Septembala

Mulungu umuva-a Yesu kopolo domali-a mavuto etene a athu. Voira vyodabwi-a, Yesu ootonyi-eda ira ukaana kopolo domali-ela mavuto etene anayo vaeki-u kaninawande amali-a. Mofwanafwani-a, liye ukaana kopolo donivulumucha wu vyevyo vyaambeeli-ile mavuto a athu, vyevyo vili uchimo onoyo nalandele iyo koma teto vyo-arelavo viwa monga marenda nokhwa. (Mat. 9:1-6; Arom. 5:12, 18, 19) Vyodabwi-a vyevyo airile liye, vinotonyi-eda ira liye unowanda mali-a “marenda a tundu uliwetene” koma teto venyi-a okhwa. (Mat. 4:23; Yoh. 11:43, 44) Ukaana teto kopolo dowanda mali-a lipevo lakopolo koma teto gonji-a mizimu dotakala. (Maliko 4:37-39; Luka 8:2) Pivyolimbikisa iziwa ira Yehova umuva-a Mwanaye kopolo doirela vyevi. Kaninakaikela ira malonjezo anayo ninadedi-edela iyo mu Umwene wa Mulungu kanoza kakwakwaneli-ediwe. Vyodabwi-a vyevyo Yesu airile liye angali muthu vailambwela, vinonifunji-a ira monga Mwene wa Umwene wa Mulungu, unoza aire vinjinji usogolo w23.04 3 ¶5-7

Ngati muli mupingo ulukulu moi thawi dinjinji mwavenyi-a muwono katinautonyani, mwina munokoza ganiza ira bola keda iya someda kedanga vuruwana misonkanodo. Koma kamunafuneela iya yesayesa ira musomede vamisonkano. Munokoza ira pama kozeelanga ndemanga dingasidene vasonkano uliwetene. Eno akala kamutonyiwe ira musomede umaambeelelo wa phunzilo, munokoza kaanave mwayi wosomeda muwari mwamisonkanodo. Mwakozeelanga Phunzilo la Sanja ya Olonda, muganizelenga mwemo ndima iliyetene inagwilizanelaathu na muru wa khaniyo. Mwairanga vyevi munokoza kaana makundo amo-i oyi musomede vaphunzilo letenelelo. Mukozeelenga ira mwasomede va ndima dedo dinasambaula makundo odii-a aimbarimbari, oyi mborucha asambaula. Chifukwa n’ni? Chifukwa mwina vanokoza kala athu oyeva oimecha muwono ira kasomede vambali ineyo. Koma bwanji vanduli vo-arela malangizo anala vamisonkano dingasidene muona ira kamunava-iwa mwayi wosomeda? Misonkano da-anaambeele mumuwandelenga unoyo unairi-e phunzilolo yofuka ineyo munafuna nyo someda. w23.04 21-22 ¶9-10

Yosefe ookala okozeya arela malangizo a Yehova moi vyevi vyoopangi-a ira akale mulombwana wapama. Maulendo maralu, oowachela malangizo okumela wa Mulungu okuza banja lae. Vathawi detene dedi oovwela na murima wetene, ngakale vevo vyaliathu vyorucha arela malangizo anayo. (Mat. 1:20; 2:13-15, 19-21) Chifukwa yo-arela malangizo a Mulungu, Yosefe oomuteteza, mukami-a koma teto musamalela Mariya. Kaganizelani mwemo vyoira vya Yosefe vyamukami-ileathu Mariya ira amuomeliwengana koma teto amulemekezenga vinjinji. Alombwana, munokoza musazi-eda Yosefe vo-arela malangizo a m’Baibulo okuza mwemo munasamalele nyo banja linyu. Mwa-arelanga malangizo anala, ngakale ira munafuneela chenja vyongo vimo-i, munotonyi-eda ira munomuomeliwana iyaninyu koma teto munolimbi-a banja linyu. Murongola m’mo-iwa wa wu Vanuatu, unoyo ukan’le m’banja wa chaka dokwaranya 20, eere: “Mamunanga afufuzanga koma teto arela malangizo a Yehova, ndinomulemekeza vinjinji. Ndinovivwa kala otetezeya koma teto kandinakaikela vyevyo usakun’le liye.” w23.05 21 ¶5

