Yofuka Yo-orucha Ineyo Uliwetene Unokoza Fuka

Mery na mamunae Johna kanakala muilambo ineyo munaza athu anjinji okumela wu Philippines za inda chito. Aluwa kanokaana mwai wolaleela uthenga wapama wa athu anayo kanaza muilambwela. Vathawi ya mulili wa COVID-19, Mery oowambeeli-a maphunziro a Baibulo, ookala na athu awewo unakala liye koma teto amuvilambo vimo-i. Kodi apangile avi vyevi?

Mery oofuka athu anayo aafunji-a liye Baibulo ira, “Kodi vikala unoyo munamuiziwa nyo unoyo unaomeliwe funjeda Baibulo?” Kasomeda ira ee oowafuka ira, “Kodi munokoza ndikami-a ira ndiiziwanena?” Thawi dinjinji fuka yofuka yo-oruchela unokaana vyo-arelavo vyapama. Ninaonga eno chifukwa athu anayo kanaomeliwa Mawu a Mulungu thawi dinjinji kanofuna awandela abaliwa na afwiwa vyevyo kanafunjedaathu. Kodi fuka yofuka inela wali navyo-arelavo vyoi avi?

Muthu m’mo-i unoyo Mery amufunji-a liye Baibulo zina lae Jasmin, oomukami-a fwanya athu amo-i 4 ira kafunjedenga na liye. M’mo-i mwa ofunjedayo zina lae Kristine oosangalala vinjinji na phunzilolo moi oomuvepa Mery ira kafunjedenga ndila mbiili vamulungu. Mery oomufuka Kristine akala vali athu amo-i anayo kanaomeliwe ira kafunjedenga Baibulo, liye oosomeda ira, “Ee, vikala afwanga amo-i moi ndinowafotokozela vya nyo.” Vangavirile milungu doeva, Kristine oomukami-a Mery ira afunjedenga Baibulo na afwae amo-i 4. Vanduli viwa Kristine oomukami-a Mery iziwana na afwae amo-i anayo kawandela afwiwa ira kanokoza funjedanga Baibulo.

Kristine oofuna teto ira abalae awu Philippines kafunjede Baibulo. Eno kookambilana na mwanae wa iyana zina lae Andrea ira naliyene teto aambeele funjeda Baibulo. Vowambeela Andrea aganiza ira Mboni chiipembezo yailendo, katinamuroromela Yesu koma teto kanakedecha indi-eda chito ipangano yawale. Koma angafunjedile ndila imo-i yoka oozindikila ira vyevyo aganiza liyevyo kai vyoona. Thawi detene afunjedanga oomeliwa onga ira, “Akala Baibulo linaonga vyevi, vinokoza kala vyoona.”

Vangavirile thawi, Andrea oomufotokozela Mery vyokuza afwae amo-i ambiili koma teto fwae m’mo-i wauchito unoyo afuna funjeda Baibulo. Koma Mery kaiziwa ira kafunjedanga, dimbiliwa wa am’mae Andrea zina liwa Angela, anayo kali o-oona, koovuruwana. Dambo limo-i, a Angela koomuwandela Andrea ira amuwandele Mery ira naaluwene teto kanofuna funjeda Baibulo. A Angela koosangalala na vyevyo kafunjedaathu. Mwedi waanamale, aluwa kali kangalemeele mavesi anjinji moi koofuna ira kafunjedenga ndila 4 vamulungu. Mokami-iwa na Andrea, a Angela kowambeela fwanyeya vamisonkano thawi detene zela va vidiyokomfelensi.

Mery angaonile ira mamunae wa Kristine zina lae Joshua unokalecha vakwikwi vathawi ya phuzilo, oomufuka akala unaomeliwe kalana vaphunzilolo. Joshua oosomeda ira, “Chabwino, ndinakedenga vuruwana. Koma kamundifuke yofuka iliyetene, mwandifuka ndinovenyavo.” Vevo yamalaathu 5 minis, liye ali angafukile vyofuka vinjinji kwaranya Kristine moi oowambeela funa ira afunjedenga Baibulo.

Indi-eda chito yofuka yoorucha woomukami-a Mery ira akaena maphunzilo a Baibulo anjinji. Chifukwa yoi maphunzilwala kali anjinji, Mery oopanga vyoi ofunjeda amo-i kafunjedenga na a Mboni awaniwao. Liye ali angaambeli-ile maphunzilo a Baibulo okwakwana 28 amuvilambo 4.

Jasmin, wofunjeda owambeela unoyo uromoliwe mukhanila oobatiziwa mu Epulo 2021. Kristine oobatiziwa mu mey 2022 moi oowelela wu Philippines ira akalenga na banja lae. Ofunjeda amo-i ambiili anayo Mery aafwanyile liye zela wa Kristine koobatiziwa teto. A Angela koobatiziwa vangakede vira medi doyeva moi vathawiila kanapanga upainiya wogarateya. Mamunae wa Kristine, Jushua na mwanae wa iyana zina lae Andrea koma teto ofunjeda amo-i anjinji kanaapitilizave funjeda Baibulo moi kanoesaesa kala vausamwali wolimba na Yehova.

Muthawi ya anamarumiwa, uthenga wapama woolaleeliwa mombaraanya chifukwa athu koolaleela wa abaliwa na afwiwa. (Yoh. 1:41, 42a; Vyo. 10:24, 27, 48; 16:25-33) Bwanji oopanga vyoi mufuke unoyo munafunjedana nyo Baibulo kapena athu amo-i achidwi yofuka inela yoi “Kodi vikala unoyo munamuiziwa nyo unoyo unaomeliwe funjeda Baibulo?” Mwina munokoza ambeeli-a maphuzilo a Baibulo anjinji chifukwa yokeda fuka yofuka yo-orucha inela ineyo uliwetene unokoza fuka.