na bitini ya fioti-fioti mutindu meki ya nsusu. Ntangu ba vandá manisa na kupasula yawu, ba vandá tula matadi ya fioti-fioti yina na kati ya bakantine ya plastike mpe vandá nata yawu na bayinzo ya bawu yina vandá na kisika mosi na mwa zulu. Na manima, ba vandá kotisa yawu na kati ya basaki ya nene. Basaki yango vanda kwenda na ba camions mpe bantu vanda sadila matadi yango samu na kutunga banzila.
Hulda ke na lokotá matadi pene-pene ya maza
Hulda ke mosi ya bampangi tatu yayi. Samu yandi vandá na mwa ntangu mingi kulutila bampangi, Hulda vanda salá kisalu yayi kulutila bawu. Yandi vandá sadila mbongo yina yandi vandá kuzwa samu na kukipe dikanda ya yandi. Kasi awa, yandi vandá sala na dikanisi ya nkaka na yintu. Yandi vandá na nsatu ya kusumba tablette yina zolá sadisa yandi na kukota na JW Library. Hulda zabá ti bavideo mpe bima ya nkaka yina ke na kati ya JW Library, zolá sadisa yandi na kubakula Biblia mbote-mbote mpe kubongisa kisalu ya yandi ya kusamuna.
Na kati ya ngonda mosi na ndambu, Hulda salaka kisalu yayi bangunga zole konso suka. Yandi vandá pasula matadi mingi mpe vandá lenda kufulusa manima ya camion ya fioti. Ya sadisá yandi na kuzwa mbongo samu na kusumba tablette.
Hulda na tablette ya yandi
Hulda zonzaka: “Ata ti kisalu yayi vandá kisalu ya mpasi mpe vandá lembisa munu mingi, mu zimbaná bampasi nyonso yayi ntangu mu vandá sadila tablette ya munu na kisalu ya kusamuna mpe na kubongisa balukutakanu. Ya vandá dyaka ve mpasi na kusala nyonso yayi.” Yandi zonzá mpe ti tablette yango sadisá yandi na kubanda ya maladi ya COVID-19, samu ti bamambu nyonso ya kimpeve vandá salama na nzila ya internet. Beto ke sepelá mingi na yina Hulda lungisaka dikanisi ya yandi.