‘Nge ke vanda na munu na paradiso’

1. Mwa ntangu fioti tekila Yesu kufwa, yinki yandi zonzá na bakala mosi yina vandá pene-pene na yandi? (Luke 23:39-43)

YESU na bimpumbulu zole yina vandá na yandi ke na kufwaka. (Luke 23:32, 33) Babakala zole yayi vandá ve bilandi ya Yesu. Kana ba vandá bilandi ya yandi, ba zolá seka ve yandi. (Mat. 27:44; Mrk. 15:32) Kasi mosi na kati ya bawu sobá makanisi ya yandi. Yandi zonzaka: “Yesu, bambukila munu moyo ntangu nge ke kwiza mutindu ntinu.” Yesu vutulaka: ‘Mu ke na kuzabisa nge bubu yayi: nge ke vanda na munu na paradiso.’ (Tanga Luke 23:39-43.) Ata kima ke na lakisá ti bakala yayi ndimá nsangu ya “Kimfumu ya Mazulu,” yina Yesu vandá samunaka. Mpe Yesu zonzá ve na yandi ti yandi ke vanda na Kimfumu ya yandi na zulu. (Mat. 4:17) Na yawu, Yesu vandá zonzila paradiso yina ke vanda na ntoto. Samu na yinki beto lenda zonza yawu?

2. Yinki ke na lakisá ti kimpumbulu yina sololá na Yesu vandá zwife?

² Ntangu ya nkaka, bakala yayi vandá zwife. Yandi zonzá na mpangi ya yandi: “Nge ke na kuzitisa Nzambi ve, nge muntu me kuzwa kitumbu mosi na muntu yayi?” (Luke 23:40) Bazwife vandá sambilá kaka Nzambi mosi, kasi bantu ya makanda ya nkaka vandá sambilá banzambi mingi. (Bas. 20:2, 3; 1 Ko. 8:5, 6) Kana babakala yayi vandá ve bazwife, yandi zolá zonza na mpangi ya yandi: “Nge ke ve na boma ya banzambi?” Dyaka, ba filisá ve Yesu na bantu ya makanda ya nkaka, kasi na ‘bantu ya Izraele yina vandaka mutindu mameme ya kuzimbana.’ (Mat. 15:24) Nzambi lakisá na bantu ya Izraele ti yandi zolá vumbula bantu ya kufwa. Ntangu ya nkaka, bakala yango zabá nsilulu yayi. Mpe mambu yina yandi zonzá ke na lakisá ti yandi vandá kanisa ti Yehova zolá vutula Yesu na luzingu samu yandi vanda Mfumu ya Kimfumu ya Nzambi. Ntangu ya nkaka, bakala yayi vandá na kivuvu ti Nzambi zolá vutula mpe yandi na luzingu.

3. Ntangu ya nkaka, yinki kwizá na makanisi ya bakala yina Yesu zonzilá paradiso? Zonzila yawu. (Kubanda 2:15)

³ Samu yandi vandá zwife, ntangu ya nkaka kimpumbulu yayi zabá disolo ya Adami na Eve mpe ya paradiso, kisika yina Yehova tulá bawu. Na yawu, ntangu Yesu zonzilak’ yandi paradiso, ntangu ya nkaka yandi kanisá na kisika mosi ya kitoko awa na ntoto.—Tanga Kubanda 2:15.

4. Bamambu yina Yesu zonzá na kimpumbulu mosi zolá nata beto na kukanisa na yinki?

⁴ Bamambu yina Yesu zonzilá na kimpumbulu yayi zolá nata beto na kukanisa na faso luzingu ke vanda na paradiso. Beto lenda longoka na yina me tadila paradiso ntangu beto ke kanisá na kizunu yina vandá na Izraele ntangu Salomo vandá mfumu. Biblia ke zonzá ti Yesu me lutila Salomo. Na yawu, beto lenda vanda ya kundima ti Yesu na ba yina ke yala na yandi ke sala samu na kukumisa ntoto paradiso. (Mat. 12:42) Ntembe ve, ya ke mfunu “mameme ya nkaka” sosa kuzaba yinki ba lenda sala samu na kuvanda na paradiso.—Yoa. 10:16.