Vaari va Ayuda owelela waniwa kavafwanyeya “muthu otakala” unoyo kaafuna iya chiwelewele, lambela mafano kapena machimo amo-i alukulualukulu. Ayudayo kakala “athu owela” wa Mulungwiwa. (Doto. 7:6) Komave vyevi kavyatapulela ira Ayuda katafuneela chenja vyongo vimo-i ira kamusangalasenga Yehova. Anjinji mwa Ayudala kabaluwile wu Babulo teto anjinji koo-arela iganizelo na makundo a athu a wewo. Vangavirile chaka dinjinji kumela vevo Ayuda owambeela kaweleleathu wu Izarayeli, Bwanankubwa Nehemiya oodabwa angafwanyile ira a-ima amo-i anayo kabaluwile wu Izarayeli, kataiziwa iwongelo ya Ayuda. (Doto. 6:6, 7; Nehe. 13:23, 24) Kodi a-ima anala kafunjeda avi muwomeluwana koma teto mulambela Yehova akala kataiziwa Chiheberi, iwongelo ineyo ya-indi-ediwe chito volemba Mawu a Mulungu? (Eza. 10:3, 44) Vookala vyongo vinjinji vyevyo Ayuda kafuneelaathu chenja. Koma vyakala vyo-orucha chenja voi kakala wu Izarayeli wewo lambela oona waweli-ediwa vang’onovang’ono.— Nehe. 8:8, 9. w23.05 15 ¶6-7

Komave ngakhale ningaesaesile kala oviyevi-a kapena kaana murima ofunechecha, ninokoza gumanave na vyolepeli-a. Mofwanafwani-a, “vyongo vyo-oyembekezeleya” vinokoza niwonongela thawi ineyo nafuneela iyo kwakwaneli-eda yolinga yi-u. (Nam. 9:11) Ninokoza gumana na vuto lelo linapangi-e ira nifooke koma teto kanikaena kopolo. (Miya. 24:10) Voi nili ochimwa, thawi dimo-i ninokoza panga vyongo vyoi kavinanikami-e kwakwaneli-eda yolinga yi-u. (Arom. 7:23) Kapena mwina ninokoza vivwa ira nigoma. (Mat. 26:43) Ndiye chin’ni inanikami-e nagumana na vyolepeli-a? Niumbuwelenga ira nagumana na vyolepeli-a kavinatapulela ira nili olepela. Baibulo linoonga ira ninokoza gumana na mavuto moweli-edaweli-eda. Komave linosambaula movweya pama ira ninokoza kwakwaneli-eda yolinga yi-u. Mwaesaesappppnga ira mukwakwaneli-ede yolinga inyu ngakhale vangali vyolepeli-a, munomutonyi-eda Yehova ira munofuna musangalasa. Liye unosangalala aona ira munopitiliza esaesa kwakwaneli-eda yolinga inyu. w23.05 30 ¶14-15

Upainiya unotandiza wachinyamata ira awandenga inda pama chito na athu o-iyana-iyana. Unotandiza teto muthu ira apangenga bajeti yapama noi-arelanga. (Afil. 4:11-13) Upainiya otandiza pivowambeelela vapama ira muthu akale mpainiya ogarateya koma teto ira apange utumiki wathawi detene. Upainiya unomuva-a muthu mwai opanga mautumiki monga indana chito domangamanga koma teto tumikela va Beteli. Alombwana Achikiristu kanafuneya kaana yolinga yoi kafwanelele tumikela abali na arongoliwa mupingo ngati andimuwa. Baibulo linaonga ira alombwana anayo kanaesaesa ira kakaena udindo unola “kanofuna chito yapama.” (1 Tim. 3:1) Yowambeela, m’ bali unafuneya aambeele kala mtumiki otandiza. Atumiki otandiza kanowatandiza andimuwa mundila dinjinji. Andimuwa na atumiki otandiza kanotumikela abali na arongoliwa moviyevi-a koma teto kano-indana chito yolaleela mwatindi. w23.12 28 ¶14-16

Mwene Yosiya aambeelile musaelasaela Yehova angali muzombwe. Oofuna funjeda vya Yehova nopanganga yofuna yae. Komave vyongo kavyali vyokweya wa mwene waizombwe unola. Liye afuneela sakula kala umbali yolambela oona vathawi ineyo athu anjinji kalambelaathu milungu donama. Moi liye oopanga vyevyo. A-anakwakwani-e chaka 20, Yosiya oowambeela mali-a lambela onama. (2 Lim. 34:1, 2) Ngakale ira muli n’ng’onong’ono munokoza sakula ira mumusazi-edenga Yosiya vomusaelasaela Yehova koma teto funjeda makalelwae. Panga vyevi unoza uulimbikiseni ira muvipeleke wa liye. Kodi vipeleka wewu unaza ukuza avi moywinyu? Luke unoyo abadiziwe angan’na chaka 14 aongile ira, “Ambeela vano, ndinerenga ela tumikela Yehova vamalo owambeela moi ndinerenga esaesa ira ndimusangalasenga.” (Maliko 12:30) Akala nanyen’ne munapange vyevi Yehova unoza audaliseni. w23.09 11 ¶12-13

