MURU 15
Mwasiwa Ngwan’ni Munafuneela Limbi-eda Funjeda Vya Yehova?
1. N’nga limbi-eda funjeda Bayibulo unakhami-edani avi?
Mookayikela, funjeda makundo a m’Bayibulo wuukhami-ani ira muwambeele ziveluwana Yehova. Thawi dethene munafuneya muulukhuli-enga zivelo linyu. (1 Petulo 2:2) Idedi-edo yinyu yoza fwanya ingumi yo-omala inaroromela muwenjedele wandamela Mulungu vofunjeda mazwaye. — Welengani Yohani 17:3; Yuda 21.
Vevo munawenjedelanyo iziwa vinjinji vyokhuza Mulungu iroromelo yinyu inokhala yolimba vinjinji. Iroromelwela inoukhami-ani muziveli-a Mulungu. (Aheberi 11:1, 6) Inoukhami-ani etho ira muchinyuwe nochenja iguminyu. — Welengani Vyoira 3:19.
2. N’nga munaire avi ira vyongo mufunjedilenyo vikhami-e athu amo-i?
Nyo munowada khala va umwe-di wolimba na Yehova.
Mwaikalelo munerenga funa wandela amo-i vyevyo mufunjedilenyo, ethene ninowomeliwa nawandelanga athu milanyo daphama. Mwalimbi-eda funjeda Bayibulo, munofunjeda li-indi-eda chito mwawandelanga athu vyevyo munaroromelanyo vyokhuza Yehova, nowathonyi-eda athu milanyo daphama dedo una liye. — Welengani Aroma 10:13-15.
Athu anjinji kanowambeela nowandela afwiwa na abaliwa vyokhuza vyongo vyaphama kafunjedileathu. Koma inafuneya awandelanga mwazelu. M’malo moonga ira ipembezwiwa cholakweya, awandeleni vyolanyeda vya Mulungu. Muubuwelenga ira thawi dinjinji athu kanakopeya na vyoira vi-u okhala na vyoonga vi-u. — Welengani 2 Timoteyu 2:24, 25.
3. N’nga munakhale va umwendi woi avi na Mulungu?
Funjeda mazu a Mulungu unowukhami-ani ira muulukhule mwauzimu. Vira wa thawi munokhala vaumweendi wofuneya vanjinji na Yehova. Wonga vyoona, munofiya vokhala mu gulu laye lelo lili n’nga banja. — Welengani 2 Akorinto 6:18.
4. N’nga munaire avi ira mufunjede vinjinji vyokhuza Mulungu?
Phi vyowa-deya ulukhula vanjinji mwauzimu mwalimbi-edanga funjeda mazu a Mulungu. (Aheberi 5:13, 14) Vephani muthu uli wethene wa Mboni da Yehova ira afunjedenga nanyo Bayibulo, vo-indi-eda chitho bukhu loyi O Que Nos Ensina a Bíblia? Mwalimbi-edanga funjeda mazu a Mulungu, vyongo vinerenga uwendelani phama va iguminyu. — Welengani Salimu 1:1-3; 73:27, 28.
Milanyo daphama dinakhumela wa Yehova, Mulungu wa imwerumweru. Munomuwandamela liye mwawadhananga na gulu laye. (Aheberi 10:24, 25) Mwavilimbi-edanga muwomeli-a Yehova, vinoukhami-ani fwanya igumi ya imbaribari—igumi yo-omala. Wandamela Mulungu chi yongo yaphama yeneyo munafwanelanyo ira. — Welengani 1 Timoteyu 1:11; 6:19.