Yesu Oolaleela Uthenga wa Umwene

Yesu angakede batiziwa wene, oowambeela laleela ira: ‘Umwene wa Mulungu uwandamela.’ Liye oolaleela mu Galileya na mu Yudeya mwetene teto ofunjedae koodowa limo-i na liye. Yesu angawelele waniwa wu Nazareti, oodowa usunagoge nowambeela welenga mogweli-a mawu mpukutu wa Yesaya. Liye oonga ira: ‘Yehova undiva-a zimu owela ira ndilaleele uthenga wapama.’ Athu awu Nazareti koofuna muona Yesu apanganga vyodabwi-a. Koma vyevyo awelengile liyevi vinatonyi-eda ira, chifukwa ilukulu ineyo Mulungu amuva-ile liye zimu owela, yali yoi alaleelenga uthenga wapama. Vanduli viwa Yesu oowawandela athwayo ira: ‘Peeno ulosila ukwakwaneli-ediwa.’

Yesu angakumile wewo oodowa unyanja ya Galileya wewo oowafwanya ofunjedae 4 katotanga somba. Liye oowawandela ira: ‘Ndi-areleni, ndinoutanduchani ira mutotenga athu.’ Ofunjedala kali Petulo, Andireya, Yakobo na Yohani. Thawi ineyo aluwa koo-iya chito ineyo ka-indaathu yotota somba nowambeela mu-arela. Kooenda limo-i na liye wu Galileya wetene nolaleelanga vya Umwene wa Mulungu. Koolaleela m’masunagoge, m’misika koma teto m’misewu. Uliwetene wewo kadowaathu athu anjinji koowa-arela. Khani yokuza Yesu yoovweya vinjinji mpakana dowa fiya wu Siriya.

Yesu oowava-a o-arelae amo-i kopolo doi kaili-enga koma teto kumi-a viwanda. Liye oolaleela m’mizinda koma teto m’mavande limo-i na ofunjedae amo-i. Azimai angasene ororomeleya koomukami-a Yesu na o-arelae. Amo-i mwa azimai anala kali Mariya Magadala, Jowana koma teto Suzana.

Vanduli viwa Yesu oowafunji-a o-arelayala nowatumiza ira kalaleele. Aluwa koolaleela wu Galileya wetene. Athu oinjiva kookala ofunjeda a Yesu teto koobatiziwa. Anjinji koofuna funjeda moi Yesu oowaerekezela na m’munda moi munafuneya anda. Oonga ira: ‘Vepani Yehova ira atumize achito o-anda.’ Vanduli viwa oosakula ofunjeda 70 nowatumiza ambin’li ambin’li ira kalaleele wu Yudeya wetene. Aluwa koofunji-a athu etene vya Umwene. Ofunjedala kangazilewo koomufotokozela Yesu vyongo vyosangalasa vyevyo vyaireile. Mdyerekezi kasokonezele chito yolaleelela.

Yesu oowakami-a ofunjedayayo ira kaze kapitilize inda chito yofuneya inela liye aza adowa udimu. Oowawandela teto ira: ‘Mulaleelenga va ilambo yetene koma teto mufunji-enga athu Mawu a Mulungu teto muwabatizenga.’