Vevo mtumwi Paulo alemba liye kalatela, vali va-anamale chaka kumela vevo pingo wau Tesalonika wagarati-iweathu. Abali anayo kasogolela, mwina kali ka-anaiziwe vinjinji koma teto mwina koolakwi-a vyongo vimo-i. Komave, aliwa kafuneela lemekeziwa. Kwaranya wale letene, vevo chisauso ilukulu inazeathu iambeele, ninaza nifuneela roromela vinjinji malangizo anayo andimuwa m’mipingo di-u kanazeathu kaniva-e. Mwina vathawiyo kaninaza niwanda wachela malangizo kumela wu likulu kapena wu ofesi ya thambi, eno pivyofuneya funjeda omeliwana koma teto lemekeza andimuwa vathawiila. Kaya vyongo vinaza vikala avi, tiyemoni nipitilize kala oganiza pama, kanikedenga ganizela vyevyo aliwa kanalakwi-aathu koma niganizelenga likundo loi Yehova zela mwa Kiristu, unosogolela alombwana ororomeleya anala. Monga mwemo chisoti inatetezelaathu muru wa msilikali, idedi-edo yi-u yachipulumuso inoteteza maganizwi-u. Ninoiziwa ira vyevyo ilambwela inapelekaathu, pivyo-okaana chito. (Afil. 3:8) Idedi-edo yi-u inonikami-a kala odeka koma teto ootekenyeya. w23.06 11-12 ¶11-12

Akala nishishiwe ira nipange chiwelewele kapena nionele vyolava, kaya va TV kapena va intaneti, kodi ninaza nisakula panga n’ni? Vikala vifukwa yovweya vyonipangi-a pewa vyachiwelewele. “Mu-iyana opuusa” unafotokoziwa ngati unaonga ira: “Ma-inje oba kanodjoodja.” (Miya. 9:17) Kodi “ma-inje oba” kanaromoliwala chin’ni? Baibulo linofwanafwani-eda gonana vaari va athu otelana na ma-inje osisimula. (Miya. 5:15-18) Mulombwana na mu-iyana otelana mwalamulo mbanayo kanaloliwa ira kagonanenga. Ndiye kodi vyevi vina-iyana avi na “ma-inje oba.” Ma-injala pivyachiwelewele vyoi kai vyololeya. Thawi dinjinji vyevi vinaireya mwachisisi, ngati mwemo vinakalelaathu na oba. “Ma-inje oba” kanokoza oneyanga ngati odjoodja simbwasimbwa akala athu opanga vyachiwelewelayo kanaona ira katinagumana na vuto lililetene chifukwa ya vyotakala vyevyo kanairaathu. Weu kuvinami-a chifukwa Yehova unoona vyetene. Kavali yongo yovoreya vinjinji kwaranya iya omeliwana Yehova. Eno kilivo iliyetene “yodjoodja” kapena ira yosangalasa notatila mwai wantengo wavadimula. — 1 Akor. 6:9, 10. w23.06 22 ¶7-9

Kodi munapange avi ngati muwambeele ona ira mapempelwinyu kai okumela m’murimani kapena teto kamunasangalala na chito yolaleela ngati wale? Kamuganizenga ira Yehova u-iya utandizani na zimwae. Monga muthu unoyo kai wangwilo, thawi na thawi munokoza chenjanga mwemo munavwela nyo. Ngati muwambeelile ona ira kamunapanga vyongo vyokuza lambela mwatindi muganizelenga isazo ya mtumwi Paulo. Ngakale ira ooesaesa musazi-eda Yesu, ooiziwa ira kai thawi detene vevo unapange liye vyongo vyevyo unalakalaka liye. Paulo ali osimikiza kwakwaneli-eda utumikae mo-olandela mwemo unavwela liye. Mofwanafwana na vyevi, nanyen’ne kamulolenga ira musakulenga vyoira volandela mwemo munavwela nyo. Musimikizenga panga vyofwanelela ngakale ira kai vyevyo munafune nyo ira mupange. Mwapanganga vyofwanelela thawi detene munokoza ambeela chenja mwemo munavwela nyo. — 1 Akor. 9:16. w24.03 11-12 ¶12-13

Ninokoza tonyi-eda chikondi wa abali na arongoli-u vowawachela ira kakale mugulu la afwi-u. (2 Akor. 6:11-13) Anjinji a iyo nili m’mipingo dedo muli abali na arongola anayo kali o-iyana va vyongo vinjinji koma teto makalelo. Ganizela makalelwiwa apama unokoza nikami-a ira niawomeliwengana vinjinji. Naonanga athu amo-i monga mwemo Yehova munaaonela liye ninotonyi-eda ira ninowakonda. Chikondi inoza ikale yofuneya vinjinji va chisauso ilukulu. Kodi ninaza nifwanya waani chitetezo chisauswela yaza iambeela? Kaganizelani malangizo anayo Yehova apelekile liye wa athwae vevo a Babulo kaaukelaathu. Liye awongile ira: “Nyo athwanga, dowani mwavolowe m’masubinyu amuwari teto mwa-eye visewo. Mwavitaale wa thawi yoyeva fiyeda lunduwa wanga ungaman’le.” (Yes. 26:20) Vinaoneya ira malangizo anala kano-inda teto chito wa iyo anayo ninaembekezela chisauso ilukulu. w23.07 6-7 ¶14-16

