Bika dikanisi ya Nzambi twadisa nge na yina me tadila malafu

BETO ke sepelá mingi na makabu yina Yehova ke pesá beto. Na kati ya yawu ke na makoki ya kubaka mikanu. Na wa’ faso beto ke sadila makabu yina? Biblia zonzaka ti vinu ke dikabu yina me katuka na Yehova. Ya ke zonzaka: ‘Ba ke salaka mampa samu na kuseka, mpe vinu ke pesaka kyese na luzingu.’ (Lon. 10:19; Nku. 104:15) Ata faso yina, malafu me natina bantu ya nkaka mpasi. Dyaka, na yinza nyonso bantu mingi ke ve na dikanisi mosi na yina me tadila malafu. Na yawu, yinki lenda sadisa mukristo na kubaka mukanu na ndwenga nyonso?

Ata kisika beto kele, to kisika beto me kula, beto bika makinisi ya Nzambi twadisa faso ya beto ya kukanisa mpe ndyatulu ya beto, samu ti ya ke natina beto mosi bambote.

Mutindu beto zaba yawu, bantu mingi na yinza ke kunwá mingi malafu. Ya ba nkaka ke kunwá malafu samu na kilengi yina ya ke pesá, mpe ya ba nkaka samu na kuzimbana bamambu yina ke na bawu. Dyaka, na babwala ya nkaka bantu mingi ke kanisá ti kunwa malafu mingi ke kuvanda ngolo mpe ya kuyela.

Na yina me tadila Bakristo, ba ke biká Nzambi ya luzolo yina yidiká bawu twadisa bawu. Na kifwani, yandi zonzá na beto bamambu ya mpasi yina lenda kumina beto kana beto vanda na kifu ya kunwá mingi malafu. Beto lenda tanga Bingana 23:29-35 yina ke na lakisá bampasi yina ke kuminá muntu yina ke na kifu ya kunwá malafu mingi.a Daniel, kuluntu mosi yina ke na Europe, ke na zabá dyaka luzingu ya yandi tekila yandi kuma mukristo ya tsyeleka.Yandi me zonza: “Kunwa malafu mingi natá munu na kubaka mikanu ya yimbi mpe tii bubu yayi ya ke talisá munu mpasi.”

Wa’ faso Bakristo lenda sadila makoki ya kubaka mikanu samu na kubwa ve na bampasi yina kunwa malafu mingi ke nataka? Ni kubika makanisi ya Nzambi twadisa makanisi ya beto mpe ndyatulu ya beto.

Beto tala yinki Biblia ke zonzá na yina me tadila malafu mpe yinki ke natá bantu ya nkaka na kunwa yawu.

DIKANISI YA BIBLIA NA YINA ME TADILA MALAFU

Biblia ke niminá ve na kunwa malafu na faso ya mbote. Bilbia ke zonzá mpe ti: ‘Kudya madya ya nge na kyese, mpe kunwa vinu ya nge na ntima ya kyese.’ (Lon. 9:7) Yesu mpe bisadi ya nkaka ya Yehova vandá kunwá vinu.​—Mat. 26:27-29; Luke 7:34; 1 Tim. 5:23.

Kasi, Biblia ke zonzá pwelele luswaswanu yina kele na kunwa malafu na faso ya mbote mpe kukola malafu. Ya ke zonzaka: “Beno kola malafu ve.” (Ef. 5:18) Mpe ya ke bwelá ti “bayina . . . ke kolaka malafu . . . ke kota ve na Kimfumu ya Nzambi.” (1 Ko. 6:10) Yehova ke zolá ata fioti ve kifu ya kukola malafu. Beto bika ata fioti ve bantu twadisa makanisi ya beto na yina me tadila kunwa malafu, kasi beto landa makanisi ya Yehova.

Bantu mingi ke kanisá ti ata ba kunwa malafu mingi ba ke kola ve yawu. Kukanisa mutindu yayi, ke yimbi mingi. Biblia ke zonzá pwelele ti “bantu yina ke kunwaka malafu mingi,” ya vanda babakala to bakento, ya lenda nata bawu na kusala bamambu ya yimbi. (Tite 2:3; Bin. 20:1) Yesu zonzá mpe ti “kukola malafu” lenda sala ti muntu kota ve na yinza ya malu-malu. (Luke 21:34-36) Yinki lenda sadisa mukristo na kubwa ve na bampasi yina kukola malafu ke nataka?

