Aburahamu Ootonyi-eda Ira Ali Ororomeleya

Aburahamu oomufunji-a mwanae Isaki ira aomuomeliwengana Yehova koma teto roromela malonjezwae. Koma Isaki angan’na chaka dotamangela 25, Yehova oomuvepa Aburahamu ira apange vyongo vyorucha vinjinji. Kodi amuvepile ira apange n’ni?

Mulungu oomuwandela Aburahamu ira: ‘Mulande mwanawo m’mo-i eka unoyo udowe wamupeleke sembe umwango wa Moriya.’ Aburahamu kaaiziwa chifukwa iwa Mulungu amuvepile ira apange vyevi. Komave liye oovwela.

Mamawa adambo lo-arela, oomulanda Isaki koma teto achitwae ambin’li, nowambeela ulendo odowa umwango wa Moriya. Kangaendile wa malambo maralu koowambeela ona mwangoyo yavandendai, Aburahamu oowawandela achitwayale ira kamudedi-e, vevo liye na Isaki kadowaathu ira kapeleke sembe. Aburahamu oomuva-a Isaki kuni ira atukule teto liye ootukula mbene. Koma Isaki oomufuka Babaeyo ira: ‘Nanga khosa yoi mwapeleke sembeyo ili waani?’ Aburahamu oosomeda ira: ‘Mwananga Yehova unodowa aniva-e.’

Kangafiile vamwangovo, koomanga malo opelekela sembe. Eno Aburahamu oomumanga Isaki miwono na mendo nomugonati-a vaguwavo.

Vanduli viwa oolanda mbene ira amuphe. Koma thawi ineyo, oovwa mgelo wa Yehova akuwanga ira: Aburahamu, kumuphe muzombweyo. Sopano ndiiziwa ira unororomela Mulungu chifukwa wafuna umupeleke se- mbe mwanawo. Vingaireile eno, Aburahamu oona khosa ineyo yali vakwikwi navevo valiathu. Eno oolanda khoseyo noipeleka sembe.

Ambeela dambo lelo, Yehova oowambeela muromola Aburahamu ira fwae. Kodi munoiziwa chifukwa iwa? Chifukwa yoi Aburahamu oopanga iliyetene ineyo Yehova afuna liye ngakale vingali vyongo vyoi kaavivwechecha.

Yehova ooweli-eda nawili lonjezo lelo amuwandele liye Aburahamu ira: ‘Ndinoza ndiudalise koma teto ndinoza ndiinjivi-e a-imawo.’ Va Yehova atapulela ira unoza adalise athu etene apama zela m’banja la Aburahamu.