Muiziweyenga na limbili loi muli ololela.” Muvifukenga ira: ‘Kodi athu kanondiona ira ndili ololela kapena kanondiona ira ndili okwimi-a vyongo, orucha kapena ovwa vyae vyoka? Kodi ndinokanyi-eda amo-iwa ira kaendelenga maganizwanga? Kodi ndinovuruwana maganizo a amo-iwa koma teto panga vyevyo kanafunaathu akala vili vyofuneya panga eno?’ Vyevyo ninapanga iyo vakhani yololela vinokoza tonyi-eda akala ninamusazi-eda vinjinji Yehova na Yesu kapena naari. Lolela unotangani-avo kala okozeya chenja vyongo vyachenja vamoywi-u. Thawi dimo-i chenja unokoza pangi-a ira nigumane na mavuto o-oembekezeleya. Morurumucha, ninokoza gumana na mavuto okuza thanzi li-u. Mwina teto chenja vakhani dachuma kapena dandale unokoza sokoneza vinjinji moywi-u. (Nam. 9:11) Iroromelo yi-u inokoza shishiwa teto vevo utumiki-u uchenjileathu. Ninokoza lemeela chenja wewo uireile akala ninapanga vyongo 4 vyo-arelavi: (1) somedela mwemo vyongo vililiathu, (2) ganizela vyausogolo, (3) ganizela vyapama vyevyo vinaireya koma teto (4) kami-a amo-iwa. w23.07 21-22 ¶7-8

Namaongela Danieli ali muzombwe vevo a Babulo kamu-indileathu monga kapolo nomudowana uilambo yaundendai na waniwa. Koma monga mwemo ninaiziwela iyo, liye oopangi-a chidwi athwayo. Aliwa koowona “vyooneya na maso,” monga vyoi Danieli “kaan’na chilema iliyetene” koma teto akumela m’banja lolemekezeya. (1 Sam. 16:7) Va vifukwa vyevi, a Babulo koomufunji-a ira adowe atumikelenga unyumba yaimwene. (Dan. 1:3, 4, 6.) Yehova oomuwomeliwana Danieli chifukwa ya vyevyo muzombwela asakulile liye ira apangenga vamoywae. Teto mwina an’na chaka dotamangela 20 doka, vevo Yehova voonga vya athu olungama, amuromolile liye vamo-i na Nowa na Yobu, alombwana anayo katumikele Mulungu mororomeleya wa chaka dinjinji. (Gen. 5:32; 6:9, 10; Yobu 42:16, 17; Ezek. 14:14) Danieli ookaana moyo wa thawi indendai moi Yehova oopitiliza muwomeliwana wa moywae wetene muthu ororomeleyola. — Dan. 10:11, 19. w23.08 2 ¶1-2

Mwangasakulile ira munafuna mugule nyumba, mookaikela, munokoza funa ira mudowe mwaone mbali detene da nyumbeyo, irungunuwa, volowa m’masubi mwiwa koma teto ona iliyetene yokuza nyumbeyo. Ninokoza panga vyofwanafwana na vyevi vevo ninawelenga iyo koma teto funjeda Baibulo. Akala munaliwelenge mombaraanya, munokoza keda iziwa “makudo owambeela a m’mawu opatuleya a Mulungu.” (Aheb. 5:12) Koma mofwanafwana na vyevyo munapange nyo na nyumbele, munafuneya volowa muwari kapena ira lifunjeda mosamala ira mulivwecheche. Ndila yapama vinjinji yofunjedela Baibulo kuona mwemo mbali do-iyana-iyana da uthengiwa dililiathu dogwilizana. Muesaesenga ira muvwecheche, o-okala makundo a choonadi anayo munaaroromela nyo oka koma chifukwa iwa teto munaaroromela. Ira nivwechechenga pama Mawu a Mulungu, ninafuneya funjedanga mosamala makundo odii-a a choonadi. Mtumwi Paulo oolimbikisa abali na arongolae ira kafunjedenga Mawu a Mulungu mwatindi nayolinga yoi ‘kaiziwe pama mulifupi na mulitali nogwela nodii-a’ wa choonadi. Aliwa kaapange vyevi, ‘kakala olimba nokala ogarateya’ muiroromelo iwa. (Aife. 3:14-19) Na-iyene ninafuneya panga chimozimozi. w23.10 18 ¶1-3

