Vyevyo Yesu Apangile Liye Angali Mwana

Yosefe na Mariya kakala wu Nazareti. Kakala limo-i na Yesu koma teto a-imiwa amo-i aalombwana na aa-iyana. Yosefe a-inda chito yopala ira afwanyenga ndalama dokami-ana banja lae. Liye oofunji-a teto banja laelo vya Yehova koma teto Ilamulo yae. Thawi detene Yosefe na banja lae koodowa usunagoge ira kalambele Yehova. Koma teto chaka iliyetene banjali looyenda ulendo olapa odowa wu Yelusalemu ira kapangena ikondwelelo ya Pasika.

Yesu angan’na chaka 12, banja liwa loodowa teto wu Yelusalemu monga mwathawi detene. Wu Yelusalemuwo ookala athu anjinji anayo kazile za pangana ikondwelelo ya Pasika. Ikondweleloyo yangamalile Yosefe na Mariya koma teto athu amo-i koowambeela ulendo owelela waniwa. Aluwa kaganiza ira Yesu uli limo-i na aluwa. Koma vanduli viwa koozindikila ira Yesu kalivo. Koomusaelasaela vaari va abali etene koma katamufwanyile.

Yosefe na Mariya koowelela teto wu Yelusalemu moi koomusaelasaela wa malambo maralu koma katamufwanyile. Aluwa kookumbanya vinjinji na vyevi. Vanduli viwa koodowa musaela mu kachisi. Koomufwanya angali na aphuzisi angasene moi oovuruwana vyevyo aluwa kaongaathu koma teto oowafuka vyofuka. Aphuzisayo koopanga chidwi vinjinji na Yesu moi na aluwene teto koomufuka vyofuka. Koma koodabwa na mwemo asomedela liye. Koozindikila ira Yesu unoiziwa pama Ilamulo ya Yehova.

Yosefe na Mariya kangamuonile Yesu, Mariya oomufuka ira: ‘Niusaelasaela wathawi indendai. Wali waani?’ Koma Yesu oosomeda ira: ‘Kodi kamunaiziwa ira ndinafuneya fwanyeya m’mba mwa Babanga?’

Yesu oomaruwa limo-i na makolwae dowanga wu Nazareti. Yosefe oomufunji-a Yesu chito yopala. Kodi munaganiza ira Yesu angali mwana ali muthu oyi avi? Vevo aulukula liye zelu dae teto dooenjedeleya moi Mulungu na athu koomuomeliwana.