Yehova Oomuteteza Yesu

Ilambo imo-iwa yau mamawa wa Isaraeli, ookala athu anayo karoromela ira nyenyedi dinokoza akami-a iziwa vyongo. Dambo limo-i, athu amo-i okumela mu ilambo inela koona yongo yofwanafwana na nyenyedi iyendanga mudimu moi koowambeela i-arela. Aluwa kooi-arela mpakana dowa fiya wu Yelusalemu. Kangafiile koowambeela afuka athu ira: ‘Kodi mwana unoyo unaze akale mwene ya Ayuda uli waani? Niiza ira nimukokorele.’

Herode angavwile vyevi oowambeela kumbanya. Liye oowafuka asembe alukulu ira: ‘Vale mwene inela inaza ibaluwele waani?’ Asembayo koomusomeda ira: ‘Anamaongela kaongile ira inaza ibaluwela wu Betelehemu.’ Eno Herode oowawandela athu okumela wu mamawayo ira: ‘Dowani wu Betelehemu mwamusaele mwanoyo. Mwamufwanya muze mundiwandele. Namiyene teto ndinafuna ndamukokorele.’ Koma yolinga ya Herode kayali yoi amukokorele mwanoyo.

Yongo yofwanafwana na nyenyedile yoowambeela enda teto nawili moi athwale koopitiliza i-arela. Eno yooimela vadimu va nyumba imo-iwene. Kangavolowile m’mbamo koomufwanya Yesu angali na m’mae. Aluwa koomukokorela mwanoyo teto koopeleka phaso da golide, lumbani na mule. Koma-i kai Yehova unoyo aarumile athwala ira kamuone Yesu.

Ma-iyu anayo, Yehova oonga na Yosefe zela mu vyoro-a. Oomuwandela ira: ‘Herode unafuna amuphe Yesu. Mulande iyanawo na mwanoyo moi muthawele wu Iguputo. Mwakale wewo mpakana thawi ineyo ndinaze miyo ndiuwandeleni ira muwelewo.’ Thawi ineyo, Yosefe oomaruwa na banja lae nodowa wu Iguputo.

Eno Yehova oowawandela athu okumela wu mamawale ira kativirele wa Herode. Herode angazindikilile vyoi athwayo kavirele ndila imo-iwa, oolunduwa vinjinji. Voi vyali vyorucha ira amufwanye Yesu, oolamula ira a-ima etene aalombwana ausinkhu wa Yesu kaphiwe wu Betelehemu. Vevo vyevyi vyaireyaathu, Yesu ali angali wu Iguputo.

Vangavirile thawi, Herode ookhwa. Eno Yehova oomuwandela Yosefe ira: ‘Sopano unokoza welawo.’ Yosefe, Mariya na Yesu koowelela wu Isaraeli moi kafiyedile wu Nazareti.