WA’ FASO LUZINGU KE VANDA NA PARADISO?

5. Samu na nge, wa’ faso luzingu ke vanda na paradiso?

⁵ Yinki ke kwizilá nge na yintu ntangu nge ke kanisá na paradiso? Ntangu ya nkaka, nge ke kanisá na kisika ya kitoko mutindu jardin d’Éden. (Kub. 2:7-9) To nge ke kanisá na mbikudulu yina Mika salá ti dikanda ya Nzambi ke vanda ‘konso muntu na yinsi ya yinti ya yandi ya vinu mpe na yinsi ya yinti ya yandi ya bafige.’ (Mika 4:3, 4) Ntangu ya nkaka nge ke bambuká baverse ya Biblia yina ke lakisá ti madya ke vanda mingi. (Nku. 72:16; Iza. 65:21, 22) Nge ke ya kuvanda na table yina ke ya kufuluka na madya, na kisika mosi ya kitoko. Nge ke na wá bansunga ya kitoko ya bayinti na ya bafololo. Ntangu ya nkaka nge ke na wá bantu ya dikanda ya nge na bandiku ya nge ke na sekaka. Ba ke na kilengi na kulutisa ntangu kintwadi. Na kati ya bawu, ya ke mpe na ba yina me vutuka na luzingu. Nyonso yayi ke ve ndosi. Ya ke salama awa na ntoto. Kasi na paradiso, beto ke vanda mpe na kisalu ya kitoko ya kusala.

6. Yinki beto ke sala na paradiso? (Tala kizizi.)

⁶ Yehova salá beto na makoki ya kutala kilengi na kisalu yina beto ke salaka. (Lon. 2:24) Na kati ya bamvula 1000 yina Yesu ke yala, beto ke vanda na mingi ya kusala. Ba yina ke vuuka na mpasi ya nene, mpe ba millions ya bantu yina ke vutuka na luzingu ke vanda na nsatu ya bilele, madya, mpe kisika ya kuvanda. Kusala mingi samu na kulungisa bansatu yayi ke pesa beto kilengi. Kaka mutindu Adami na Eve zolá bundula ntoto, beto mpe ke vanda na bweso ya kusala samu ntoto kuma paradiso. Kanisa mpe na kilengi yina beto ke vanda na yawu na kulonga ba millions ya bantu yina ke vutuka na luzingu. Na kati ya bawu, ya ke vanda na ba yina zabá ve Yehova mpe dikanisi ya yandi samu na bantu. Beto ke sadisa mpe bisadi ya Yehova yina kufwá tekila Yesu kwiza awa na ntoto na kuzaba bamambu nyonso yina salamá na manima ya bawu.

7. Na yinki beto lenda vanda ya kundima, mpe samu na yinki ?

⁷ Beto lenda vanda ya kundima ti, na paradiso, kizunu ke vanda, beto ke vanda na nyonso yina beto ke na yawu nsatu, mpe bamambu ke salama ve na muvusu. Samu na yinki? Samu ti Yehova pesá beto kifwani yina ke na sadisá beto na kuzaba faso luzingu ke vanda ntangu Mwana ya yandi ke yala. Ni na disolo ya kimfumu ya Salomo beto ke talak’ yawu.

KIMFUMU YA SALOMO KE KIFWANI YA LUZINGU NA PARADISO

8. Wa’ faso bamambu yina ke na Nkunga 37:10, 11, 29 lunganá na manima ya Davidi? (Tala “Byuvu ya ba yina ke tangá mikanda ya beto” na mukanda yayi.)