KANISA NA NTANGU, SAMU NA YINKI, MPE WAPI MUNTINDU NGE KE NA KUNWAKA

Ya ke yimbi na kubika faso ya bantu ya kutadila bamambu na kisika yina beto kele twadisa beto na yina me tadila kunwa malafu. Na yina me tadila kunwa to kudya, Bakristo ke baká mikanu yina ke sepelisá Yehova. Biblia ke zonzá na beto: “Ata ti beno ke na kudya, kunwa, to ti beno ke na kusala kima ni kima, beno sala nyonso samu na nkembo ya Nzambi.” (1 Ko. 10:31) Beto tala mwa byuvu mpe malongi yina beto lenda kanisa na yawu:

Mu ke kunwá kwandi malafu samu bampangi ndima munu? Kubasika 23:2 ke zonzaka: ‘Nge fwana kulanda ve kimvuka ya bantu.’ Awa Yehova vandá kebisa bantu ya Izraele na kulanda ve bantu yina ke sadilá ve yandi. Mambu yayi ke na tadilá beto mpe bubu yayi. Kana beto bika bantu ya nkaka twadisa makanisi ya beto mpe mikanu na yina me tadila malafu, ya lenda sala ti beto landa dyaka ve misiku ya Yehova.​—Rom. 12:2.

Mu ke kunwá kwandi malafu samu na kulakisa ti munu mpe mu ke ngolo na yawu? Na bisika mingi, kunwa malafu mingi ke ve yimbi. (1 Pi. 4:3) Kasi, 1 Bakorinto 16:13 ke zonzaka: “Beno zibula meso, mpe beno vwanda ya kusikama na kiminu. Beno vwanda na kibakala mpe ngolo.” Malafu lenda sadisa kwandi muntu na kukuma na ngolo? Ata fioti ve. Malafu lenda bebisa faso ya muntu ya kukanisa mpe ya kusala bamambu. Mpe kunwa malafu mingi ke ve kulakisa ti beto ke na ngolo. Ya ke lakisá ti beto ke kaka zoba. Izaya 28:7 ke zonzilá yinki ke kuminá na muntu yina ke kolá malafu mpe bampasi yina ya lenda natina yandi.

Ngolo ya tsyeleka ke katuká na Yehova, mpe ya zola zonza ‘kuzibula meso mpe kuvanda ya kusikama na kiminu.’ (Nku. 18:32) Samu na kusala yawu, mukristo me lunga kuvanda ekenge samu na kubumba kiminu ya yandi. Yesu vandá na kindiku ya ngolo na Yehova, mpe bantu mingi vandá zitisak’ yandi samu yandi vandá na bukindi mpe vandá kaka na nsatu ya kusala mambu ya mbote.

Mu ke kunwá kwandi malafu samu na kukima bamambu? Mosi ya bantu yina soniká Bankunga zonzaka: ‘Ntangu basusi lutilaka munu, nge [Yehova] pesaka munu ngolo mpe nge zunisaka ntima ya munu.’ (Nku. 94:19) Kana bamambu ke na kwamisá nge, tula ntima na Yehova samu yandi zunisa ntima ya nge, kasi ve na malafu. Kusambila mingi lenda sadisa nge na kusala yawu. Mingi ke talá mpe ti, ya ke mbote na kulomba malongi na bandiku yina ke ya kukula na kimpeve na kati ya kimvuka. Kunwa malafu mingi samu na kukima bamambu, lenda bebisa nzutu mpe makanisi ya kusala mambu ya mbote. (Oze 4:11) Daniel, yina beto me zonzila me ndima: “Mu me sala bangolo mingi samu na kukatula makanisi ya yimbi yina vandá kwamisa munu. Mu vandá kunwá malafu mingi samu na kuyidik’ yawu, kasi bamambu vandá beba kaka. Ya salá ti mu bebisa kindiku ya munu na bampangi mpe mu talá ti, mu ke kaka muntu mpamba.” Yinki sadisá Daniel? Yandi me zonza: “Mu talá ti mu vandá ve na nsatu ya malafu, kasi mu vandá na nsatu Yehova sadisa munu. Mu lendá kununga bampasi yina vandá na munu.” Yandi kwizá ndima ti, ata ti mambu yina ke na beto ke mpasi mingi, Yehova ke ntangu nyonso ya kubongama samu na kusadisa beto.​—Flp. 4:6, 7; 1 Pi. 5:7.