M’Baibulo mukala visazo vya athu anjinji anayo kali oleza murima. Bwanji mupange vyoi mufufuze visazovi vevo munafunjeda nyo Baibulo vaekinyu? Mwaisazo, ngakale ira Davide azoziwe angali mwana ira aze akale mwene wa Izarayeli, afuneela embekezela wa chaka dinjinji a-anava-iwe umwenoyo. Simiyoni na Ana kootumikela Yehova mororomeleya vevo kaembekezelaathu za wa Mesiya. (Luka 2:25, 36-38) Mwafunjedanga khanidi mufufuzenga vyosomeda vya vyofuka vi: Kodi mwina chin’ni yamukami-ile muthula ira akale oleza murima? Kodi kala oleza murima wamukami-ile avi? Kodi ndinamusazi-ede avi? Munokoza pindula teto ngati munafunjede vya athu anayo katatonyi-ede leza murima. (1 Sam. 13:8-14) Munokoza vifuka ira: ‘Kodi mwina chin’ni yamupangi-ile ira kakale oleza murima? Nanga vyo-arelavo viwa vyali vyoi avi?’ w23.08 25 ¶15

Mtumwi Petulo ali ororomeleya moi kaalolile ira iliyetene imulepeli-e mu-arela Yesu. Liye ootonyi-eda roromeleya wae vathawi imo-iwa vevo Yesu aongile liye vyongo vyoi ofunjedae katavivwechechile. (Yoh. 6:68) Athu anjinji koo-iya mu-arela Yesu m’malo moembekezela ira aafotokozele vyevyo atapulela liye. Koma Petulo ooiziwa ira Yesu eka, ngunoyo un’na “mawu amoyo wo-omala.” Yesu ooiziwa ira Petulo na anamarumiwae amo-iwa kanomu-iya eka. Komave kaakaikela ira Petulo unoza awele nokalave ororomeleya. (Luka 22:31, 32) Yesu ooiziwa ira “zimu ngofunechecha, koma thuthu ti lofooka.” (Maliko 14:38) Eno ngakale ira Petulo oomukoonda ira kanamuiziwa, liye kaa-iile muomeliwana namarumiwa unola. Angavenyi-iwe, Yesu oogumana na Petulo moi vinaoneya ira Petuloyo ali eka. (Maliko 16:7; Luka 24:34; 1 Akor. 15:5) Vyevi mwina vyoomulimbikisa namarumiwola, unoyo avivwela chisoni vinjinji. w23.09 22 ¶9-10

Mulungu unokululukela kapena pimba machimo a athu anayo kanamuroromela. Liye unowakululukela moi kanawelengela machimwiwa. (Sal. 32:1, 2) Unowaona ira mbo-okaana chimo koma teto mbolungama chifukwa ya iroromelo iwa. Ngakale ira Aburahamu, Davide na atumiki amo-iwa ororomeleya kaoniwa ira mbolungama, aliwa kali kangali ochimwa. Koma chifukwa ya iroromelo iwa, Mulungu oowaona ira mbo-okaana chimo voerekezela na athu anayo katamutumikela. (Aife. 2:12) Monga mwemo Paulo afotokozele liye pama mukalatae, iroromelo chofuneya vinjinji ira muthu akale vausamwali na Mulungu. Pumwemo teto vyaliliathu na Aburahamu na Davide. Iyo teto iroromelo inokoza nikami-a ira nikale vausamwali na Mulungu. w23.12 3 ¶6-7

Malambwano Akiristu etene kookaana mwai wopeleka sembe wa Yehova vo-indi-eda chito thawiwa, kopolo koma teto vyongo viwa vomutumikela. Ninokoza tonyi-eda ira ninoyamikela mwai-u wolambela Yehova voesaesa panga vyetene vyevyo ninawande iyo vomutumikela. Mtumwi Paulo ooromola vyongo vyo-iyana-iyana vyokuza lambela wi-u vyoi kaninafuneya vinyalanyaza. (Aheb. 10:22-25) Vyongo viwa vinotangani-avo pempela wa Yehova, lengeza vowela chiyembekezo yi-u, sonkana vamo-i monga pingo koma teto limbikisana, ‘simbwasimbwa vevo ninaona [iyo] ira dambo la [Yehova] linoandamela.’ Umapeto wa buku la Chivumbuluso, ngelo wa Yehova oowonga maulendo ambin’li vofuna sindikiza, ira: “Lambelani Mulungu.” (Chiv. 19:10; 22:9) Tiyemoni niumbuwelenga thawi detene makundo odii-a a choonadi okuza kachisi mulukulu wauzimu anayo nifunjedile iyo, ndipo niyamikelenga mwai wolambela Mulungwi-u mulukulu, Yehova. w23.10 29 ¶17-18

