Gabirieli Oonga na Mariya

Elizabeti ookaana balae wamusikana zina lae Mariya. Liye akala muzinda wau Nazareti wu Galileya. Musikanola ali vaimweendi na muthu m’mo-iwa zina lae Yosefe unoyo a-inda chito yopala. Eno vangamalile medi 6 Elizabeti angali oembekezela, mgelo Gabirieli oodowa wa Mariya dowa muwandela ira: ‘Murendele ukale na weyo Mariya. Yehova uulemekeza vinjinji.’ Mariya kaavwechecha vyevyo mgelola atapulela liye. Eno Gabirieli oomuwandela ira: ‘Unoza ukaena mwana wamulombwana teto uze umuva-e zina loi Yesu. Liye unoza akale Mwene teto Umwenae kunaza umala.’

Mariya oonga ira: ‘Kodi vyevi vinawandeye avi? Miyo kandinagonevo na mulombwana.’ Gabirieli oomuwandela ira: ‘Mulungu kanalepele panga iliyetene. Zimu owela unoza uukami-e ira ukaena mwana. Kodi unoiziwa ira vathawi ila Elizabeti ngoembekezela?’ Vyangaireile eno, Mariya oosomeda mosimikizela ira: ‘Ndili kapolo wa Yehova. Vyevyo muongile nyovyo viireye wa miyo.’

Mariya oowambeela ulendo odowa muona Elizabeti. Vathawi inela, Elizabeti akala mumzinda umo-iwa wau mimwango. Angafiile, nopeleka moni, mwana unoyo ali m’mbani mwa Elizabeti oowambeela lupalupa. Eno Elizabeti oozaaliwa na zimu owela nowambeela onga ira: ‘Mariya, Yehova uudalisa. Ngumwai ulukulu ira m’mae wa mbwiyanga ufiya m’mba mwanga.’ Mariya oonga ira: ‘Ndinomutamanda Yehova na murimanga wetene.’ Mariya ookala na Elizabeti wa medi diralu vanduli viwa oowelela waniwa wu Nazareti.

Yosefe angavwile vyoi Mariya ngoembekezela oofuna mali-a imweendi. Koma agonanga mgelo oomuwandela ira: ‘Kuove mulanda Mariya ira akale iyanawo. Kapangile yotakala iliyetene.’ Eno Yosefe oomulanda Mariya nokalanga na liye waniwa.