⁸ Yehova natá Davidi na kusonika faso luzingu ke vanda ntangu mfumu ya mayela mpe ya kukangama na Yehova ke yala. (Tanga Nkunga 37:10, 11, 29.) Ntangu beto ke sololá na bantu na mambu ya paradiso, beto ke sadilá mingi Nkunga 37:11. Yesu mpe zonzilá verse yayi na disolo yina yandi salá na zulu ya mongo. Na yawu, yandi vandá lakisa ti mambu yango zolá lungana na bilumbu yina ke kwiza. (Mat. 5:5) Kasi bamambu yayi Davidi soniká zolá salama mpe ntangu Salomo zolá yala. Ntangu Salomo vandá yala bwala ya Izraele, dikanda ya Nzambi vandá na kizunu mingi, mpe bima nyonso na bwala ‘yina miliki na mafuta ya nyosi kele mingi.’ Nzambi zonzaka: ‘Kana beno landa kuzitisa bansiku ya munu, munu ke tula ngemba na yinsi yina, beno ke lala mpe muntu mosi ve ke pesa beno boma.’ (Lev. 20:24; 26:3, 6) Bansilulu nyonso yayi lunganá ntangu Salomo vandá mfumu. (1 Ns. 22:9; 29:26-28) Yehova zonzá mpe ti bantu ya yimbi ke ‘vanda dyaka ve.’ (Nku. 37:10) Nyonso yayi ke na lakisá ti bamambu yina ke na Nkunga 37:10, 11, 29 lunganá na Izraele ya ntama, mpe ya ke lungana na bilumbu yina ke kwiza.

9. Yinki mfumu ya kento ya bwala ya Sheba zonzá ntangu yandi talá bamambu yina vandá salama na kimfumu ya Salomo?

⁹ Mfumu ya kento ya bwala ya Sheba kuwá bansangu ya kizunu mpe bamambu nyonso ya mbote yina vandá na Izraele ntangu Salomo vandá mfumu. Kento yayi katuká ntama samu na kukwenda na Yeruzalemi na kutala yandi mosi bamambu yina yandi kuwaka. (1 Mf. 10:1) Ntangu yandi talá bamambu nyonso yina vandá salama na kati ya kimfumu ya Salomo, yandi zonzaka: ‘Mambu yina ba zabisaka munu me kuma ve ata na kati-kati. Kyese na bantu ya nge, mpe kyese na bisadi ya nge yina ke vandaka ntangu nyonso na nge, mpe ke waka mayela ya nge!’ (1 Mf. 10:6-8) Kasi bamambu nyonso yina vandá salama ntangu Salomo vandá mfumu vandá kaka fioti na mantwala ya bamambu yina Yehova ke sala samu na bantu awa na ntoto ntangu Mwana ya yandi ke yala.

10. Na wapi bamambu Yesu me lutila Salomo?

¹⁰ Yesu me lutila Salomo na nyonso. Salomo vandá muntu ya masumu, mpe yandi salá bamambu ya yimbi yina natiná bampasi mingi na dikanda ya Nzambi. Kasi Yesu ke Mfumu yina ke ya kulunga. Yandi lenda sala ata fioti ve bafoti. (Luke 1:32; Ebr. 4:14, 15) Ata ti Satana kwamisak’ yandi mingi, Yesu bikaná ya kukangama na Nzambi. Yandi lakisá ti yandi lenda sala ata fioti ve disumu, to kusala mambu yina ke talisa bantu yina yandi ke yala, mpasi. Ya ke bweso ya nene na kuvanda na Mfumu mutindu Yesu.

11. Banani ke sala kintwadi na Yesu?

¹¹ Yesu ke yala na bantu 144000. Kintwadi na yandi, ba ke kipe bantu, mpe ba ke lungisa dikanisi ya Yehova samu na ntoto. (Luz. 14:1-3) Ntangu bantu yayi vandá na ntoto, ba kutaná na bantontolo mpe bamambu mingi ya mpasi. Na yawu, ya ke vanda ve mpasi na bawu na kuvanda na kisika ya ba yina ba ke yala. Yinki ba yina ke yala na Yesu ke sala?

KISALU YINA BA YINA BA TULÁ MAFUTA KE SALA

12. Wapi kisalu Yehova me pesa na ba 144000?

¹² Kisalu yina Salomo salá ke fioti na mantwala ya kisalu yina Yesu na ba yina ke yala na yandi ke sala. Mfumu Salomo vandá kipeke kaka ba millions ya bantu yina vandá vandá na bwala mosi. Kasi Yesu na ba yina ke yala na yandi ke kipe ba milliards ya bantu yina ke vanda na yinza nyonso. Ntembe ve, Yehova me pesa bweso ya nene na bantu 144000 yina ke yala na Yesu.

