Yesu Oogumana na Muzimai Vaisime

Pasika angamalile, Yesu na ofunjedae koouwambeela ulendo owelela wu Galileya moi kavirele wu Samariya. Kangafiile mumzinda wa Sukari, Yesu ooimela vaisime ya Yakobo. Ofunjedae koomu-iya vevo avumanga, moi aluwa koodowa ira kagule yodja mumzindamo.

Vanduli viwa voofiya muzimai m’mo-iwa zarunga ma-inje. Yesu oomuwandela muzimaiyo ira: “M’mani ndinavepa ma-inje ong’wa.” Muzimaiyo oonga ira: ‘Bwanji munandivepa ma-inje ong’wa? Miyo ndili Msamariya. Vale Ayuda na Asamariya katinaongi-ana.’ Koma Yesu oomuwandela ira: ‘Mwaaiziwe ira ndili mbaani, moondivepa ira ndiuva-eni ma-inje amoyo.’ Muzimaiyo oomufuka Yesu ira: ‘Munatapulela n’ni? Nyo kamun’na yorungela ma-inje nanga ma-injayo munaalanda waani?’ Yesu oosomeda ira: ‘Uliwetene ong’wa ma-inje anayo ndinamuva-e miyo kanaza akaana teto thona ngakale vang’ono.’ Vanduli viwa muzimaiyo oonga ira: “Babani, ndiva-eni ma-inje anayo.”

Vanduli viwa Yesu oomuwandela muzimaiyo ira: ‘Dowani mwamuitane mamuninyu.’ Koma muzimaiyo oonga ira: “Kandin’na mulombwana.” Yesu oonga ira: ‘Munaonga vyoona. Moi muuteliwavo na alombwana 5, moi mulombwana unoyo munakalana nyo vathawi ila kai weenyu.’ Muzimaiyo angavwile vyevi oonga ira: ‘Ndizindikila ira muli namaongela. Iyo ninororomelecha ira ninafuneya lambela Mulungu va mwango unola, koma nyo Ayuda munaongecha ira ninafuneya lambela wu Yelusalemu. Koma ndinororomela ira Mesiya aza unoza anifunji-e ira nilambelenga moi avi.’ Vanduli viwa Yesu oomuwandela muzimaila vyevyo ali liye aanawandelevo muthu uliwetene. Oomuwandela ira: ‘Miyo ndili Mesiya.’

Muzimaiyo ootamanga dowa awandela Asamariya ira: ‘Ndigumana na Mesiya. Unoiziwa vyetene vyokuza miyo. Tiyemoni mwamuone.’ Athwayo koodowa limo-i na muzimaiyo moi Yesu oowafunji-a vyongo vinjinji.

Asamariyayo koomuvepa Yesu ira akaleve mumzindamo. Eno ookalave mumzindamo limo-i na aluwa wa malambo men’li nowafunji-anga moi athu anjinji koomuroromela. Aluwa koomuwandela muzimaile ira: ‘Vyevyo nivwile iyo wa muthula viinikami-a iziwa ira liye ngu mpulumusi wa ilambo.’