Kana nge ke kunwá malafu bantangu ya nkaka, nge me bonga kukanisa na byuvu yayi: ‘Ya ke kwandi na muntu ya dikanda ya munu to ndiku ya munu yina ke talá ti mu ke kunwá mingi malafu?’ Kana ni yawu ya lenda lakisa ti nge ke na kulisá kifu mosi ya yimbi yina nge ke na talá ve. ‘Mu ke kunwá kwandi malafu mingi kuluta na ntama?’ Ata muntu yina ke kunwá ve malafu mingi lenda kanisa mpe na kyuvu yayi. ‘Ya ke kwandi mpasi na munu na kulutisa mwa bilumbu kana mu kunwa ve malafu?’ Kana ya ke mutindu yina, ya lenda vanda ti nge me kuma na kifu ya kunwa malafu mingi. Mpe ya lenda lomba lubakusu ya dokotolo samu yandi sadisa nge na kununga kifu yayi.

Samu na bamambu mingi ya mpasi yina kukola malafu ke natá, Bakristo ya nkaka ke kunwá ve malafu. Ba ya nkaka ke mangá kunwa malafu samu bawu mosi ke zolá ve. Kana mpangi ya nge me soola kunwa to ve, nge me bonga kuzitisa mukanu ya yandi mpe kuzonzila ve yimbi ya yandi.

Ya lenda vanda ti nge tulá bandilu na yina me tadila kunwa malafu. Mpe nge baká mukanu ya kunwa malafu yina nge zaba, yina ke ve ngolo, mpe yina ba ke vukisá ve kidi-kidi. Ntangu muntu ke salá bandilu na bima yina yandi ke kunwa ya ke sadisak’ yandi na kulanda yawu mbote-mbote. Mpe ya me bonga ve na mukristo yina ke ya kukula na kimpeve na kutala ntima mpasi samu ti yandi me tula bandilu mpe ti yandi ke na nsatu ya kulanda yawu mbote-mbote.

Ntangu beto ke baká mukanu ya kunwa malafu, beto kanisa na yina ya lenda sala na bampangi. Baroma 14:21 ke zonzá: “Mambu ya mbote, ni kudya ve mbisi, kunwa ve vinu, to kumanga bima nyonso yina lenda kubwisa mpangi ya nge na masumu.” Wa’ faso nge lenda sadila malongi yayi? Lakisa luzolo ya nge na bampangi. Kana nge ke na nsatu ya kunwa maIafu, kasi nge zaba ti ya lenda lwalisa mpangi yina ke na nge, luzolo ya nge samu na yandi ke nata nge na kunwa ve. Ntangu nge ke sala yawu, nge ke lakisa ti nge ke zitisá mpe ke zolá bampangi. Nge ke lakisa mpe ti nge ke tulá bansatu ya bawu na mantwala ya bansatu ya nge mosi.​—1 Ko. 10:24.

Bakristo me lunga kubika misiku ya luyalu twadisa bawu na yina me tadila malafu. Misiku yina lenda vanda: bamvula yina me lunga samu na kunwa malafu, mpe kunwa ve malafu ntangu beto ke natá to ntangu beto ke na sadilá ba appareils.​—Rom. 13:1-5.

Yehova me pesa beto makabu mingi ya kitoko, mpe mosi ya makabu yango ke makoki ya kusoola wa’ faso beto lenda sadila yawu. Ya zola zonza makoki yina ke na beto ya kusoola yina beto ke kudya mpe yina beto ke kunwa. Bika ti mikanu ya beto lakisa ti, beto ke sepelá na dikabu yina Yehova me pesa beto. Beto ke lakisak’ yawu ntangu beto ke salá bamambu yina ke sepelisá Yehova, Tata ya beto.