MURU 8
Aburahamu na Sara Koovwela Mulungu
Vakwikwi na mzinda wa Babele vookala mzinda umo-iwa oromoliwa Uri. Athu amunzindola kalambela milungu donama ookala Yehova. Koma mookala muthu m’mo-iwa unoyo alambela Yehova eka, zina lae ali Aburahamu.
Dambo limo-i Yehova oomuwandela Aburahamu ira: ‘Tama munzindola teto udowe uilambo ineyo ndinauwandele miyo.’ Va Aburahamu afuneela iya nyumbae na abalae. Vanduli viwa Mulungu oomuwandela ira: ‘Ndinoza ndiupangi-e ira ukale tundu ulukulu. Moi zela mwa weyo ndinoza ndidalise athu etene a va ilambo yavati.’
Aburahamu kaaiziwa wewo Yehova afuna liye ira adowe, koma oomuroromela vinjinji Yehovoyo. Eno liye na iyanae Sara, koolongeza katundwiwa nowambeela ulendo olapa. Vaulendola kali limo-i teto na babae, zina lae Tera koma teto Loti unoyo ali mwana wang’onong’onwae.
Vathawi inela Aburahamu ali angan’na chaka 75. Liye na banja lae kangaendile wa thawi yolapa, koofiya muilambo ineyo Yehova aalonjezile liye. Ilambwiwa yali ya Kanani. Kangali wewo, Mulungu oonga na Aburahamu nomulonjeza ira: ‘Ilambo yetene inela ndinoza ndiipeleke wa a-imawo.’ Koma vathawi inela Aburahamu na Sara kali kangali okalamba teto katan’na a-ima. Kodi veva Yehova akwakwaneli-eda avi lonjezo laeli?
“Chifukwa ya iroromelo Aburahamu . . . oovwela nodowa umalo anayo aadedi-edela liye awachela ngati cholowa. Liye oodowa, ngakale ira kaaiziwa wewo adowa liye.” — Aheberi 11:8