13. Wapi yina ke mosi ya bisalu yina ba yina ke yala na Yesu ke sala?

¹³ Mutindu Yesu, bakristo 144000 ke vanda bamfumu, mpe banganga-nzambi. (Luz. 5:10) Na Musiku ya Moyize, kisalu ya ntete ya banganga-nzambi vandá kusadisa dikanda ya Nzambi na kuvanda na mavimpi ya mbote, mpe kindiku ya mbote na Yehova. Musiku vandá “kinsinsya (to kifwani) ya bima yina ke kwiza.” Na yawu, beto lenda zonza ti ba yina ke yala na Yesu ke vanda na kisalu ya kusadisa bantu na kuvanda na mavimpi ya mbote, mpe kindiku ya mbote na Yehova. (Ebr. 10:1) Bubu yayi beto zaba ve wa’ faso bamfumu mpe banganga-nzambi yayi ke sala samu na kusolola na ba yina ba ke yala awa na ntoto. Faso ni faso Yehova ke yidika bamambu, beto lenda vanda ya kundima ti na paradiso, ba yina ke vanda na ntoto ke kuzwa lutwadusu yina ba ke na yawu nsatu.—Luz. 21:3, 4.

YINKI “MAMEME YA NKAKA” ME FWANA KUSALA SAMU YEHOVA NDIMA BA ZINGA NA PARADISO?

14. Wa’ faso ke kindiku na kati ya “mameme ya nkaka” na bampangi ya Yesu?

¹⁴ Yesu bokilá ba yina ke yala na yandi “nkonga ya mameme.” (Luke 12:32) Yandi zonzilá mpe kikunku ya nkaka yina yandi bokilá “mameme ya nkaka.” Bimvuka zole yayi ke kaka nkonga mosi. (Yoa. 10:16) Bubu yayi, bimvuka zole yayi ke salá kintwadi. Mpe na mantwala, ba ke sala kaka kintwadi ntangu ntoto ke kuma paradiso. Na ntangu yina, ba yina ke na kati ya “nkonga ya mameme” ke vanda na zulu, mpe ba yina ke na kati ya “mameme ya nkaka” ke vanda na kivuvu ya kuzinga ntangu nyonso awa na ntoto. Kasi ya ke na bamambu yina “mameme ya nkaka” me bonga kusala samu Yehova ndima ba zinga na paradiso.

15. a) Wa’ faso “mameme ya nkaka” ke salá kintwadi na bampangi ya Kristo? b) Wa’ faso beto lenda landa kifwani ya mpangi yina ke na kati ya butiki? (Tala kizizi.)

¹⁵ Kimpumbulu yina sololá na Yesu zwá ve bweso ya kuvutula yandi matondo na yina yandi salá samu na yandi. Kasi beto ba yina ke na kati ya “mameme ya nkaka,” ke na bamambu mingi yina beto lenda sala samu na kulakisa luzolo ya beto na Yesu. Beto lenda lakisa yawu na mutindu yina beto ke bakilá bampangi ya yandi yina ba me tula mafuta. Yesu zonzá ti ni na kutalá bamambu yayi yandi ke zaba nani yandi ke ndima mutindu mameme. (Mat. 25:31-40) Beto lenda pesa bampangi ya Yesu diboko na kusala na tiya nyonso kisalu ya kusamuna mpe kukumisa bantu bilandi ya Yesu. (Mat. 28:18-20) Na yawu, beto me bonga kusadila na faso ya mbote bima nyonso yina ba ke pesá beto samu na kulungisa kisalu, mutindu buku Sepela na luzingu ya ntangu nyonso! Kana bubu yayi nge ke ve na muntu yina ke longoká Biblia na nge, nge lenda baka mukanu ya kulongoka Biblia na bantu yina nge ke kutaná na bawu.