Etene iyene ninafuneya ‘pitiliza kondana.’ Koma ninafuneya umbuwela ira Yehova oonichenjeza ira “chikondi ya athu anjinji inoza izilale.” (Mat. 24:12) Koma Yesu kaatanthauza ira chikondi ya ofunjedae anjinji inoza iyeve. Ngakale vili eno, ninafuneya kala osamala ira kanilandele murima o-okaana chikondi unoyo uli ofala muilambwela. Voganizela likundo leli, tiyemoni nikambilane fuso limo-iliwa lofuneya. Kodi vikala ndila yoiziwela ngati ninaakonda vinjinji abali-u? Ndila imo-i yoiziwela ngati ninaakonda vinjinji abali-u kuona vyevyo ninapanga iyo va moywi-u. (2 Akor. 8:8) Mtumwi Paulo ooromola imo-i mwa vyongo vyevyo ninapange iyo vevo aongile liye ira: “Kwaranya vyetene, mukondanenga vinjinji chifukwa chikondi inovu-elela machimo oinjiva.” (1 Pe. 4:8) Eno vyevyo ninapangecha iyo abali-u kalakwi-a vyongo vinokoza tonyi-eda ngati ninaakonda vinjinji kapena iyayi. w23.11 10-11 ¶12-13

Kaninavwele lamulo la Yesu loi niomeliwanenga akala ninaaomeliwana athu amo-iwa mupingo nolepelanga aomeliwana athu amo-iwa. Pivyoona ira ninokoza gwilizananga vinjinji na amo-iwa kwaranya amo-iwa, ngati mwemo Yesu apangela liye.” (Yoh. 13:23; 20:2) Koma mtumwi Petulo unoniumbucha ira ninafuneela esaesa ira ‘niaomeliwengana abali’ etene ngati athu a m’banja li-u. (1 Pe. 2:17) Petulo oonilimbikisa ira ‘niomeliwanenga vinjinji kumela m’murimani.’ (1 Pe. 1:22) Veva mawu oyi ‘omeliwana vinjinji’ kanatapulela muomeliwana muthu m’mo-iwa ngakale vevo viliathu vyorucha panga eno. Mwaisazo, bwanji akala m’bali unikumudwi-ile mundila imo-iwene? Mwachibadwa ninofuna muweli-eda m’malo momutonyi-eda chikondi. Koma-i Petulo oofunjeda wa Yesu ira weli-eda kunamusangalasa Mulungu. (Yoh. 18:10, 11) Liye alembile ira: “Kamuweli-ede yotakala va yotakala kapena ibewe va ibewe, koma m’malomwiwa mudalisenga.” (1 Pe. 3:9) Mulolenga ira aomeliwana vinjinji athu amo-iwa, uulimbikisengani ira muwaomelenga murima. w23.09 28-29 ¶9-11

Ninodabwa naona mwemo mwana unaulukulela liye mombaaranya vinjinji mpakana fiya vokala ndimuwa. Vinaoneya ira ulukula wewu unakedecha ireya vaekiwa. Koma ulukula mwauzimu kunakedecha ireya vaekiwa. (1 Akor. 13:11; Aheb. 6:1) Ira muthu aulukule mwauzimu unafuneya kala vausamwali olimba na Yehova. Ninafuneya teto zimu wa Yehova ira unikami-e kala na makalelo apama, kaana luso lopangela vyongo pama koma teto kozeela maudindwi-u ausogolo. (Miya. 1:5) Volenga athu Yehova owalenga mulombwana na mu-iyana. (Gen. 1:27) Mulombwana na mu-iyana kanooneya mo-iyana koma teto kanakalecha o-iyana muvyongo vimo-iviwa. Mwaisazo, Yehova olenga alombwana na a-iyana ira kakwakwaneli-edenga maudindo o-iyana. Eno aliwa kanafuneya kaana makalelo koma teto maluso anayo kanakami-e kwakwaneli-eda pama maudindwiwa. — Gen. 2:18. w23.12 18 ¶1-2

Kodi Yesu unofunecha ira athu amo-iwa ka-indi-edenga teto chito zina lenileni la Ababae? Inde. Asogoleli amo-iwa achipembezo va thawi ineyo, karoromela ira zina la Mulungu ti lopatuleya ndipo kai ulemu liromolanga. Koma Yesu kaalolile ira miyambo dosempana na Malemba dedi dimulepheli-e lemekeza zina la Ababae. Kaganizelani vyevyo vyaireile angamuchili-ile muthu m’mo-iwa o-indiwa na viwanda, mudela la Agerasa. Athu awewo kookaana mantha ndipo koomuvepa Yesu ira avenyewo udela lelo, ndipo Yesu oovenyawo. (Maliko 5:16, 17) Komave Yesu afuna ira athu awewo kaiziwe zina la Yehova. Eno oomulamula muthu unoyo amuchili-ile liyeyo ira aawandelenga athu, o-okala vyevyo Yesu amuirele liye, koma vyevyo Yehova amuirele liye. (Maliko 5:19) Malambwano teto liye unofuna ira niawandelenga athu vailambo yetene zina la Ababae. (Mat. 24:14; 28:20) Napanganga vyevi, ninomusangalasa Yesu, unoyo uli Mweni-u. w24.02 10 ¶10

