Nge na zabá dyaka?

Nge me tanga mbote-mbote masolo ya Yinzo ya Kengidi ya mvula yayi? Beto tala kana nge lenda pesa bamvutu na byuvu yayi:

Wapi bambote beto ke kuzwa kana beto baka ntangu ya kusolola na Yehova, kuwa yandi mpe kukanisa na yandi?

Beto ke baka mikanu ya mbote, beto ke bongisa faso ya beto ya kulonga, kiminu ya beto ke kuma ngolo mpe luzolo ya beto samu na Yehova ke kula.—w22.01, p. 30-31.

Samu na yinki ya ke mbote na kulongoka kutula ntima na Yehova mpe na ba yina yandi me soola samu na kutwadisa beto?

Yayi ni ntangu ya kulongoka kutula ntima na faso ya Yehova ya kusala bamambu. Beto ke salak’ yawu ntangu beto ke salá ve ntembe na mikanu yina bakuluntu ke baká mpe na nzila yina ba ke lakisá beto. Ntangu mpasi ya nene ke banda, beto ke vanda ya kubongama samu na kutumama na misiku yina ba ke pesa beto, ata ya lenda talana buzoba.—w22.02, p. 4-6.

Yinki mbazi vandá sosa kuzonza ntangu yandi zonzilá “nsinga ya bamaso na diboko ya Zorobabele”? (Zak. 4:8-10)

Kimona-meso vandá sosa kulakisa na bana ya Izraele ti, ata yinzo ya Nzambi ya malu-malu vandá ve kitoko faso ya ntama, kasi na meso ya Yehova, ya vandá ya kulunga.—w22.03, p. 16-17.

Wa’ faso beto lenda vanda ‘kifwanusu ya mbote na mambu yina beto ke zonza’? (1 Tim. 4:12)

Beto ke zonzá na luzolo nyonso mpe buzitu ntangu beto ke samuná, beto ke yimbá na ntima ya beto nyonso mpe ke pesá bamvutu na balukutakanu, beto ke zonzá matsyeleka, beto ke zonzá na mutindu yina ke kindisá bampangi, mpe beto ke losá bifingu ya mitindu nyonso.—w22.04, p. 6-9.

Samu na yinki nzutu ya kibulu yina ba ke zonzilá na Luzabusu 13:1, 2 ke mutindu ba me vukisa bibulu (bimfumu) 4 ya Danyele kikapu 7?

Kibulu yina ba ke zonzilá na Luzabusu 13 ke ve kaka kifwani ya guvernema mosi to kimfumu mosi ya nene, mutindu Rome. Kibulu yayi ke kifwani ya baguvernema yina me yala na zulu ya bantu banda ntama tii bubu yayi.—w22.05, p. 9.

Wa’ faso beto lenda lakisa kiminu ya beto na faso Yehova ke zengá bamambu?

Ntangu ba ke fingá beto, ba ke salá mambu yina me nyongisa beto, to ba ke salá beto mambu ya yimbi, beto ke salá bangolo na kubumba ve nkele, mpe beto ke biká bamambu na maboko ya Yehova. Yandi ke yidika yimbi nyonso yina disumu me nata.—w22.06, p. 10-11.

Ntangu ba ke lombá na mpangi ya bakala na kusala lusambu na lukutakanu, yinki yandi zolá zimbana ve?

Ba ke salá ve lusambu samu na kupesa malongi na bampangi, to samu na kukabula bansangu. Mpangi yina ke sambila zolá zonza ve “mambu mingi,” mingi-mingi kana ya ke lusambu ya kubanda. (Mat. 6:7)—w22.07, p. 24-25.

Wapi mutindu “bayina salaka mambu ya yimbi ke vumbuka na lufwa samu na lufundusu”? (Yoa. 5:29)

Lufundusu yina ba ke zonzilá awa zola zonza ve ti ba ke kuzwa kitumbu samu na bamambu ya yimbi yina ba salá tekila ba kufwa. Kasi, ya zola zonza ti Yesu ke tala mbote-mbote bamambu yina ba ke sala na manima ya kuvumbuka na lufwa.—w22.09, p. 18.

Wapi mambu ya kitoko mpangi J. F. Rutherford zonzá na lukutakanu ya nene yina salamá na septembre 1922?

Na lukutakanu yina salamá na Cedar Point, na Ohio, na États-Unis, yandi zonzaka: “Mfumu Yesu ke na yalaka. Beno me fwana kuzonzila yawu na bantu nyonso. Beno samuna, beno samuna, beno samuna Mfumu na Kimfumu ya yandi!”—w22.10, p. 3-5.

Na Izaya kikapu 30, wapi bamambu tatu Yehova ke salá samu na kusadisa bisadi ya yandi na kukanga ntima?

Kikapu yayi ke lakisá ti Yehova ke 1) wá mpe ke pesá bamvutu na balusambu ya beto, 2) ke twadisá beto, mpe 3) ke sakumuná beto bubu yayi mpe ke sala dyaka yawu na mantwala.—w22.11, p. 9.

Samu na yinki beto lenda zonza ti bamambu yina ke na Nkunga 37:10, 11, 29 lunganá na ntama mpe ya ke lungana dyaka na bilumbu yina ke kwiza?

Bamambu yina Davidi soniká ke lakisá mbote-mbote bamambu ya kitoko yina vandá salamá na Izraele, ntangu Salomo vandá mfumu. Yesu zonzilá na paradiso mpe na Nkunga 37:11. (Mat. 5:5; Luke 23:43)—w22.12, p. 8-10, 14.