Mwasiwa Ngwan’ni Mulungu Un’na Gulu?

1. Mwasiwa ngwan’ni Mulungu asakhunle aisrayeli ira kakhale athwaye?

Mulungu oiri-a mbewu ya aburahamu khala n’longo n’lukhulu, liye ava-a malamulo ira ka-arelenga. Liye oowava-a zina loi “Israyeli” thetho oowasakhula ira kamulambelenga mu ndhila yofwaaneelela no arela mazwaye. (Salimu 147:19, 20) Mwa ndhila yenela, athu amalogo methene kooza kawachele madaliso zela mwa n’logo la israyeli. — Welengani Genesesi 22:18.

Mulungu oosakhula aisrayeli ira kakhale mboni daye. Limbili liwa linonikhami-a iziwa ira athu kanodalisiwa ka-arelanga malamulo a Mulungu. (Dotoronomo 4:6) Moi eeno, wona no arela vyoira vya aisraeli wookhami-eda athu amo-i funjeda vya Mulungu wa imbarimbari. — Welengani Yesaya 43:10, 12.

2. Mwasiwa ngwan’ni Akiristu aimbarimbri khali ovwanana?

Vira wa thawi Aisrayeli koo-iya m’vwela Mulungu, Mulungu naliyene oo-iya awomeliwana, liye sakhula mpingo waikiristu khala gulu laye. (Mateyu 21:43; 23:37, 38) M’malo mwa Aisrayeli, pheenova mba Akiristu aimabarimbari anayo kanalambela n’nga mboni da Yehova. — Welengani Vyoira 15:14, 17.

Yesu ooruma o-arelaye ira kadowe kalaleele no panga ofunjedaye mwa malogo ethene a athu. (Mateyu 10:7, 11; 24:14; 28:19, 20) M’malambo omari-ala, mabasa olaleela kano-indiwa kwaranyeda wale. Eeni kwaranya wale, Yehova unana gumani-a athu a malogo methene ugulu laye laimbarimbari. (Chivumbuluso 7:9, 10) Akiristu aimbarimbari kanovwanana na yolinga yoira kalimbi-anenga no khami-ana muthu na fwaye. Va ilambo yethene aluwa kanokhaana porogarama yofwanafwana yofunjedela Bayibulo m’migumano mwiwa. — Welengani Aheberi 10:24, 25.

3. N’nga gulu la Mboni da Yehova la malambwano lambeele avi?

Mu chaka ya 1870, gulu ling’onog’ono la ofunjenda Bayibulo lo-owambeela khumelela imbarimbari ya m’Bayibulo yeneyo yadiwaliwe mundulimu. Aluwa ko-oiziwa ira Yesu oogarati-a mpingo ira ulaleelenga, moi eeno, ko-owambeela mabasa olaleela vya Umwene va ilambo yethene ya vathi. Mu 1931, ko-othukhula zina loi Mboni da Yehova. — Welengani Vyoira 1:8; 2:1, 4; 5:42.

4. N’nga gulu la mboni da Yehova linaenda avi?

Mu thawi ya anamarumiwa, mipingo mu vilambo dinjinji doopindula na malango okhumela wu Bungue Lothonga lelo laiziwa ira Yesu ngu Muru wa mpigo. (Vyoira 16:4, 5) Mofwanafwana na aluwa, thetho pheenova, Mboni da Yehova dinopindula na malango okhumela wu Bungue Lothonga lelo lin’na andimuwa oing’anela a zelu. Aluwa kanoing’anela tambi da mboni da Yehova dedo dinathapulela, dinda no gawela mabukhu ofunji-a Bayibulo mu viwongelo vyokwaranya 700. Moi eeno, Bungue Lothonga linowandha va-a malango olimbi-a okhumela m’Bayibulo u mipingo dokwaranya 115 000 va ilambo yethene ya vathi. Va kada mpingo vi-ikhala alombwana ofwaneelela anayo kanalaba n’nga andimuwa, vamo-i oing’anela. Alombwanala kanoing’anela gulu la kosa da Mulungu mwa zivelo. — Welengani 1 Petulo 5:2, 3.

A Mboni da Yehova, thi gulu lelo linalaleela milanyo dapama, no panga ofunjeda. Mofwanfwana na anamarumiwa a wale, aluwa kanolaleela nyumba nanyumba. (Vyoira 20:20) Thetho kali okozeya funjeda bayibulo na athu oona murima anayo kanafuna iziwa imbarimbari. Mbwenye Mboni da Yehova kadikhede khala gulu baa-i. Mbwenye kali n’nga banja lokhaana Baba wa zivelo. Aluwa mba abali na arongola thetho kanokhami-ana muthu na fwae. (2 Atesalonika 1:3) Vokhala ira anamalaba a Yehova ti gulu lelo linamowomeliwi-a Mulungu thetho kanofuna khami-eda athu amo-i, aluwa thi banja la imwerumweru va ilambo ya vathi. — Welengani Salimu 33:12; Vyoira 20:35.