Ngumwai ulukulu kala mugulu la Yehova m’malambo omari-a ovutala. Vevo vyongo vinatakalaathu vailambwela, Yehova univa-a banja lauzimu logwilizana la abali na arongola. (Sal. 133:1) Unonitandiza teto ira nikale na banja lolimba. (Aife. 5:33–6:1) Koma teto unoniva-a zelu ira nikaena murendele wa m’murima. Koma ninafuneya esaesa ira nipitilize tumikela Yehova mwakama. Chifukwa n’ni ninaonga eno? Chifukwa thawi dimo-i ninokoza kumudwa na vyongo vyevyo athu amo-i kanalakwi-aathu. Ninokoza teto kumudwa ngati nilakwi-ile vyongo vimo-iviwa vyene moweli-edaweli-eda. Ninafuneya pitiliza tumikela Yehova ngakale (1) Mkiristu fwi-u anilakwela, (2) mulombwana kapena mu-iyani-u anikumudwi-a koma teto (3) nakumudwa na vyongo vyevyo ninalakwi-a iyo. w24.03 14 ¶1-2

Thawi dinjinji muvuruwanenga vyevyo viaireele abali na arongolinyu anayo kaesaesile ira kapangenga vinjinji votumikela Yehova. Mwina aliwa koovolowa Sukulu ya Akiristu Olaleela Vya Umwene kapena teto kootamela udela wewo unafuneya olaleela Umwene anjinji. Nanyen’ne munokoza vi-elela vyolinga ngati vyevi. Athu a Yehova kanofunechecha ira kapangenga vinjinji vomutumikela. (Vyo. 16:9) Koma bwanji ngati nyo kamunakwakwani-e panga vyevi vathawiila? Kamuganizenga ira muli olepela voerekezela na athu anayo kakwakwani-ile panga vyevyo. Yofuneya vinjinji choi munopitilizave mutumikela. (Mat. 10:22) Kamudiwalenga ira Yehova unosangalala na vyevyo munapanga nyo vomutumikela mogwilizana na luso linyu koma teto mwemo vyongo vililiathu vamoywinyu. Inela chindila yofuneya vinjinji ineyo munapitilizelenyo mu-arela Yesu vanduli vobadiziwa. — Sal. 26:1. w24.03 10 ¶11

Babi-u waudimu unonilonjeza ira unonikululukela nalapa. (Sal. 86:5) Eno navivwelanga chisoni chifukwa ya machimo anayo napangile iyo, kanikaikelenga vyevyo Yehova uongile liye ira unikululukela. Niumbuwelenga ira Yehova unonivwechecha ndipo ngololela. Liye kanaembekezela ira nipangenga vyongo vyoi kaninavikwakwani-e. Ndipo unoyamikela iliyetene ineyo ninaesaesa iyo panga. Koma teto muganizelenga visazo vya m’Baibulo vya athu anayo katumikele Yehova na murimiwa wetene. Mwaisazo, kaganizelani vya mtumwi Paulo. Liye oo-inda chito mwatindi wachaka dinjinji, ooenda maulendo olapa koma teto ambeeli-a mipingo dinjinji. Koma vevo vyongo vyachenjileathu vamoywae nolepelanga panga vinjinji va chito yolaleela, kodi Mulungu kaasangalala na liye? Naari. Liye oopitiliza panga vyevyo akwakwani-a liye ndipo Mulungu oomudalisa. (Vyo. 28:30, 31) Mofwanafwana na vyevi, thawi dimo-i vyevyo ninapanga iyo votumikela Yehova vinokoza chenja. Koma yofuneya vinjinji wa liye chi yolinga ineyo ninapangela iyo vyongovyo. w24.03 27 ¶7, 9

Zela m’mapepelwae wa Yehova, Yesu oopeleka isazo yoi o-arelae ka-arelenga. Vathawi yetene ya utumikae, Yesu oopepela vakwikwivakwikwi. Liye afuneela fwanya thawi yoi apepele chifukwa thawi dinjinji akala otanganisiwa koma teto oorungunuwiwa na athu anjinji. (Maliko 6:31, 45, 46) Liye oovenya mamawa vinjinji ira akale vaeka nopepela. Vathawi imo-i oopepela ma-iyu wetene aanasakule vyoira vakhani yofuneya vinjinji. (Luka 6:12, 13) Teto ma-iyu ogomi-eda amoywae, liye oopepela moweli-edaweli-eda voganizela mbali yomari-a ya utumikae vailambwela ineyo yali yorucha vinjinji. (Mat. 26:39, 42, 44) Isazo ya Yesu inonifunji-a ira kaya ninatanganisiwa moi avi, ninafuneela fwanya thawi yopepela. Mofwanafwana na Yesu, mwina na-iyene ninokoza funeela venya mamawa vinjinji kapena gona mochedwa ira nifwanye thawi yopepela. Nairanga vyevi ninotonyi-eda ira ninoyamikela Yehova voniva-a mphaso ya vadelela. w23.05 3 ¶4-5

