Byuvu ya ba yina ke tangá mikanda ya beto
Na Nkunga 61:8, Davidi zonzá ti yandi ke kembila nkumbu ya Nzambi ‘ya mankululu.’ Yandi sosá kuzonza kwandi ti yandi ke fwa ata fioti ve?
Ve. Ni yawu ve Davidi vandá sosa kuzonza. Kasi, mambu yina yandi soniká vandá ya tsyeleka mpe ya zolá salama.
Beto tala mambu yina yandi zonzá na verse yayi mpe baverse ya nkaka yina ke zonzilá mambu mosi: ‘Munu ke yimba bankunga samu na kukumisa nkumbu ya nge ya mankululu, ntangu munu ke lungisa bansilulu ya munu konso kilumbu.’ ‘Munu ke kumisa nge, O Yehova Nzambi ya munu, na ntima ya munu ya mvimba, mpe munu ke pesa nkumbu ya nge nkembo ya mankululu.’ ‘Munu ke kumisa nkumbu ya nge mvula na mvula.’—Nku. 61:8; 86:12; 145:1, 2.
Ntangu Davidi soniká mambu yayi, yandi kanisá ve ti yandi ke fwa ata fioti ve. Yehova zonzá ti disumu ke nata bantu na lufwa, mpe Davidi zabá ti yandi vandá muntu ya masumu. (Kub. 3:3, 17-19; Nku. 51:4, 5) Yandi zabá ti ata bantu yina vandá ya kukangama na Nzambi mutindu Abrahami, Izaki, mpe Yakobi kufwaka. Ntembe ve, Davidi zabá ti yandi mpe ke kufwa. (Nku. 37:25; 39:4) Kasi, bamambu yina yandi soniká na Nkunga 61:8 ke lakisá nsatu ya ngolo yina yandi vandá na yawu ya kubika ve kukembila Yehova ya mankululu, ya zola zonza luzingu ya yandi nyonso.—2 Sa. 7:12.
Bamambu ya nkaka yina Davidi soniká ke zonzilá luzingu ya yandi, mutindu beto lenda tanga yawu na kubanda ya Bankunga 18, 51, na 52. Na Nkunga 23, Davidi zonzilá Yehova mutindu mvungi yina ke twadisá, ke pesá ngolo mpe ke bumbá mameme ya yandi. Davidi vandá mvungi ya mutindu yina mpe yandi vandá na nsatu ya kusadila Nzambi ‘bilumbu nyonso ya luzingu ya yandi.’—Nku. 23:6.
Kasi, beto zimbana ve ti ni Yehova twadisá Davidi na kusonika bamambu yina yandi sonikaka. Na kati ya bamambu yina yandi soniká, ya ke mpe na bambikudulu yina zolá salama na mantwala. Na kifwani, na Nkunga 110, Davidi zonzilá ntangu Mfumu ya yandi zolá ‘vanda na diboko ya Nzambi ya kitata’ na mazulu, mpe kuzwa ngolo ya nene. Ngolo ya kusala yinki? Ya kuyala na kati ya bambeni ya Nzambi mpe ‘kupesa makanda na ntoto kitumbu’. Davidi vandá nkooko ya Masiya, Mfumu yina zolá vanda na mazulu mpe kuyala ntoto. Mpe Masiya zolá vanda ‘nganga-nzambi ya mankululu.’ (Nku. 110:1-6) Yesu lakisá ti mbikudulu yina ke na Nkunga 110 ke zonzilak’ yandi mpe ya zolá lungana na bilumbu yina ke kwiza.—Mat. 22:41-45.
Ya tsyeleka, Yehova twadisá Davidi na kusonika samu na ntangu ya yandi mpe samu na bilumbu yina ke kwiza, ntangu yandi ke vumbuka na lufwa mpe ke vanda na kilengi ya kukembila Yehova ntangu nyonso. Na yawu, Nkunga 37:10, 11, 29 ke zonzilá ntangu ya Davidi mpe bilumbu yina ke kwiza. Baverse yayi lunganá na ntangu ya Izraele ya ntama mpe ya ke lungana na bilumbu yina ke kwiza, ntangu Yehova ke lungisa bansilulu ya yandi.—Tala paragrafe 8 ya disolo “Nge ke vanda na munu na paradiso” na mukanda yayi.
Nkunga 61:8 mpe baverse ya nkaka yina ke zonzilá mambu mosi ke na lakisá ti na ntangu ya Izraele ya ntama, Davidi vandá sosa kukembila Yehova tii lufwa ya yandi. Ya ke na lakisá mpe mambu yina Davidi ke sala na bilumbu yina ke kwiza, ntangu Yehova ke vutula yandi na luzingu.