16. Yinki beto lenda sala samu na kuvanda bantu ya Kimfumu ya Nzambi?

¹⁶ Beto ke ve na nsatu ti paradiso kwiza samu na kukuma bantu yina Yehova ke ndima na kuvanda kuna. Banda bubu yayi, beto lenda sala bangolo samu na kuvanda bantu ya matsyeleka na bamambu yina beto ke zonzá mpe ke salá, mpe bantu yina ke lutisá ve bandilu. Mpe beto lenda lakisa ti beto ke ya kukangama na Yehova, na bakala to kento ya beto mpe na bampangi ya beto bakristo. Kana beto landa misiku ya Yehova na yinza ya yimbi yayi, ya ke vanda ve mpasi na beto na kulanda yawu na paradiso. Beto lenda kulisa mpe bifu ya mbote mpe mayela ya kusala bamambu ya nkaka samu na kubongama na kuvanda na paradiso. Tala na mukanda yayi disolo “Nge ke kwandi ya kubongama samu na ‘kubaka ntoto’?”

17. Masumu yina beto salá na ntama zolá nyongisa kwandi beto ntangu nyonso? Zonzila yawu.

¹⁷ Beto me bonga mpe kusala bangolo samu na kubika ve ntima ya beto kwamisa beto ntangu nyonso na masumu yina beto salá na ntama. Ntembe ve, munkayulu ya Yesu ke pesá ve beto nzila na “kutatamana na kusala masumu na luzolo ya beto.” (Ebr. 10:26-31) Kasi beto lenda vanda ya kundima ti kana beto me balula ntima, beto me sosa lubakusu ya Yehova na ya bakuluntu mpe beto me soba ndyatulu ya beto, Yehova me lemvokila beto. (Iza. 55:7; Bis. 3:19) Kuzimbana ve mambu yayi Yesu zonzá na Bafarize: “Mu me kwiza ve samu na kubokila bantu ya kudedama, kasi misumuki.” (Mat. 9:13) Munkayulu ya Yesu ke na ngolo ya kusala ti Yehova lemvokila masumu nyonso yina beto me sala.

NGE LENDA ZINGA NTANGU NYONSO NA PARADISO

18. Wapi masolo nge ke zola kusala na kimpumbulu yina kufwá kintwadi na Yesu?

¹⁸ Kanisa mwa fioti: nge ke na paradiso, mpe nge ke na sololá na kimpumbulu yina sololá na Yesu. Ntembe ve, beno nyonso zole ke zonzila kilengi ya beno samu na munkayulu ya Yesu. Ntangu ya nkaka nge ke zonza na yandi na kuzabisa nge wa’ faso vandá bantangu ya nsuka ya luzingu ya Yesu awa na ntoto, mpe yinki ya salak’ yandi na kuwa mvutu yina Yesu pesak’ yandi. Yandi mpe lenda yufula nge wa’ faso vandá luzingu na kati ya bilumbu ya nsuka ya yinza ya Satana. Ya ke vanda bweso ya nene na kulonga mambu ya Nzambi na bantu mutindu bakala yayi.—Ef. 4:22-24.

19. Samu na yinki beto ke lemba ve na kuzinga na paradiso? (Tala kizizi ya paje ya kubanda.)

¹⁹ Beto ke lemba ata fioti ve na kuzinga na paradiso. Ntangu nyonso beto ke kutana na bantu ya mbote, mpe beto ke vanda na kisalu ya mbote. Kasi ya kulutila, konso kilumbu beto ke longoka dyaka mingi na yina me tadila Tata ya beto ya mazulu mpe bamambu nyonso yina yandi me sala samu na beto. Beto ke vanda kaka na mingi ya kulongoka na yina me tadila yandi mpe bima yina yandi yidikaka. Bilumbu nyonso, luzolo ya beto samu na yandi ke kuma kaka ngolo. Beto ke na vutulá matondo mingi na Yehova mpe na Yesu na yina ba me pesa beto nsilulu ti beto ke zinga ntangu nyonso na paradiso.