Mawu anayo kamasuleliwe ira “unotonyi-eda ira unonikonda” kanokoza masuleliwa teto ira “unonikutulela chikondi yae.” Buku limo-i lofotokoza mawu a m’Baibulo laongile ira chikondila “inazecha ngati inje monga mwemo lemba la dambo la peeno munaongelaathu.” Mawu anala mbakopolo ndipo kanatonyi-eda ira Yehova unowakonda vinjinji ozoziwa. Ozoziwa kanoiziwa ira Mulungu “unowakonda.” (Yuda 1) Mtumwi Yohani oofotokoza mwemo aliwa kanavwelaathu vevo alembile liye ira: “Kaganizelani vya chikondi ilukulu ineyo Baba unitonyi-ede liye voniromola ira a-imae. Ndipo nili a-imae.” (1 Yoh. 3:1) Kodi Yehova unaakonda ozoziwa oka? Iyayi, liye unonikonda etene iyene. Kodi ndila ilukulu ineyo Yehova utonyi-edile liye ira unonikonda chiivi? Dipo chindila ilukulu vinjinji ineyo utonyi-edile liye chikondi kwaranya uliwetene. — Yoh. 3:16; Arom. 5:8. w24.01 28 ¶9-10

Lembali linofotokoza yongo ineyo yamutandizile Davide ira kaovenga. Yongo iwa choi, ngakale ira moywae wali vangozi, liye ooganizela vyevyo Yehova unaze liye amupangele usogolo. Davide ooiziwa ira Yehova unoza amuvulumuche vathawi yofwanelela ndipo liye ali angaongile wale ira Davideyo ngunoyo unaze akale mwene wa Izarayeli. (1 Sam. 16:1, 13) Wa Davide, vyali ngati iliyetene ineyo Yehova alonjezile liye yali ingakwakwaneli-ediwe wale. Kodi Yehova ulonjeza ira unaza apanga n’ni wa nyovo? Kaninaembekezela ira unerenga niteteza umavuto entene. Komave kaya ninagumana na maesero oyi avi muilambo yotakalela, niumbuwelenga ira Yehova unoza aamali-e muilambo isha. (Yes. 25:7-9) Mulengi-u ngwakopolo vinjinji moi unoza avenyi-e athu okhwa, nichili-a koma teto unoza aononge athu oruni-a. — 1 Yoh. 4:4. w24.01 6 ¶12-13

Muganizelenga chifukwa iwa mwavipelekile koma teto badiziwa. Mwapangile vyevi chifukwa yofuna kala umbali ya Yehova. Muumbuwelenga ineyo yausimikizeleni ira mufwanya imbarimbari. Moofunjeda makundo aimbarimbari okuza Yehova koma teto moowambeela muomeliwana koma teto mulemekeza vinjinji monga Babinyu waudimu. Mookaana iroromelo moi vyevi vyooukami-ani ira mulape. Muriminyu wooulimbikisani ira mu-iye makalelo otakala koma teto ira muirenga vyongo mogwilizana na yofuna ya Mulungu. Moovwa pama mungaiziwile ira Mulungu ooukululukelani. (Sal. 32:2) Moowambeela fwanyeya vamisonkano koma teto wandela amo-iwa vyongo vyoiri-a chidwi vyevyo mwafunjeda nyo. Monga Mkiristu ovipeleka koma teto obadiziwa, vano munanaenda vasewu wodowa umoyo moi muli osimikiza ira munopitiliza enda vasewu unola. (Mat. 7:13, 14) Nikale osimikiza murima kala ororomeleya, nivipelekenga wa Yehova koma teto nivwelenga malamulwae. w23.07 17 ¶14; 19 ¶19

Ganizela vyevyo mwamulonjezile nyo Yehova vovipeleka unokoza uva-ani kopolo ira muwande koonda maesero atundu uliwetene. Mwaisazo, kodi munokoza ambeela kopana na mulombwana kapena mu-iyana wa mwinyailo? Naari kamunapange eno, chifukwa moomulonjeza wale Yehova ira kamunaza mupanga vyongo ngati vyevyo. Ngati kamunalole ira maganizo otakala kagarateye m’murimani mwinyu kamunaza muvuteya vanduli viwa nowalimbanana ira muwamali-e. ‘Munoza muwapewe’ ira ‘kamusazi-ede vyoira vya athu otakala.’ (Miya. 4:14, 15) Ganizela mwemo Yesu asimikizele liye ira amusangalasenga Babae, unoza uutandizeni ira mombaraanya koma teto molimba murima mukoonde vyongo vyetene vyevyo munaiziwa nyo ira kavinamusangalase Mulungu, unoyo mwavipelekile nyo wa liye. (Mat. 4:10; Yoh. 8:29) Vyoona viwa pivyoi maesero anayo munagumanana nyo kanouva-ani mwai otonyi-eda ira musimikiza murima pitiliza mu-arela Yesu. Mwapanganga vyevi, iziwani ira Yehova unoza autandizeni. w24.03 9-10 ¶8-10