Ulaliki wa Vamwango

Yesu angasakulile anamarumiwae 12, ootita m’mwango dowa vamalo anayo vasonkanile athu anjinji. Athwayo kali okumela wu Galileya, Yudeya, Turo, Sidoni, Siriya koma teto ukombela wa inje wa Yorodano. Koomuzelana athu obulela marenda o-iyana-iyana koma teto anayo kavuti-iwa na viwanda. Yesu oowaili-a etene anayo. Vanduli viwa oogarati vati nowambeela onga. Oofotokoza vyevyo muthu unapange liye akala unafuna ira Mulungu akale fwae. Yesu oonga teto ira ninafuneya teto zindikila ira ninafuneya sogoleliwa na Yehova teto ninafuneya funjeda vya liye ira nimuomeliwengana. Koma oonga ira kaninamuomeliwena Mulungu akala kaninaomeliwana afwi-u. Koma teto ninafuneya irela vyapama uliwetene, ngakale adani-u.

Yesu oonga ira: ‘Keda aomeliwana afwinyu kai okwakwanela. Munafuneya aomeliwana teto adaninyu, koma teto mukululukenga kumela vati va murima. Akala m’mo-iwa uuchimweleni, mudowe mwakambilane na liye nopepesana. Mupangelenga athu vyevyo munafune nyo ira naaluwene teto kaupangeleni.’

Yesu oopeleka teto malangizo apama okuza chuma. Liye aongile ira: ‘Kala vausamwali na Mulungu kofuneya vinjinji kwaranya kaana ndalama dinjinji. Muthu unokoza ubelani ndalama koma kanaubeleni kala vausamwali na Yehova. Iyani kumbanya ira: “Mechelo ninadja n’ni, ninang’wa n’ni, kapena ninawara n’ni?” Ganizelani vya mbalame. Mulungu unoonechecha ira dikaana yodja. Kumbanya kunaupangi-eni ira mukale na moyo olapa. Kamudiwale ira Yehova unoiziwa vyevyo munafuneela nyo.’

Athwayo kali kaanavwevo muthu afunji-anga ngati mwemo Yesu mwafunji-ela liye. Asogoleli a vipembezo kali kaanafunji-evo vyevi. Chifukwa n’ni Yesu akwakwani-a funji-a pama eni? Chifukwa yoi vyetene vyevyo afunji-a liye vyakumela wa Yehova.