Kookaana Mwana Kangakalambile

Aburahamu na Sara kali kangakalile m’banja wa chaka dinjinji. Aluwa koo-iya nyumba yapama wu Uri nokalanga m’matenti. Koma Sara kaadandaulile, chifukwa oororomela Yehova.

Sara oofunechecha kaana mwana moi oomuwandela Aburahamu ira: ‘Hagara, wachitwangola keda kaana mwana ndinamulandenga ngati waanga.’ Vangavirile thawi, Hagara okaana mwana wamulombwana. Zina lae Isimaeli.

Vanduli voi vivira chaka dinjinji, unyumba ya Aburahamu na Sara oofiya alendo aralu. Vathawi inela Aburahamu ali angan’na chaka 99 teto Sara ali angan’na chaka 89. Aburahamu ooitanela athwayo vati vatengo ira kavume moi oowaphiyela yodja. Kodi munoiziwa ira alendwayo kali mbaani? Anala kali angelo. Alendwayo koomuwandela Aburahamu ira: ‘Chaka yamechelo thawi ngati inela, weyo na iyanawo munoza mukaena mwana wamulombwana.’ Sara oovwa vyevi angali mu tenti moi oowambeela teya. Liye aganiza ira: ‘Koma vyoona mwemo ndikalambele miyomu, ndinokoza kaana mwana?’

Koma chaka yo-arela, vyevyo mgelo wa Yehovole aongile liye vyooireya. Sara oobala mwana wamulombwana. Moi Aburahamu oomuva-a zina loi Isaki, lelo linatapulela “Teya.”

Isaki angan’na chaka 5, Sara oomuona Isimaeli amuteyanga Isakiyo. Vofuna muteteza mwanaeyo, oomuwandela Aburahamu ira amutamangi-e Hagara na Isimaeli. Vowambeela Aburahamu kaafuna panga vyevi. Koma Yehova oomuwandela ira: ‘Vwela vyevyo Sara unaonga liye. Ndinoza ndimusamalele Isimaeli. Koma vyevyo ndaulonjezile miyo vile, vinoza vikwakwaneli-ediwe zela mwa Isaki.’